Last updated on April 23rd, 2024 at 07:39 am
ತುಳುನಾಡ್, ತುಳುದೇಶ, ತುಳುರಾಜ್ಯ ,ತುಳುವ, ತೌಳವ ದೇಶ ಪಂದ್ ಮಾತ ಪುದರಾತಿನ ನಮ್ಮ ತುಳುನಾಡ್ ದ ಆಚಾರ ವಿಚಾರೊಲೆನ್ ಚಾರಿತ್ರಿಕವಾದ್ ಪನ್ಪಿನ ಚೂರು ಬಂಗದ ವಿಷಯ. ದಾಯೆ ಪಂಡ ತುಳುನಾಡ್ ದ ವ್ಯಾಪ್ತಿ ಮಸ್ತ್ ದೂರ ಮುಟ್ಟ ಪರತ್ ದಿತ್ತ್ಂಡ್, ಕನ್ನಡ ಪಾತೆರುನ ಪ್ರದೇಶೊಲು ತುಳುನಾಡ್ ಡೇ ಸೇರ್ದಿತ್ತ್ಂಡ್ (ಆಳುಪೆರ್ ಆಡಳಿತ ಮಲ್ತಿನಂಚಿತ್ತಿನ ತುಳುನಾಡ್ ಡ್ ಸುಮಾರ್ ಕನ್ನಡ ಪ್ರದೇಶೊಲು ಸೇರ್ದಿತ್ತ್ಂಡ್)
ಪಿರಾಕ್ ದ ತುಳುನಾಡ್ ದ ಗಡಿಕುಲೆನ್ ತೆರಿಯೋನ್ಯರ ತಮಿಳುದ ಪ್ರಾಚೀನ ಸಂಗಮ ಸಾಹಿತ್ಯ, ಗ್ರಾಮ ಪದ್ಧತಿ, ಸಹ್ಯಾದ್ರಿ ಖಂಡ, ಕೇರಳೊತ್ಪತ್ತಿ ಅಂಚೆನೆ ತುಳುವೆರೆ ಪಾಡ್ದನೊಲು ಸಾಯೊ ಆಪುಂಡು.
ಭಾರತ ದೇಸೊಗು ಸ್ವಾತಂತ್ರ ತಿಕ್ ದ್ ಬಾಸೆಲೆನ ಆದಾರೊಡು ರಾಜ್ಯೊಲು ಉಂಡಾನಗ ತುಳುನಾಡ್ ಪನ್ಪಿನವು ಒಂಜಿ ಚರ್ಚೆದ ವಿಷಯ ಆದಿತ್ಂಡ್ ಇಂಚ ಇಪ್ಪುನಗ ಕನ್ನಡ ಪಾತೆರುನ ಪ್ರದೇಸೊಲೆನ್ ಮಾತೆನ್ಲ ಒಟ್ಟು ಸೇರಾದ್ ನವೆಂಬರ್ 1956ಟ್ ಮೈಸೂರು ರಾಜ್ಯೊ ಉಂಡಾಂಡ್ (1973, ಕರ್ನಾಟಕ). ಆಂಡ ತುಳುನಾಡ್ ದ ಪರಿತಿರಿನ್ ತೂಂಡ ಪಿರಾಕ್ ದ ಕಾಲೊಡ್ದುಲ ತುಳುನಾಡ್ ನ್ ಆಳ್ದಿನ ಅರಸೊತ್ತಿಗೆಡಿತ್ತಿನ ಬೊಕ್ಕ ತುಳುವಪ್ಪೆ ಜೋಕುಲೆನ ಕಾಸ್ರೋಡ್ ಕೇರಳ ರಾಜ್ಯೊಗ್ ಸೇರ್ಂಡ್.
ತುಳು ಬಾಸೆನ್ ದೈವ ಬಾಸೆ ಪಂದ್ಲಾ ಪನ್ಪೆರ್, ತುಳು ಬಾಸೆಗ್ ಸುಮಾರ್ 2000 ವರ್ಷರ್ದ್ಲಾ ಪಿರಾಕ್ ದ ಪರಿತಿರಿ ಉಂಡು. ತೆನ್ಕಾಯಿ ಭಾರತೊದ ಐನ್ ದ್ರಾವಿಡ ಬಾಸೆಲೆಡ್ ತುಳು ಬಾಸೆಲಾ ಒಂಜಿ. ಈ ನಮ್ಮ ತುಳು ಬಾಸೆಗ್ ತನ್ನವೇ ಆಯಿನ ತುಳು ಲಿಪಿಲಾ ಉಂಡು. ಸುಮಾರಾತ್ ಕಲ್ಬರವುಲು, ತಾರಿದ ಓಲೆಲ್, ಬೊಕ್ಕ ಒಂಜಾತ್ ಮಸ್ತಿರೆಲ್ಲಾ ತುಳು ಬಾಸೆಡ್ ಉಂಡು.
