ಕುಡ್ಲ : ಬೊಡೆದಿಗ್ ವಿಷ ಕೊರ್ದು ಕೆರ್ನ ಕಂಡನ್ಯಗ್ ಜೀವಾವಧಿ ಶಿಕ್ಷೆ; ದಾದ ಈ ಪ್ರಕರಣ?

Last updated on March 13th, 2025 at 09:03 am

ಕುಡ್ಲ: ಕುಡ್ಚೆಲೆ ಕಂಡನ್ಯಗ್ ಬುದ್ಧಿ ಪನೆರೆ ಬತ್ತಿನ ಬೊಡೆದಿನ ಮಿತ್ತ್ ಹಲ್ಲೆ ಮಲ್ತ್‌ದ್, ಕಡೆಕ್ ವಿಷ ತಿನ್ಪಾದ್ ಕೆರ್ತಿನ ನಡಕೆ 2022 ಟ್ ಕುಡ್ಲಡ್ ನಡತಿತ್ತ್ಂಡ್. ಇತ್ತೆ ಈ ಕೆರ್ತಿನ ಪ್ರಕರಣೊದ ಪ್ರಮುಖ ಆರೋಪಿ ತೀರ್ದಿನಾರೆನ ಕಂಡನಗ್ 3ನೇ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ ನ್ಯಾಯಾಧೀಶೆರ್ ಸಂಧ್ಯಾ ಎಸ್‌. ಜೀವಾವಧಿ ಶಿಕ್ಷೆದ ಆದೇಶ ಕೊರ್ತೆರ್.

ಉಳ್ಳಾಲ ತಾಲೂಕು ಸೋಮೇಶ್ವರ ಗ್ರಾಮೊದ ಜೋಸೆಫ್ ಫ್ರಾನ್ಸಿಸ್ ರೆನ್ಸನ್ ಆಲಿಯಾಸ್ ರೆನ್ಸನ್(53) ಶಿಕ್ಷೆ ಆತಿನ ಆರೋಪಿ. ಅಂಚೆನೇ ಬೊಡೆದಿ ಶೈಮಾ ತೀರ್ದಿನಾರ್.

ನಡಕೆದ ಒಲವು
ರೆನ್ಸನ್ ಮಲ್ಲ ಕುಡಿ ಆದಿತ್ತ್‌ದ್, ಜುಗಾರಿ ಅಂಚೆನೇ ಬೇತೆ ಬೊರ್ಚಂದಿನ ಚಟೊಕುಲು ಆಯಗ್ ಇತ್ತ. 2022ತ ಮೇ 11ತಾನಿ ಮಧ್ಯಾಹ್ನ ಶೈಮಾ ಇಲ್ಲಡ್ ಇಪ್ಪುನಗ ಕಂಡನ್ಯಗ್ ಬುದ್ದಿದ ಪಾತೆರ ಪನ್ತೆರ್. ಅವೆಕ್ ಪಿಸಿರಾಯಿನ ರೆನ್ಸನ್ ಶೈಮಾ ನ್ ಅದೆಟ್ ಪತ್ತ್‌ರ್ದ್ ಪಾಡ್ದ್ ಹಲ್ಲೆ ಮಲ್ತಿತ್ತೆ. ಮತಿ ತತ್ತಿತ್ತಿನ ಶೈಮಾ ವಿಷ ತಿನ್ತೆರ್ ಪನ್ದ್ ನಂಬಾಯೆರ ಇಲ್ಲಡ್ ತಗುಲೆಗ್ ಕನತಿನ ಮರ್ದ್‌ನ್ ಬಾಯಿಗ್ ಕಂಡನಿಯೇ ಮೈತಿತ್ತೆ. ಈ ನಡಕೆ ನಡಪುನಗ ಅಕ್ಲೆನ ಇರ್ವೆರ್ ಜೋಕುಲು ಇಲ್ಲಡೇ ಇತ್ತೆರ್. ಮತಿ ತತ್ತಿನ ಸ್ಥಿತಿಟ್ ಶೈಮಾ ನ್ ಜೋಕುಲು ರಿಕ್ಷಾ ಡ್ ದೇರಳಕಟ್ಟೆದ ಕೆ.ಎಸ್. ಹೆಗ್ಡೆ ಆಸ್ಪತ್ರೆಗ್ ದಾಕಲ್ತ್‌ದಿತ್ತೆರ್. ಆಂಡ ಮರ್ದ್ ಪಲಿಪಂದೆ ಶೈಮಾ ಅವ್ವೇ ದಿನ ರಾತ್ರೆ ತೀರ್ದಿತ್ತೆರ್.

