Last updated on September 28th, 2024 at 09:24 am
ಬೊಲ್ತೇರ್: ಕೇಂದ್ರ ಪ್ರವಾಸೋದ್ಯಮ ಸಚಿವಾಲಯೊ ಅಟ್ಟನೆ ಮಲ್ತಿತ್ತಿನ ಪ್ರವಾಸೋದ್ಯಮ ಹಳ್ಳಿ ಸ್ಪರ್ಧೆ-2024ತ ಅಡ್ವೆಂಚರ್‌ ಟೂರಿಸಂ ವಿಭಾಗೊಡು ಬೊಲ್ತೇರ್ ತಾಲೂಕ್‌ದ ಕುತ್ಲೂರು ಗ್ರಾಮೊಗು ಕೋಡೆ ರಾಷ್ಟ್ರೀಯ ಪ್ರಶಸ್ತಿ ಪ್ರದಾನ ಮಲ್ತೆರ್.
ಪೊಸದಿಲ್ಲಿದ ವಿಜ್ಞಾನ್‌ ಭವನೊಡು ನಡತಿನ ವಿಶ್ವ ಪ್ರವಾಸೋದ್ಯಮ ದಿನಾಚರಣೆಡ್ ಉಪರಾಷ್ಟ್ರಪತಿ ಜಗದೀಪ್‌ ಧನ್‌ಕರ್‌ ಮೆರೆನ ಒತ್ತು‌ಪಾಲ್‌ಡ್, ಕೇಂದ್ರ ಪ್ರವಾಸೋದ್ಯಮ ಸಚಿವೆ ಗಜೇಂದ್ರ ಸಿಂಗ್‌ ಶೇಖಾವತ್‌ ಪ್ರಶಸ್ತಿ ಪ್ರದಾನ ಮಲ್ತೆರ್. ಕುತ್ಲೂರು ಗ್ರಾಮೊದ ಕಡೆರ್ದ್ ಹರೀಶ್‌ ಡಾಕಯ್ಯ ಪೂಜಾರಿ, ಶಿವರಾಜ್‌ ಅಂಚನ್‌ ಬೊಕ್ಕ ರಾಜ್ಯ ಪ್ರವಾಸೋದ್ಯಮ ಇಲಾಖೆದ ಒತ್ತು-ನಿರ್ದೇಶಕೆ ಶ್ರೀನಿವಾಸ್‌ ಪ್ರಶಸ್ತಿ ಗೆತೊಂಡೆರ್.
ಸಾಂಸ್ಕೃತಿಕ ಪರಂಪರೆ ಬೊಕ್ಕ ಪ್ರವಾಸೋದ್ಯಮದ ಮುಕೇನ ಸುಸ್ಥಿರ ಬುಲೆಚ್ಚಿಲ್ ತೂವೊಂದುಪ್ಪುನ ಗ್ರಾಮೊಲೆನ್ ಪೆಜ್ಜಿದ್ ತೂಪಾಯೆರ ಕೇಂದ್ರ ಪ್ರವಾಸೋದ್ಯಮ ಸಚಿವಾಲಯೊರ್ದು ಬೆಸ್ಟ್ ಟೂರಿಸಂ ವಿಲೇಜ್ ಕಾಂಪಿಟೇಶನ್‌-2024 ಪಡತಿತ್ತ್ಂಡ್. ಉಂದೆಟ್ ನಾರಾವಿ ಗ್ರಾ.ಪಂ. ಸೀಮೆದ ಕುತ್ಲೂರು ನಿವಾಸಿ, ಬೆಂಗಳೂರ್‌ಡ್ ಸಾಫ್ಟ್‌ವೇರ್‌ ಎಂಜಿನಿಯರ್‌ ಆದುಪ್ಪುನ ಹರೀಶ್‌ ಡಾಕಯ್ಯ ಪೂಜಾರಿ, ಕತಾರ್‌ ಉದ್ಯೋಗಿ ಸಂದೀಪ್‌ ಕುತ್ಲೂರು ಬೊಕ್ಕ ಶಿವರಾಜ್‌ ಅಂಚನ್‌ ಮೊಕುಲು ತನ್ಕುಲೆ ಗ್ರಾಮೊದ ಪ್ರವಾಸಿ ಜಾಗೆಲು, ಪಸಂದ್ರ ಅಂಚೆನೇ ಪ್ರಕೃತಿದ ಐಸಿರೊದ ಬಗೆಟ್ ಒಂಜಿ ಡಾಕ್ಯುಮೆಂಟರಿ ಲೆಕ ಮಲ್ತ್‌ದ್ ಆನ್‌ಲೈನ್‌ಡ್ ಆಪ್‌ಲೋಡ್‌ ಮಲ್ತಿತ್ತೆರ್.
ಉಂದೆತ ಬಗೆಟ್ ಪಾಕ ಸುತ್ತುಲೆಡ್ ಪ್ರವಾಸಿ ಜಾಗೆಲೆನ ಒಲವುನು ಪ್ರವಾಸೋದ್ಯಮ ಮಂತ್ರಾಲಯ ಗೆತೊಂದಿತ್ತ್ಂಡ್. ದೇಶೊಡೊರ್ಮೆ ನಡತಿನ ಬೆಸ್ಟ್ ಟೂರಿಸಂ ವಿಲೇಜ್ ಪಂತೊಡು ಕುತ್ಲೂರ್ ಗ್ರಾಮ ಅಜತ್ ಬತ್ತಿನ ತುಳುನಾಡ್‌ಗೊಂಜಿ ಪೆರ್ಮೆ.
