Last updated on February 24th, 2025 at 10:35 am
ಪುತ್ತೂರು: ಮುಲ್ಪದ ಪುತ್ತೂರು ಸಿಟಿ ಆಸ್ಪತ್ರೆರ್ದ್ ಶಾಕಿಂಗ್ ವಿಷಯ ಒಂಜಿ ಪಿದಯಿ ಬೈದ್ಂಡ್. ಸಿಸೇರಿಯನ್ ಆಪರೇಷನ್ ಮಲ್ತ್‌ದ್ ಸರ್ಜಿಕಲ್ ಕೈಕುಂಟು ಪೆದ್ದೊಲ್ತಿನ ಬಂಜಿಡೇ ಒರಿದ್, ಆರ್ ರಡ್ಡ್ ತಿಂಗೊಲು ರಣಬೇನೆಡ್ ಬಂಙ ಬೈದಿನ ನಡಕೆ ಪತ್ತೂರುರ್ದ್ ವರದಿ ಆತ್ಂಡ್.
ಗಗನ್‌ದೀಪ್ ಬಂಗಾರಡ್ಕ ಪನ್ಪಿನಾರ್ ತನ್ನ ಬೊಡೆದಿಗ್ ಬೊಕ್ಕ ಇಲ್ಲದಕುಲೆಗ್ ಆತಿನ ಈ ಮಾನಸಿಕ-ದೈಹಿಕ ಹಿಂಸೆದ ಬಗೆಟ್ ಪತ್ರಿಕಾಗೋಷ್ಟಿ ಬೊಕ್ಕ ಟ್ವಿಟರ್‌ಡ್ ಆರೋಪ ಮಲ್ದೆರ್.
ಗಗನ್‌ದೀಪ್ ತನ್ನ ದಿಂಜಿಬಂಜಿದ ಬೊಡೆದಿ ಶರಣ್ಯಲಕ್ಷ್ಮೀನ್ ಪುತ್ತೂರು ಸಿಟಿ ಆಸ್ಪತ್ರೆಗ್ ದಾಕಲ್ತ್‌ದಿತ್ತೆರ್. ಮೆರೆಗ್ 2024 ನೇ ನವೆಂಬರ್ 27ತಾನಿ ಡಾ. ಅನಿಲ್ ಎಸ್ ಸಿ- ಸೆಕ್ಷನ್ ಆಪರೇಷನ್ ಮಲ್ತಿತ್ತ್‌ದ್, ಡಿಸೆಂಬರ್ 2 ತಾನಿ ಡಿಸ್ಚಾರ್ಜ್ ಮಲ್ತಿತ್ತೆರ್.
ಡಿಸ್ಚಾರ್ಜ್ ಆತಿನ ವಾರೊದುಲಯಿ 104° ದಾತ್ ಜೋರು ಜ್ವರ ಇತ್ತ್‌ದ್, ಅವ್ವೇ ಡಾಕ್ಟರ್‌ನಡೆ ಪೋನಗ ಜ್ವರೊಕು ಮರ್ದ್ ಕೊರ್ತೆರ್, ಒಟ್ಟುಗು ತನ್ನ ಬಂಜಿಡ್ ಒಂಜಿ ಮರ್ಗಿಲ್‌ಡ್ ದಾದನೋ ಬೇನೆ ಉಂಡು ಪನ್ನಗ ಸುರುಕು ಗೋಸ್ಮರಿ ಮಲ್ತ್‌ದ್, ಬೊಕ್ಕ ಒತ್ತಾಯೊಡು ಅಲ್ಟ್ರಾಸೌಂಡ್ ಸ್ಕ್ಯಾನಿಂಗ್ ಮನ್ಪೆರ ಒತ್ತೊಂಡೆರ್.
ಸ್ಕ್ಯಾನಿಂಗ್ ರಿಪೋರ್ಟ್‌ಡ್ ಬಂಜಿದುಲಯಿ 10ಸೆಂ.ಮೀ. ದಾತ್ ಮಲ್ಲ ದಾದನ ಸೊತ್ತು ತೋಜಿದ್ ಬೈದ್ಂಡ್. ಉಂದೆನ್ ಎಂಕ್ಲೆಡ ಪನಂದೆ, ರಿಪೋರ್ಟ್ ತೂದು ಡಾಕ್ಟರ್ ಪನುವೆರ್ ಪನ್ದ್ ಡಾಕ್ಟರ್‌ನಡೆ ಕಡಪುಡ್ದೆರ್ ಪನ್ದ್ ಗಗನ್‌ದೀಪ್ ಪನ್ತೆರ್.
