Last updated on March 11th, 2024 at 06:13 pm
ಇನಿ ಒಡಿಪು ಜಿಲ್ಲಾಧಿಕಾರಿಲೆನ ಒರುಟು ಕರ್ನಾಟಕ ಸರ್ಕಾರದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೆರೆಗ್ ತುಳು ಭಾಷೆ ಲಿಪಿತ ಅಕ್ಷರೊಲೆನ್ಲಾ ಸಾರ್ವಜನಿಕ ಜಾಗೆಲೆಡ್ ಅಂಚೆನೆ ವಾಣಿಜ್ಯ ಮಳಿಗೆಲೆಡ್ ಪುದರ್ ಪಲವೆಡ್ ಪಾಡರೆ ಒಡಿಪು ಬೊಕ್ಕ ಕುಡ್ಲ ಜಿಲ್ಲೆಲೆಗ್ ವಿಶೇಷ ಆದೇಶ ಕೊರೊಡು ಪನ್ದ್ ಆಗ್ರಹ ಮಲ್ತ್ ಮಾಜಿ ಶಾಸಕ ಮೊಯಿದೀನ್ ಬಾವ ಮೆರೆನ ಅಂಚೆನೆ ಮಾತಾ ತುಳು ಪರ ಸಂಘಟನೆಲೆನ ನೇತೃತ್ವಡ್ ತುಳುನಾಡ ಜನಕುಲೆನ ಲೆಕ್ಕೊಡು ಮನವಿ ಕೊರಿಯೆರ್. ಒಡಿಪು ಜಿಲ್ಲೆದ ಜಿಲ್ಲಾಧಿಕಾರಿಲು ಮನವಿನ್ ದೆತೊಂಡೆರ್, ಬಾಷಾ ಸಮಗ್ರ ಅಭಿವೃದ್ಧಿ ತಿದ್ದುಪಡಿ ಮಸೂದೆ 2024 ಟ್ಟ್ ತೆರಿಪಾಯಿಲೆಕ್ಕ ಕನ್ನಡ ಭಾಷೆನ್ ಶೇಕಡ 60 ದ ಪಗತೆಗ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಲೆಡ್ ಕನಿಷ್ಠ ಶೇಕಡ 50 ನು ಪಾಡ್ದ್ ಅಂಚೆನೆ 2500 ವರ್ಷದ ಪರತಿರಿ ಇತ್ತಿನ ಸ್ವಂತ ಲಿಪಿ ಉಪ್ಪುನ ತುಳು ಲಿಪಿತ ಅಕ್ಷರಲೆಗ್ ಶೇಕಡ 30 ದಾತ್ ಅವಕಾಶ ಕೊರೊಡು ಅಂಚೆನೆ ಒರಿದಿನ ವ್ಯಾವಹಾರಿಕ ಭಾಷೆಲೆಗ್ ಶೇಕಡ 20 ದಾತ್ ತುಳುನಾಡ್ದ 2 ಜಿಲ್ಲೆಲೆಗ್ ಅನ್ವಯ ಆಪಿಲೆಕ್ಕ ಇತ್ತೆನೇ ವಿಶೇಷ ಆದೇಶ ಪಿದಡ್ಪಾವೊಡು ಪನ್ದ್ ಆಗ್ರಹ ಮಲ್ತೆರ್. ಈ ಪೊರ್ತುಡು ತುಳು ಸಾಹಿತ್ಯ ಅಕಾಡೆಮಿ ಮಾಜಿ ಸದಸ್ಯರಾಯಿನ ಶ್ರೀ ಆಕಾಶ್ ರಾಜ್ ಜೈನ್ ಮೇರ್, ತುಳುನಾಡ ರಕ್ಷಣಾ ವೇದಿಕೆ ಅಧ್ಯಕ್ಷರಾಯಿನ ಶ್ರೀ ಯೋಗೀಶ್ ಶೆಟ್ಟಿ ಜೆಪ್ಪು ಮೇರ್, ತುಳು ಪರ ಪೊರುಂಬಾಟಗಾರೆ ರೋಷನ್ ರೆನೋಲ್ಡ್, ಜೈ ತುಳುನಾಡು ಸಂಘಟನೆ ಅಧ್ಯಕ್ಷರಾಯಿನ ವಿಷು ಶ್ರೀಕೆರಾ, ತುಳುನಾಡು ಒಕ್ಕೂಟದ ಮುಖಂಡೆರ್, ಒಡಿಪು ರಾಜಕೀಯ ನಾಯಕೆರಾಯಿನ ಕೃಷ್ಣಮೂರ್ತಿ ಆಚಾರ್ಯ ಮೇರ್, ಅಂಚೆನೆ ಮಾತಾ ತುಳು ಪರ ಸಂಘಟನೆಲೆನ ಪದಾಧಿಕಾರಿಲು ಇತ್ತೆರ್.