Last updated on March 17th, 2025 at 08:07 am
ಕುಡ್ಲ, ಮಾ.16: ಅಪ್ರಾಪ್ತ ಪ್ರಾಯೊದ ಪೊಣ್ಣನ ಮಿತ್ತ್ ಅತ್ಯಾಚಾರ ಮಲ್ದಿನ ಅಪರಾಧಿಗ್ ಕುಡ್ಲದ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ ಎಫ್‌ಟಿಎಸ್‌ಸಿ -2 ಪೊಕ್ಸೋ ನ್ಯಾಯಂತಡೆ 20 ವರ್ಸೊದ ಕಠಿಣ ಶಿಕ್ಷೆ ಕೊರ್ದು ಶನಿವಾರ ತೀರ್ಪು ಕೊರ್ತುಂಡು.
ಮುಲ್ಕಿ ತಾಲೂಕು ಏಳಿಂಜೆ ನಿವಾಸಿ ರವಿ (35) ಶಿಕ್ಷೆ ಆತಿನ ಅಪರಾಧಿ.
ರವಿ 2023ತ ಜೂನ್ ತಿಂಗೊಲುರ್ದು ಡಿಸೆಂಬರ್‌ ಮುಟ್ಟ ಕಾರ್ಲ ತಾಲೂಕು ಇನ್ನಾ ಗ್ರಾಮೊದ ಬಾಡಾಯಿದಿಲ್ಲಡ್ ಇತ್ತೆ. ಈ ಪೊರ್ತುಡು ಆಯನ ಪಾಸಾಡಿನ ಮಗಲ್ ಮೂಲತಃ ಎಲ್ಯಮಗಲ್ನೂರು ಜಿಲ್ಲೆದ, 17 ವರ್ಸೊದ ಪೊಣ್ಣು ಪಿಯುಸಿ ಕಲ್ಪೆರ ಬತ್ತ್‌ದ್ ಆಯನ ಇಲ್ಲಡ್ ಉಂತುದಿತ್ತಲ್. ಆರೋಪಿ ರವಿ ಆಲೆನ್ 2023ತ ನವೆಂಬರ್‌ಡ್ ಕಾರ್ಲ ತಾಲೂಕು ಇನ್ನಾದ ಸಾದಿ ಬರಿತ ಗುಡ್ಡೆ ಜಾಗೆಗ್ ಲೆತೊಂದು ಪೋದು ಅತ್ಯಾಚಾರ ಮಲ್ತಿತ್ತೆ. ಅವೆರ್ದ್ ಬೊಕ್ಕ ಆಯೆ 2023ತ ಡಿಸೆಂಬರ್‌ರ್ದ್ ಬೊಕ್ಕ ಏಳಿಂಜೆಡ್ ಇತ್ತೆ. ಅಪಗ ಇಲ್ಲಡ್ ಪಾಕ ಸರ್ತಿ ಅತ್ಯಾಚಾರ ಮಲ್ತ್‌ದೆ. 2024ತ ಎ.11ತಾನಿ ಬಯ್ಯ ಏಳಿಂಜೆದ ಪಾಡಿ ಜಾಗೆಗ್ ಲೆತೊಂದು ಪೋದು ಅಲ್ಪಲಾ ಅತ್ಯಾಚಾರ ಮಲ್ತ್‌ದೆ ಪನ್ದ್ ಪನ್ತೆರ್. ಅಂಚಾದ್ ಪೊಣ್ಣು ಬಂಜಿನಾಲ್ ಆತಲ್. ಆರೋಪಿನ ಮಿತ್ತ್ ಮುಲ್ಕಿ ಸ್ಟೇಶನ್‌ಡ್ ಪ್ರಕರಣ ದಾಕಲಾದಿತ್ತ್ಂಡ್.
ನ್ಯಾಯಾಧೀಶೆ ಮಾನು ಕೆ.ಎಸ್. ಮೇರ್ ಆರೋಪಿಗ್ ಪೊಕ್ಸೋ ಕಾಯಿದೆದ ಕಲಂ 6 ಬೊಕ್ಕ ಐಪಿಸಿ 376(3) ಅಂಚೆನೇ 376(2)(ಎಫ್(ಎನ್) ಅಡಿಟ್ 20 ವರ್ಸೊದ ಕಠಿಣ ಶಿಕ್ಷೆ ಬೊಕ್ಕ 50,000 ರೂ. ದಂಡ ಪಾಡ್ದೆರ್. ಓಲ್ಲಾ ದಂಡ ಕಟ್ಟೆರಾಯಿಜಿಂಡ 4 ತಿಂಗೊಲ್ದ ಶಿಕ್ಷೆ ಕೊರ್ದು ತೀರ್ಪು ಕೊರ್ತೆರ್. ದಂಡೊದ ಕಾಸ್‌ನ್ ಪೊಣ್ಣಗ್ ಕೊರ್ಪಿಲೆಕ ಅಂಚನೇ ಕಾನೂನು ಸೇವಾ ಪ್ರಾಧಿಕಾರೊರ್ದು 6.50 ಲ.ರೂ. ಪರಿಹಾರೊನು ಪೊಣ್ಣಗ್ ಕೊರ್ಯೆರ ಆದೇಶ ಕೊರ್ತೆರ್.