ರಿಪೋರ್ಟ್ ತೂಯಿನ ಡಾಕ್ಟರ್ ಅವು ಹೆಮಟೋಮಾ ಆದುಪ್ಪೊಡು, ಸರ್ಜರಿ ಆಯಿನಪಗ ಅಂಚ ಆಪುಂಡು, ಅವು ಐನಾತೆಗೆ ಕರವುಂಡು ಪನ್ದ್ ಪನ್ತೆರ್. ನನಲಾತ್ ಕ್ಲಿಯರ್ ಸ್ಕ್ಯಾನಿಂಗ್ ಮನ್ಪೆರೆ ಪನ್ನೆಕ್ ಎಂಕ್ಲೆಗೇ ಜೋರು ಮಲ್ತ್ ಇಲ್ಲಡೆ ಕಡಪುಡ್ದೆರ್.
ಉಂದಾಯಿನ ರಡ್ಡ್ ದಿನೊಟೇ ಶರಣ್ಯಲಕ್ಷ್ಮೀಗ್ ಲಕ್ಕ್‌ದ್ ಸಮ ನಡಪೆರಾವಂದಿನಾತ್ ಕೈ ಕಾರ್ ಬೇನೆ, ಗಂಟ್ ಬೇನೆ, ಬಂಜಿ ಬೇನೆ ಸುರು ಆತ್‌ನ್ಡ್. ಬುಲ್ತೊಂದುಪ್ಪುನ ಪುರುಬಾಲೆಗ್ ಲಕ್ಕ್‌ದ್ ಮಿರೆಪೇರ್ ಕೊರ್ಯೆರಾವಂದಿನ ಸ್ಥಿತಿಕ್ ಎತ್ತ್‌ದಿತ್ತಲ್. ಕುಡ ಡಾಕ್ಟರ್‌ನಡೆ ಪೋಯಿನೆಕ್ ಎಲುತ ಡಾಕ್ಟರ್‌ನಡೆ ಪೋಯೆರ ಪನ್ತೆರ್. ಎಲುತ ಡಾಕ್ಟರ್ ಮಲ್ಲ ಆಸ್ಪತ್ರೆದ ಆರ್ಥೆರೈಟಿಸ್ ಡಾಕ್ಟರ್‌ನಡೆ ಪೋಯೆರ ಪನ್ತೆರ್. ಅಲ್ಪ ಅಲ್ಟ್ರಾಸೌಂಡ್ ರಿಪೋರ್ಟ್ ತೋಜಾನಗ ಅಪ್ಪಗನೇ ಸಿಟಿ ಸ್ಕ್ಯಾನ್ ಮನ್ಪಾದೆರ್. ಅವೆಟ್ ಬಂಜಿದುಲಯಿ ಸರ್ಜಿಕಲ್ ಕೈಕುಂಟು (Surgical Mop) ಒರಿದಿನ ತೆರಿದ್ ಬೈದ್ಂಡ್.
ಆ ರಿಪೋರ್ಟ್‌ನ್ ಡಾಕ್ಟರ್ ಅನಿಲ್‌ಡ ತೋಜಾನಗ ಆರ್ ಒತ್ತೊನರೆಗೇ ರೆಡಿ ಇತ್ತಿಜೆರ್. ಅವು ಹೆಮಟೋಮಾ ನೆ ಆದುಪ್ಪೊಡು. ಆಪರೇಷನ್ ಮನ್ಪಂದೆ ಪನರೆ ಆಪುಜಿ ನ್ದ್ ಪನ್ತೆರ್ ಪನ್ದ್ ಗಗನ್‌ದೀಪ್ ಟ್ವಿಟರ್‌ಡ್ ಬರೆದ್ ಪಾಡ್ದೆರ್.
ಡಾಕ್ಟರ್ ಅನಿಲ್‌ನ ಮಿತ್ತ್ ಇತ್ತಿನ ಮಾತ ನಂಬಿಕೆ ಕಲೆಯೊಂದು ಎಂಕ್ಲ ಆ ಸರ್ಜಿಕಲ್ ಕೈಕುಂಟುನು ಸರ್ಜರಿ ಮಲ್ತ್‌ದ್ ದೆಪ್ಪಾದ. ಈ ಬಗೆಟ್ ಕಮ್ಪೆನ್ಸೇಷನ್ ಕೇನ್ನೆಕ್ ಒತ್ತೊನಂದೆ ನಿಕ್ಲೆನ ಮುಸುಂಟುಗು ಕಾಸ್ ದಕ್ಕುವೆ ಪನ್ದ್ ಪನ್ತೆರ್ ಪನ್ದ್‌ಲಾ ಬರೆಯೊಂದೆರ್.