ಆಂಡ ಇಂಚಿಪ್ಪದ ದಿನೊಕುಲೆಡ್ ಕರ್ನಾಟಕೊ ಬೊಕ್ಕ ಕೇರಳ ರಾಜ್ಯೊಲೆಡ್ ಅವೊಂದಿಪ್ಪುನ ಕನ್ನಡ ಬೊಕ್ಕ ಮಲಯಾಳಂ ಬಾಸೆಲೆನ ಹೇರಿಕೆರ್ದಾವರ ತುಳು ಬಾಸೆ ಅಳಿದ್ ಪೋವೊಂದುಂಡು ಪನ್ಪುನ ಬೆಸರ್ದ ಸಂಗತಿ. ಯುನೆಸ್ಕೋ ಸಂಸ್ಥೆ ಬುಡುಗಡೆ ಮಂತ್ ದಿನ ಅಳಿದ್ ಪೋಪುನ ಬಾಸೆಲೆನ ಪಟ್ಟಿಡ್ ತುಳು ಬಾಸೆಲ ಒಂಜಿ ಪನ್ಪಿನ ಬಾರೀ ಮಲ್ಲ ಬೇಜಾರ್ ದ ಸಂಗತಿ. ಇನಿ ತುಳು ಬಾಸೆ ಒರಿಪಾವೊನ್ಯರ ಇಪ್ಪುನ ಒಂಜಿ ಎಡ್ಡೆ ನಿರ್ಧಾರ ಪಂಡ ತುಳು ಬಾಸೆನ್ ಸಂವಿಧಾನದ 8ನೇ ಪರಿಚ್ಛೇದೊಗು ಗೋಡ್ಯಾವುನವು. ಆಂಡ ಈ ಬೇಡಿಕೆಲು ಇನಿ ಕೋಡೆದ ಅತ್ತ್, ಉಂದು ಬೇಡಿಕೆಲ್ ಕರ್ನಾಟಕ ಏಕೀಕರಣದ ಸಂಧರ್ಬೊರ್ದುಲಾ ಕೇಂದ್ ಬರೊಂದುಂಡು. ಏಕೀಕರಣದ ಆ ದಿನೊಕುಲೆಡ್ ತುಳುನಾಡ್ ದ ಪೆರಿಯಕುಲಾಯಿನ ಕೈಯಾರ ಕಿಞ್ಞಣ್ಣ ರೈ ಬೊಕ್ಕ ಎಸ್. ಯು. ಪಣಿಯಾಡಿ ಬೊಕ್ಕ ನನಲಾತ್ ಜನ ಕಾಸ್ರೋಡ್ ಬೇತೆ ಆಯರ ಬಲ್ಲಿ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್ ಒಟ್ಟುಗ್ ಇಪ್ಪೊಡು ಪಂದ್ ಕನ ದೀದಿತ್ತೆರ್.
