Last updated on March 25th, 2024 at 02:38 pm
ವಾಟ್ಸಾಪ್‌ಡ್ ಪಾರ್ಟ್ ಟೈಮ್ ಬೇಲೆ ಉಂಡು ಪಂಡ್‌ದ್ ನಂಬಾದ್ 1.15 ಲಕ್ಷ ರೂ. ಪತ್ತಾದಿನ ಪ್ರಕರಣೊಗು ಸಂಬಂಧಿತ್‌ದ್ ಕುಡ್ಲ ನಗರ ಸಿ.ಈ.ಎನ್. ಕ್ರೈಂ ಪೊಲೀಸೆರ್ ರಾಜಸ್ಥಾನೊದ ಒರ್ಯನ್ ಕೈದ್ ಮಲ್ದೆರ್.
ರಾಜಸ್ಥಾನೊದ ಜೋಧ್‌ಪುರ್ ಜಿಲ್ಲೆದ ಬಾವುರಿ ಗ್ರಾಮೊದ ನಿವಾಸಿಯಾಯಿನ ಸದ್ದಾಂ ಗೌರಿ ಅಲಿಯಾಸ್ ಬಾವುರಿ (30) ಪನ್ಪಿನಾಯನ್ ಬಾವುರಿ ಗ್ರಾಮೊಡು ಕುಡ್ಲ ಪೊಲೀಸೆರ್ ಕೈದ್ ಮಲ್ದೆರ್.
ಕುಡ್ಲ ಸಿ.ಈ.ಎನ್ ಕ್ರೈಂ ಪೊಲೀಸ್ ಸ್ಟೇಶನ್‌ಡ್ ಈ ಬಗೆಟ್ 131/2023 ಕಲಂ 66(ಸಿ) 66(ಡಿ) ಐಟಿ ಆಕ್ಟ್ 420 ಐಪಿಸಿದ ಅಡಿಟ್ ಪ್ರಕರಣ ದಾಕಲಾದಿತ್ತ್ಂಡ್.
ಆರೋಪಿ ವಾಟ್ಸಾಪ್‌ಡ್ ಪಾರ್ಟ್ ಟೈಮ್ ಬೇಲೆ ಉಂಡು ಪಂದ್ ಪಿರ್ಯಾದಿದಾರೆರೆಗ್ ಸೊಲ್ಲಂಜ ಕಡಪುಡುದ್ ಪಾರ್ಟ್ ಟೈಂ ಜಾಬ್ ಪುದರ್‌ಡ್ ಲಿಂಕ್ ಕೊರ್ದು ಈ ಲಿಂಕ್‌ದ ಮುಕೇನ ಕಾಸ್ ಪಾಡ್ದ್, ಟಾಸ್ಕ್ ಕಂಪ್ಲೀಟ್ ಮಲ್ತ್‌ದ್ ಕಾಸ್ ಮನ್ಪೊಲಿ ಪಂಡ್‌ದ್ ಪಿರ್ಯಾದಿದಾರೆರೆನ್ ನಂಬಾದ್ ಅಕಲೆಡ ಒಟ್ಟು 1,15,000 ಕಾಸ್ ಪೀಂಕಾದಿತ್ತೆ. ಆರೋಪಿನ ಕೈರ್ದ್ ಈ ಬೇಲೆಲೆಗ್ ಗಲಸ್ದಿನ ವಿವೋ ಕಂಪನಿದ ರಡ್ಡ್ ಮೊಬೈಲ್ ಫೋನ್, 8 ಡೆಬಿಟ್ ಕಾರ್ಡ್, 4 ಬ್ಯಾಂಕ್ ಚೆಕ್ ಬುಕ್‌ಲು, ಆಧಾರ್ ಕಾರ್ಡ್, ಪಾನ್ ಕಾರ್ಡ್ ಇಂಚಿನ ಸೊತ್ತುಲೆನ್ ವಶೊಕು ಗೆತೊಂದೆರ್.
ಕುಡ್ಲ ಪೊಲೀಸ್ ಆಯುಕ್ತೆ ಅನುಪಮ್ ಅಗರವಾಲ್ ಬೊಕ್ಕ ಡಿಸಿಪಿ ಸಿದ್ದಾರ್ಥ ಗೊಯಲ್ ಮೊಕಲೆನ ಮಾರ್ಗದರ್ಶನೊದಂಚ, ಸಿಸಿಆರ್ ಬಿ ಘಟಕೊದ ಎಸಿಪಿ ರವೀಶ್ ನಾಯಕ್ ಮೆರೆನ ಮುತಾಲಿಕೆಡ್ ಕುಡ್ಲ ನಗರ ಸೆನ್ ಕ್ರೈಂ ಪೊಲೀಸ್ ಸ್ಟೇಶನ್‌ದ ಠಾಣಾಧಿಕಾರಿ ಶ್ಯಾಮಸುಂದರ್ ಬೊಕ್ಕ ಸಿಬ್ಬಂದಿಲು ಕಾರ್ಯಾಚರಣೆಡ್ ಪಾಲ್‌ಗೆತೊಂದಿತ್ತೆರ್.