ಸುರುಕು ಉಂದೊಂಜಿ ಆತ್ಮಹತ್ಯೆ ಪ್ರಕರಣ ಪನ್ದ್ ದಾಕಲಾದಿತ್ತ್ಂಡ್. ಅವ್ವೇ ಸಮ ಪನ್ಪಿಲೆಕ ಪ್ರತ್ಯಕ್ಷ ಸಾಕ್ಷಿದಾರೆರಾದಿತ್ತಿನ ತೀರಿನಾರೆನ ಜೋಕುಲಿರ್ವೆರ್ ಪೂರಕ ಸಾಕ್ಷಿ ಪನಂದೆ ಪ್ರತಿಕೂಲ ಸಾಕ್ಷಿ ಪಾಡ್ದಿತ್ತೆರ್. ಆಂಡ, ಬೈದ್ಯೆರ್ ಮಲ್ತಿನ ಮರಣೋತ್ತರ ಪರೀಕ್ಷೆಡ್ ಶೈಮಾ ನ ತರೆಕ್ ಜೋರುದ ಪೆಟ್ಟ್ ಬೂರ್ದ್ ತೀರ್ದೆರ್ ಪನ್ದ್ ತೆರಿದ್ಂಡ್. ಅಂಚಾದ್ ಅವ್ವೊಂಜಿ ಕೊಲೆ ಪನ್ದ್ ಸಾಬೀತ್ ಆದಿತ್ತ್ಂಡ್. ಬೊಕ್ಕ ಪೊಲೀಸೆರ್ ಜಡ್ತೆ ಮಲ್ತ್‌ದ್ ಆರೋಪಿ ಕಂಡನೆ ರೆನ್ಸನ್‌‌ನ್ ಪತ್ತ್‌ದ್ ವಿಚಾರಣೆ ಮಲ್ತ್‌ದೆರ್. ವಾದ ಪ್ರತಿವಾದ ಕೇನ್ಡಿನ ನ್ಯಾಯಾಧೀಶೆರ್ ಆರೋಪಿನ ಮಿತ್ತ್‌ದ ಅಪರಾಧ ಸಾಬೀತಾತ್ಂಡ್ ಪನ್ದ್ ತೀರ್ಮಾನ ಮಲ್ತ್‌ದ್ ಕೋಡೆ (ಮಾ.12) ಅಕೇರಿದ ತೀರ್ಪು ಕೊರ್ತೆರ್. ಐಪಿಸಿ ಕಲಂ 498(ಎ) ಅಡಟ್ ಅಪರಾಧೊಗು 3 ವರ್ಸ ಜೈಲ್ ಬೊಕ್ಕ 10,000 ರೂ. ದಂಡ, ಐಪಿಸಿ ಕಲಂ 302 ತ ಅಡಿಟ್ ಜೀವಾವಧಿ ಜೈಲ್ ಮತ್ತು 15,000 ರೂ. ದಂಡ ಬೊಕ್ಕ ಐಪಿಸಿ ಕಲಂ 201 ತ ಅಡಿಟ್ 3 ವರ್ಸ ಜೈಲ್ ಬೊಕ್ಕ 10,000 ರೂ. ದಂಡ ಪಾಡ್ದೆರ್.