Last updated on May 6th, 2024 at 10:55 am
ಬಂಟ್ವಾಳ: ಕಾರಣಿಕೊದ ಕ್ಷೇತ್ರ ಪಣೋಲಿಬೈಲ್ ಶ್ರೀ ಕಲ್ಲುರ್ಟಿ ದೈವಸ್ಥಾನೊಡು ಭಕ್ತೆರ್ ಪರಕೆದ ಕೋಲ ಸೇವೆ ಕೊರ್ಪುನೆಟ್ ಮಲ್ಲ ಪರಿಮಾರ್ ಕನತ್‌ದೆರ್.
ಪಣೋಲಿಬೈಲ್ ಕ್ಷೇತ್ರೊಡು 23 ಸಾರೊರ್ದುಲಾ ಎಚ್ಚ ಕೋಲ ಸೇವೆಲೆ ಬುಕ್ಕಿಂಗ್ ಇಪ್ಪುನೆರ್ದಾವರ ಪರಕೆ ಪಂಡಿನಕ್ಲೆಗ್ ಬೇಗೊಡು ಸೇವೆ ಸಂದಾವುಲೆಕ ಮನ್ಪೆರ ಪ್ರತೀ ದಿನ ನಡಪುನ ಕೋಲ ಸೇವೆಡ್ ಪರಿಮಾರ್ತ್‌ದೆರ್. ಇತ್ತೆ ಮುಟ್ಟ ದಿನೊಟು 4 ಜನೊಕು ಕೋಲ ಸೇವೆ ಕೊರೊಂದಿತ್ತೆರ್. ಇತ್ತೆ ಅವೆತ ಪಗತೆಗ್ 8 ಜನೊಕು ಸೇವೆ ಸಂದಾವುನ ಸಂದರಪ್ಪು ಕೊರ್ತೆರ್. ಮೇ 3ರ್ದ್ ಈ ಪಗತೆ ಆತ್ಂಡ್.
ಪಣೋಲಿಬೈಲ್ ಕ್ಷೇತ್ರೊಡು ಅಗೇಲ್ ಬೊಕ್ಕ ಕೋಲ ಸೇವೆಲು ವಿಶೇಷವಾದಿತ್ತ್‌ದ್, ವಾರೊದ 3 ದಿನ ಅಗೇಲ್ ಅಂಚೆನೇ ವಾರೊದ 5 ದಿನ ಕೋಲ ಸೇವೆ ನಡಪುಂಡು. ಕಾಂಡೆ ಗೊತ್ತು ಮಲ್ದಿನ ಪೊರ್ತುದುಲಯಿ ಬತ್ತಿನಕಲೆಗ್ ಏತ್ ಬೋಡಾಂಡಲ ಅಗೇಲ್ ಸೇವೆ ಕೊರ್ಪುನ ಅವಕಾಶ ಇತ್ತ‌ದ್, ಆಂಡ ದಿನೊಟು ಕೋಲ ಸೇವೆ ಕೊರ್ಯೆರೆ ಕಾಲಿ ನಾಲ್ವೆರೆಗ್ ಮಾತ್ರ ಅವಕಾಶ ಇತ್ತ್ಂಡ್.
ಆಂಡ ಕೋಲ ಸೇವೆಲೆನ ಬುಕ್ಕಿಂಗ್ ಎಚ್ಚಾದಿತ್ತ‌ದ್, ಲೆಕ್ಕಾಚಾರ ಪಾಡ್ಂಡ ಅವು ಪೂರ್ಣ ಆವೆರೆ ಕಮ್ಮಿಡ್ 35 ವರ್ಸ ಬೋಡಾವು ಪಂದ್ ಅಂದಾಜಿ ಮಲ್ದೆರ್. ಸೋಮಾರ ಅಂಚೆನೇ ಸನಿಯಾರ ಬುಡ್ಂಡ ವಾರೊಡು 5 ದಿನ ಕೋಲ ಸೇವೆಗ್ ಅವಕಾಶ ಇತ್ತ್ಂಡಲಾ ನಮ್ಮ ಆಟಿ ತಿಂಗೊಲು, ಆಮಾಸೆ, ಷಷ್ಠಿ, ಸಜೀಪ ಮಾಗಣೆದ ಜಾತ್ರೆ, ಆಯನ ಇಂಚಿನ ಸಂದರ್ಭೊಡು ಕೋಲ ಸೇವೆ ನಡಪುಜಿ. ಅಂಚಾದ್ ವರ್ಸೊಗು 600-700 ಜನೊಕು ಮಾತ್ರ ಕೋಲ ಸೇವೆದ ಸಂದರಪ್ಪು ತಿಕ್ಕೊಂದಿತ್ತ್ಂಡ್.
ಅಂಚಾದ್ ಪರಕೆ ಪಂಡಿನಕ್ಲೆಗ್ ಬೇಗೊಡು ಸೇವೆದ ಸಂದರಪ್ಪು ತಿಕ್ಕುನ ದಿಟ್ಟಿಡ್ ದೈವೊಡ ಪರಕೆ ನಟ್ಟೊಂದು ಮಾಗಣೆದ ದೈವೊದ ಅನು ಗೆತೊಂದು ದಿನೊಟು 4 ಕೋಲ ಸೇವೆ ಕೊರ್ನ್ಡಲಾ ಪ್ರತೀ ಕೋಲೊಡು ಇರ್ವೆರೆಗ್ ಪ್ರಸಾದೊದ ಲೆಕ 8 ಜನೊಕು ಪ್ರಸಾದ ಕೊರ್ಪುನ ಪಂದ್ ನಿರ್ಧರಿತ್‌ದೆರ್. ಅಂಚಾದ್ ನನದ ದಿನೊಟು ಪರಕೆದ ಕೋಲ ಕೊರ್ಯೆರ ಬುಕ್ಕಿಂಗ್ ಮಲ್ತಿನಕಲೆಗ್ ಬೇಗ ಅವಕಾಶ ತಿಕ್ಕುಂಡು ಪಂದ್ ಪಣೋಲಿಬೈಲ್ ಕ್ಷೇತ್ರೊದ ಮೂಲೊಲು ತೆರಿಪಾದ.