Last updated on March 25th, 2025 at 08:31 am
ಮುಂಬಯಿ, ಮಾ. 24: ಪುಗರ್ತೆದ ಕ್ರಿಕೆಟರ್ ಕುಡ್ಲದ ಜವನೆ ಕೆ.ಎಲ್ ರಾಹುಲ್ರೆನ ಬೊಡೆದಿ ಅತಿಯಾ ಶೆಟ್ಟಿ ಸೋಮವಾರ (ಮಾರ್ಚ್ 24) ಪೊಣ್ಣು ಬಾಲೆನ್ ಪೆದ್ದ್ದೆರ್.
ಆತಿಯಾ ಶೆಟ್ಟಿ ಬಾಲಿವುಡ್ ನಟೆ ತುಳುವೆ ಸುನಿಲ್ ಶೆಟ್ರೆನ ಮಗಲ್. ಅಂಚಾದ್ ಸುನಿಲ್ ಶೆಟ್ಟಿ ಇತ್ತೆ ‘ಅಜ್ಜೆ’ ಆತೆರ್.

ಈ ಸುದ್ದಿನ್ ಅತಿಯಾ ಬೊಕ್ಕ ರಾಹುಲ್ ದಂಪತಿ ಇನ್ಸ್ಟಾಗ್ರಾಮ್ ಪೋಸ್ಟ್ ಡ್ ಪಟ್ಟೊಂದೆರ್. ಐಪಿಎಲ್ದ ಪೊರ್ತುಡು ಕ್ರಿಕೆಟರ್ ರಾಹುಲ್ ದಂಪತಿಗ್ ಎಡ್ಡೆಪ್ಪುಲೆನ ಬೊಲ್ಲನೇ ಬರೊಂದುಂಡು. ಡೆಲ್ಲಿ ಕ್ಯಾಪಿಟಲ್ಸ್ ಕೂಟೊಗು ಪೊಸತಾದ್ ಗೋಡ್ದಿನ ಕೆ.ಎಲ್ ರಾಹುಲ್, ವೈಯಕ್ತಿಕ ನೆವನೊರ್ದು ಸೋಮವಾರ ನಡತಿನ ಕೂಟೊದ ಸುರೂತ ಐಪಿಎಲ್ ಗೊಬ್ಬುರ್ದ್ ಪಿದಯಿ ಇತ್ತೆರ್.
ಕಡೀರ ಬಾಲೆದ ನಿರೀಕ್ಷೆಡ್ ಇತ್ತಿನ ವಿಕೆಟ್ ಕೀಪರ್ ಬ್ಯಾಟರ್, ವಿಶಾಖಪಟ್ಟಣಂದ ಡಾ. ವೈ.ಎಸ್. ರಾಜಶೇಖರ ರೆಡ್ಡಿ ಎಸಿಎ-ವಿಡಿಸಿಎ ಕ್ರಿಕೆಟ್ ಕ್ರೀಡಾಂಗಣೊಡು ನಡತಿನ ತನ್ನ ದುಂಬುದ ಫ್ರಾಂಚೈಸಿ ಲಕ್ನೌ ಸೂಪರ್ ಜಿಯಂಟ್ಸ್ (ಎಲ್ಎಸ್ಜಿ) ವಿರುದ್ಧೊದ ಗೊಬ್ಬುಡು ಗೊಬ್ಬೆರೆ ಆಪುಜಿ ಪನ್ದ್ ಡೆಲ್ಲಿ ಕ್ಯಾಪಿಟಲ್ಸ್ ಆಡಳಿತ ಮಂಡಳಿರ್ದ್ ವಿಶೇಷ ಅನು ಗೆತೊಂದಿತ್ತೆರ್.