Last updated on March 17th, 2025 at 07:54 pm
ಕುಡ್ಲ, ಮಾ. 17: ಕಾಡ ಪಂಜಿ ಒಂಜಿ ಒರಾನೆ ಸ್ಕೂಟರ್‌ಗ್ ಅಡ್ಡ ಬತ್ತಿನೆರ್ದಾವರ ಸ್ಕೂಟರ್‌ಡ್ ಇತ್ತಿನ ಪ್ರಾಯದಾರ್ ಒರ್ತಿ ಸಾದಿಗ್ ರಟ್ಟ್‌ದ್ ತೀರ್ದಿನ ನಡಕೆ ಹರೇಕಳ ಗ್ರಾಮೊದ ಖಂಡಿಗ ಪನ್ಪಿನಲ್ಪ ಕರಿನ ಸನಿಯಾರ ರಾತ್ರೆ ನಡತ್‌ದ್ಂಡ್.
ತೀರ್ದಿನಾರೆನ್ ದೇವಕಿ ಮಾಣೈ(72) ಪನ್ದ್ ಗುರ್ತ ಪತ್ತ್‌ದೆರ್. ವರದರಾಜ್ ಮಾಣೈ ಮೇರ್ ತನ್ನ ಅಪ್ಪೆ ದೇವಕಿ ಮಾಣೈ ಮೆರೆನ್ ಸನಿಯಾರ ರಾತ್ರೆ ಬಜಾಲ್‌ದ ಸಂಬಂಧಿಕೆರೆ ಇಲ್ಲರ್ದ್ ಸ್ಕೂಟರ್‌ಡ್ ಕುಲ್ಲಾವೊಂದು ಅಡ್ಯಾರ್-ಪಾವೂರುಡೆ ಆದ್ ಹರೇಕಳದ ಇಲ್ಲಗ್ ಬರೊಂದುಪ್ಪುನಗ ಖಂಡಿಗ ದಲ್ಪ ಪರ ಪಂಚಾಯತ್ ಕಟ್ವಾನೊದ ಬರಿತ ಗುಡ್ಡೆರ್ದ್ ಕಾಡ ಪಂಜಿ ಒಂಜಿ ಒರಾನೆ ರಸ್ತೆ ಸಾದೀಗ್ ಬಲ್ತೊಂದು ಬತ್ತ್‌ದ್ಂಡೊ. ಈ ಪೊರ್ತುಡು ಸ್ಕೂಟರ್ ಬುಡೊಂದಿತ್ತಿನ ವರದರಾಜ್ ಪೋಡಿದ್ ಒರಾನೆ ಬ್ರೇಕ್ ಪಾಡಿನೆರ್ದಾವರ ಅಪ್ಪೆ ಮಗೆ ಸಾದಿಗ್ ರಟ್ಟ್‌ದೆರ್. ಗಾತಿದ ಪೆಟ್ಟಾತಿನ ದೇವಕಿ ಮೆರೆನ್ ಹರೇಕಳದ ಕ್ಲಿನಿಕ್ ಒಂಜೆಟ್ ಕಡೀರ ಮರ್ದ್ ಮಲ್ತ್‌ದ್ ದೇರಳಕಟ್ಟೆದ ಪ್ರೈವೇಟ್ ಆಸ್ಪತ್ರೆಗ್ ದಾಕಲ್ತ್ಂಡಲಾ ಮರ್ದ್ ಪಲಿಪಂದೆ ತೀರ್ದೆರ್.
ತೆನ್ಕಾಯಿ ಕುಡ್ಲ ಟ್ರಾಫಿಕ್ ಸ್ಟೇಷನ್‌ಡ್ ಪ್ರಕರಣ ದಾಕಲಾತ್ಂಡ್.