ಕರ್ನಾಟಕ ಏಕೀಕರಣ ಸಂಧರ್ಬೊಡು ದುಂಬು ದೀದಿತ್ತಿನ ಕುಡೊಂಜಿ ಕೇನ್ಪು ಪಂಡ ಕರ್ನಾಟಕ ಬೊಕ್ಕ ಕೇರಳ ರಾಜ್ಯೊಲೆಡ್ 2ನೇ ಅಧಿಕೃತ ಬಾಸೆ ಆದ್ ತುಳು ಬಾಸೆನ್ ಘೋಷಣೆ ಮನ್ಪುನೆ. ಆಂಡ ಸುರುಕ್ಕು ಈ ಬೇಡಿಕೆ ಒತ್ತೊಂದಿತ್ತ್ ನ ಕರ್ನಾಟಕ ಏಕೀಕರಣ ಸಮಿತಿ ಕರ್ನಾಟಕ ರಾಜ್ಯ ಉಂಡಾಯಿ ಬೊಕ್ಕ ಆ ಒಂಜಿ ಪಾತೆರೊನು ನಡಪಾದ್ ಕೊರಂದೆ ಮೋಸ ಮಂತ್ಂಡ್ ಅವ್ವೇ ರೀತಿ ಕೇರಳಡ್ಲ ಅಧಿಕೃತ ಬಾಸೆದ ಕನ ಕನ ಆದೇ ಒರಿಂಡ್. ಉಂದೆರ್ದಾವರ ತುಳುನಾಡ್ ತನ್ನ ಕೆಲವೊಂಜಿ ಬಾರೀ ಪೊರ್ಲುದ ಕೆಲವೊಂಜಿ ಸಂಸ್ಕೃತಿ, ಆಚರಣೆಲೆನ್ ಅವೆರ್ದ್ಲ ಮುಖ್ಯವಾದ್ ತುಳು ಬಾಸೆ ಪನ್ಪಿನವ್ವು ತನ್ನ ಎತೋ ಪೊರ್ಲು ಪೊರ್ಲುದ ಪದೊಕುಲೆನ್ ಕಳೆವೊಂಡ್, ಇನಿ ಅಂಚಿತ್ತಿನ ಪದೊಕುಲೆನ್ ಬಾಕಿದ ಬಾಸೆಲೆರ್ದ್ ಪಡೆದ್ ಗಲಸಾವೊಂದುಲ್ಲ ಪನ್ಪಿನ ಬೇಜಾರ್ದ ಸಂಗತಿ.
ತುಳುನಾಡ್ ದ ಮಿತ್ತ್ ಕಾಲಿ ಬಾಸೆದ ಆದಾರೊಡು ಅತ್ತಂದೆ ರಾಜಕೀಯವಾದ್ಲ ದಬ್ಬಾಳಿಕೆಲ್ ನಡತ್ತೊಂದು ಬತ್ತ್ ದ್ಂಡ್. ತುಳುನಾಡ್ ಕರ್ನಾಟಕೊಡು ತಿರ್ವೆ (ತೆರಿಗೆ) ಕೊರ್ಪುನೆಡ್ 2ನೇ ಸ್ಥಾನೊಡು ಇತ್ತಂಡ್ಲ ಇನಿಕ್ಲ ಮುಲ್ಪ ಸರಿಯಾಯಿನ ಸೌಲಭ್ಯಲೆನ ಒಡಕ್ ಉಂಡು. ಉಂದು ತುಳುನಾಡ್ ದ ಜನಕುಲೆಗ್ ಆವೊಂದುಲ್ಲೈನ ಮಾಮಲ್ಲ ಮೋಸೊ. ಉಂದೇ ರೀತಿ ಭಾಷಾ ದಬ್ಬಾಳಿಕೆನ್ ತುಳುನಾಡ್ ದ ಮಿತ್ತ್ ನಡಪಂಡ ತುಳುನಾಡ್ ಪ್ರತ್ಯೇಕ ರಾಜ್ಯ ಆವೊಡು ಪನ್ಪಿನ ಬಲ್ಪು ಜೋರಾಪುನೆಡ್ ಒವ್ವೆ ಒಂಜಿ ಸೋದ್ಯ ಇಜ್ಜಿ. ಉಂದೆರ್ದ್ ದುಂಬು ತುಳು ಬಾಸೆನ್ ಕರ್ನಾಟಕ ಬೊಕ್ಕ ಕೇರಳ ರಾಜ್ಯೊಲು ಅಧಿಕೃತ ಮನ್ಪೋಡು ಅಂಚನೇ ತುಳುನಾಡ್ ದ ರಾಜಕಾರಣಿಲ್ ಈ ಅಪ್ಪೆಬಾಸೆ ಬೊಕ್ಕ ಅಪ್ಪೇನೆಲೊತ್ತ ವಿಸಯೊದ ಬಗೆಟ್ ಭಿನ್ನಾಭಿಪ್ರಾಯೊಲೆನ್ ಮರತ್ ದ್ ತುಳುನಾಡ್ ಬೊಕ್ಕ ತುಳುಬಾಸೆಗ್ ಒಟ್ಟಾದ್ ಸೊರ ದೆರ್ಪೊಡು ಪನ್ಪಿನವು ತುಳುನಾಡ್ ದ ಜನಕುಲೆನ ಬಿನ್ನಪು.
🖋️ ಬರವು : ವಿಶಾಲ್ ರೈ ಕೆ