Last updated on February 19th, 2024 at 06:07 pm
ಬಂಟ್ವಾಳ : ಡಿಗ್ರಿ ಆದಿತ್ತ್ಂಡಲಾ
ಬೇಲೆ ತಿಕ್ಕಂದಿನ ಬೆಸರ್‌ಡ್ ಪುತ್ತೂರ್‌ದ ಜವನೆ ಒರಿ ಪಾಣೇರ್‌ದ ನೇತ್ರಾವತಿ ಸುದೆಕ್ ಲಾಗಿದ್ ಆತ್ಮಹತ್ಯೆ ಮಲ್ತೊನ್ರ ತೂಯಿನ ಪೊರ್ತುಡು ಮುಟ್ಟದ ಜವನೆರೆ ಕೂಟ ಆಯನ್ ಕಾತ್‌ದ್ ಪೊಲೀಸೆರೆಗ್ ಒಪ್ಯಾದಿನ ನಡಕೆ ಸೋಮಾರ ನಡತ್‌ದ್ಂಡ್.
ಪುತ್ತೂರ್‌ದ ಆನಂದೆ ಪನ್ಪಿನಾರೆನ ಮಗೆ ನಿಶ್ಚಿತ್ (25) ಪನ್ಪಿನಾಯೆ ಪಾಣೇರ್‌ಡ್ ನೇತ್ರಾವತಿಗ್ ಲಾಗ್ಯೆರೆ ತೂತಿನ ಜವನೆ. ಉಂಬ್ಯೆ ಎಂಎಸ್‌ಡಬ್ಲ್ಯು ಪದವೀಧರೆ ಆದಿತ್ತ್‌ದ್, ಅವೆಕ್ ತಕ್ಕ ಬೇಲೆ ತಿಕ್ಕಂದಿನೆರ್ದಾವರ ಮಾನಸಿಕ ಖಿನ್ನತೆ ಆದ್ ಈ ಬೇಲೆಗ್ ಜತ್ತ್‌ದ್ ಪಂದ್ ಪಾತೆರೊಂದುಲ್ಲೆರ್.
ದ್ವಿಚಕ್ರ ಗಾಡಿಡ್ ಬತ್ತಿನ ಜವನೆ ಗಾಡಿ ಉಂತಾದ್ ಬುದೆಕ್ ಲಾಗ್ಯುನ ಅಟ್ಟನೆಡ್ ಇತ್ತಿನೆನ್ ತೂಯಿನ ಸ್ಥಳೀಯ ನಿವಾಸಿಲಾಯಿನ ಹನೀಫ್ ಬಾಯಿ, ಸಲ್ಮಾನ್ ಫಾರಿಸ್, ಇರ್ಫಾನ್ ಖಲೀಲ್‌, ನೌಫಲ್ ಸಿ ಪಿ, ತಸ್ಲಿಂ ಆರೀಫ್, ಮುಖ್ಯಾ‌ರ್ ಅಕ್ಕರಂಗಡಿ, ಪಿ.ಎಂ. ಆರಿಫ್ ಬೊಕ್ಕ ಮಮ್ಮು ಮೊಕಲ್ನ ಕೂಟ ಕಾರ್ಯಪ್ರವೃತ್ತೆರಾದ್ ನಿಶ್ಚಿತ್‌ನ್ ಆತ್ಮಹತ್ಯೆ ಮಲ್ತೊನುನೆರ್ದ್ ತಪ್ಪಾದ್ 112 ಪೊಲೀಸೆರೆ ವಶೊಕು ಕೊರ್ತೆರ್. ಜವನನ್ ವಶೊಕು ಗೆತೊಂದಿನ ಪೊಲೀಸೆರ್ ಆಯನ ವಿಚಾರಣೆ ಮಲ್ತೊಂದುಲ್ಲೆರ್.