Last updated on March 6th, 2025 at 12:09 pm
ಬೆಂಗಳೂರು: ಪದಿನಾಲ್ ವರ್ಸೊಗು ದುಂಬು ಕುಡುಮಡ್ ನಡತಿತ್ತಿನ ಕುಮಾರಿ ಸೌಜನ್ಯಾ ಅತ್ಯಾಚಾರ ಬೊಕ್ಕ ಕೆರ್ತಿನ ಪ್ರಕರಣ ಕುಡ ಎದುರ್ನಿಲೆಕ್ ಬೈದ್ಂಡ್. ಯೂಟ್ಯೂಬರ್ ಸಮೀರ್ ಪನ್ಪಿನಾಯೆ ಮಲ್ದಿನ ವಿಡಿಯೋ ಭಾರೀ ವೈರಲ್ ಆದಿತ್ತ್‌ದ್, ಇತ್ತೆ ಸಾಮಾಜಿಕ ಬಲೆತ್ತಾನೊಡು ಭಾರಿ ಚರ್ಚೆಗ್ ನೆವನ ಆತ್ಂಡ್.
ಗಿರೀಶ್ ಮಟ್ಟಣ್ಣನವರ್‌ ಮೆರೆನ ಒಟ್ಟುಗು ಲಾಯರ್ ಆಫೀಸ್‌ಡ್ ಕುಲೊಂದು ಪೋಲೀಸೆರ್ ತನ್ಕ್ ನೋಟೀಸ್ ಕೊರ್ತಿನ ಇಸಯೊನು ಸಮೀರ್ ಪಟ್ಟೊಂದೆರ್. ಯಾನ್ ದಾಲ ತಪ್ಪು ಮಲ್ದಿಜಿ, ಯಾನ್ ಪನ್ತಿನ ಮಾತೆಕ್ಲಾ ಪುರಾಪು ಕೊರ್ಪೆ ಪನ್ದ್ ಪನ್ತೆರ್.
ವೀಡಿಯೋ ವೈರಲ್ ಆಯಿನ ಬೆರಿಟೇ ಲಕ್ಕೊಂದಿನ ರಾಜ್ಯ ಕಾನೂನು ಸುವ್ಯವಸ್ಥೆದ ಎಡಿಜಿಪಿ ಹಿತೇಂದ್ರೆರ್, ಜಿಲ್ಲಾ ಪೊಲೀಸ್ ವಿಭಾಗೊಡು ಉಂಡು ಮಲ್ದಿನ ಸಾಮಾಜಿಕ ಬಲೆತ್ತಾನೊಲೆನ ನಿಗಾ ಘಟಕೊಲೆನ್ ಅಲರ್ಟ್ ಮನ್ಪೆರ ಮಾತಾ ಪೊಲೀಸ್ ವರಿಷ್ಠಾಧಿಕಾರಿಲೆಗ್ ಸೂಚನೆ ಕೊರ್ತೆರ್.
ಸಮೀರ್ ಮಲ್ದಿನ ವಿಡಿಯೋದ ಬಗೆಟ್ ಮಿತ್ತ್‌ದ ಅಧಿಕಾರಿಲೆನ ಗೇನೊಗು ಕನವಂದೆ ಸಾಮಾಜಿಕ ಬಲೆತ್ತಾನೊಲೆನ ಮಿತ್ತ್ ನಿಗಾ ಘಟಕೊಲು ಗೋಸ್ಮರಿ ಮಲ್ತ್‌ದ. ಈ ವಿಡಿಯೋದ ಬಗೆಟ್ ಸಾಮಾಜಿಕ ಬಲೆತ್ತಾನೊಡು ಭಾರೀ ಪರ – ವಿರೋಧದ ಚರ್ಚೆ ಉಂಡಾತ್ಂಡ್. ಉಂದೆರ್ದಾವರ ಕಾನೂನು ಸುವ್ಯವಸ್ಥೆ ಹಾಳಾಪಿನ ಸಾಧ್ಯತೆ ಉಂಡು ಪನ್ದ್ ಎಡಿಜಿಪಿ ಎಚ್ಚರ್ಗೆದ ಸೊಲ್ಲಂಜ ಕಡಪುಡ್ದೆರ್.
ಈ ದಿಸೆಟ್ ಮಾತಾ ಪೊಲೀಸ್ ಘಟಕೊಲೆನ ಸಾಮಾಜಿಕ ಬಲೆತ್ತಾನೊದ ನಿಗಾ ಘಟಕೊಲು ಅಲರ್ಟ್ ಆದ್ ಬೇಲೆ ಮಲ್ಪೊಡು ಪನ್ದ್ ರಾಜ್ಯ ಕಾನೂನು ಸುವ್ಯವಸ್ಥೆ ಎಡಿಜಿಪಿ ಹಿತೇಂದ್ರೆ ಸೂಚನೆ ಕೊರ್ತೆರ್.