Last updated on January 3rd, 2025 at 01:31 pm
ಕಡಬ ಜನವರಿ 03: ಕಾಲೇಜ್ ಒಂಜೆಟ್ ಓದೊಂದಿತ್ತಿನ ಲತ್ತ್ ಪ್ರಾಯೊದ ಪೊಣ್ಣನೊಟ್ಟುಗು ಮೋಕೆ ಮನ್ಪುನ ನೆವನ ಪನೊಂದು ವಿಶ್ವಾಸ ಗೆಂದ್‌ದ್ ಬೊಕ್ಕ ದೈಹಿಕ ಸಂಪರ್ಕ ಬುಲೆಪಾಯಿನತ್ತಂದೆ ವೀಡಿಯೋ ರೆಕಾರ್ಡ್ ಮಲ್ತ್‌ದ್ ಬ್ಲಾಕ್ ಮೇಲ್ ಮಲ್ತೊಂದಿತ್ತಿನ ಜವನನ್ ಕಡಬ ಪೊಲೀಸೆರ್ ಕೈದ್ ಮಲ್ದೆರ್.
ಕಡಬ ತಾಲೂಕ್ ಕೋಡಿಂಬಾಳ ಗ್ರಾಮೊದ ಓಂಕಲ್ ನಿವಾಸಿ ಪ್ರವೀಣ್ ಪೂಜಾರಿ ಕೈದಾತಿನ ಆರೋಪಿ. ಕೈದಾತಿನ ಆರೋಪಿ ಪ್ರವೀಣ್ ಪೂಜಾರಿ ಅಪ್ರಾಪ್ತೆನ್ ಮೋಕೆ ಮನ್ಪುವೆ ಪನ್ಡ್‌ದ್ ಒಟ್ಟುಗು ಲೆತೊಂದು ಪೋಪೆದೆ. ಪಾಕ ಸರ್ತಿ ಪುತ್ತೂರು ಕುಂಬ್ರದ ಬಾಡಾಯಿದ ರೂಮ್‌ಗ್ ಲೆತೊಂದು ಪೋದು ತನ್ನ ಕಾಮದ ಬಡವುಗು ಗಲಸೊಂದಿನತ್ತಂದೆ ಬಂಜಿ ಬರಂದಿಲೆಕ ಮಾತ್ರೆನ್ಲಾ ಕೊರ್ತೆ. ಉಂದೆತ ಒಟ್ಟುಗು ಆ ಪೊರ್ತುಲೆನ ವೀಡಿಯೋಲ ಮಲ್ತ್‌ದ್ ಮೊಬೈಲ್‌ಡ್ ರೆಕಾರ್ಡ್ ಮಲ್ತಿತ್ತೆ ಪನ್ದ್ ಪೊಣ್ಣು ಒಯಿಲ್‌ಡ್ ಬರೆಪಾದಲ್.
ಡಿಸೆಂಬರ್ 30 ದಾನಿ ಕುಂಬ್ರದ ಬಾಡಾಯಿದ ರೂಂ ಗ್ ಲೆತೊಂದು ಪೋದು ಅಲ್ಪನೇ ಉಂತ್‌ದ್ ದೈಹಿಕ ಸಂಪರ್ಕ ಬುಲೆಪಾದೆ. ಮನದಾನಿ ರೂಮ್‌ಡ್ ಇಪ್ಪುನಗನೇ ಪೊಣ್ಣು ತನ್ನ ಅಮ್ಮೆರೆಡ ಫೋನ್ ಮಲ್ತ್ ಪಾತೆರ್ನ ಇಸಯೊಡು ಪಾತೆರೊಗು ಪಾತೆರ ಬುಲೆದ್ ಪೆಟ್ಟ್ ಪಾಡ್ದೆ. ಬೊಕ್ಕ ಪರಂಗಿಪೇಟೆದಲ್ಪ ಸಾದಿಬರಿಟ್ ಬೈಕ್‌ಡ್ ಬುಡ್ದ್ ಪೋತೆ.
ಪೊಣ್ಣು ಆಯಗ್ ಪಿರ ಕಾಲ್ ಮಲ್ತ್ಂಡಲಾ ದೆಪ್ಪಂದಿನೆರ್ದಾವರ ಅವ್ವೇ ಬೆಸರ್‌ಡ್ ಜೂವ ದೆತ್ತೊನುನ ನಿರ್ಧಾರೊಗು ಬತ್ತ್‌ದ್, ಪೋನ್‌ಡ್ ಇಲ್ಲದಕ್ಲೆಡ ಪಾತೆರ್ದ್ ವಿಷಯ ತೆರಿಪಾನಗ ಇಲ್ಲದಕುಲು ಎಂಚಾಂಡಲಾ ಧೈರ್ಯ ಪನ್ಡ್‌ದ್ ಇಲ್ಲಗ್ ಲೆತೊಂದು ಬತ್ತ್‌ದೆರ್. ಬೇತೆ ಪೊಣ್ಣನೊಟ್ಟುಗು ನಿಶ್ಚಯ ಆದಿತ್ತ್‌ದ್ ಆ ವಿಷಯೊನು ದೆಂಗಾದ್ ಮದಿಮೆ ಆಪೆ ಪನ್ದ್ ನಂಬಾದ್ ದೈಹಿಕ ಅಂಚೆನೇ ಮಾನಸಿಕವಾಗಿ ಕಿರುಕುಳ ಕೊರ್ತಿನತ್ತಂದೆ ಹಲ್ಲೆ ಮಲ್ತಿನಾಯನ ಮಿತ್ತ್ ಕ್ರಮ ಗೆತೊನೊಡು ಪನ್ಡ್‌ದ್ ಒಯಿಲ್ ಬರೆಪಾದೆರ್.
ಒಯಿಲ್ ಸ್ವೀಕರಿತಿನ ಕಡಬ ಪೊಲೀಸೆರ್ ಸುಳ್ಯಡ್ ಇತ್ತಿನ ಜವನನ್ ವಶೊಕು ಗೆತೊಂದು ಸ್ಟೇಷನ್‌ಗ್ ಲೆತೊಂದು ಪೋದು ವಿಚಾರಣೆ ಮಲ್ತ್‌ದೆರ್. ಬೊಕ್ಕ ನ್ಯಾಯಾಂಗ ಬಂಧನೊದ ಪ್ರಕ್ರಿಯೆ ಮಲ್ದೆರ್ ಪನ್ದ್ ತೆರಿದ್ ಬೈದ್ಂಡ್. ಆರೋಪಿನ ಮಿತ್ತ್ ಪೋಕ್ಸೋ, ಅಟ್ರಾಸಿಟಿ ಕಾಯ್ದೆಲೆನ ಅಡಿಟ್ ಪ್ರಕರಣ ದಾಕಲ್ತೊಂದೆರ್.