ಬಸ್ರೂರ್ ತುಳುವೇಶ್ವರ ದೇವಲ್ಯೊಡು ಪ್ರಶ್ನಾ ಚಿಂತನೊಡ್ ತೋಜಿದ್ ಬತ್ತಿನ ಸಂಗತಿಲು

Last updated on March 24th, 2025 at 02:20 pm

ಬಸ್ರೂರ್: ಕುಂದಾಪುರ ತಾಲೂಕ್‌ದ ಬಸ್ರೂರ್‌ದ ಶ್ರೀ ತುಳುವೇಶ್ವರ ದೇಲಂತಡೆದ ಅಭಿವೃದ್ಧಿ ಆಂಡ ಇಡೀ ತುಳುನಾಡ್‌ಗೇ ಎಡ್ಡೆ ಆಪುಂಡು ಪನ್ದ್ ಶ್ರೀ ಕ್ಷೇತ್ರೊಡು ಮಾ.22 ಐತಾರ ನಡತಿನ ತಾಂಬೂಲ ಪ್ರಶ್ನಾ ಚಿಂತನೆಡ್ ತೋಜಿದ್ ಬೈದ್‌ಂಡ್.

ದೈವಜ್ಞೆರ್ ಜ್ಯೋತಿಷ್ಯ ತಿಲಕಂ ಶಶಿಧರ ಮಾಂಗಾಡ್ ಮೇರ್ ಕೇಮಾರು ಶ್ರೀ ಶ್ರೀ ಈಶ ವಿಠಲ ದಾಸ ಸ್ವಾಮೀಜಿ ಮೆರೆನ ಉಪಸ್ಥಿತಿಡ್ ಪ್ರಶ್ನಾಚಿಂತನೊ ನಡಪಾದ್ ಕೊರಿಯೆರ್.

ತಾಂಬೂಲ ಚಿಂತನೆದ ಪ್ರಕಾರ ಅಖಂಡ ತುಳುನಾಡ್‌ದ ಜನಪದ ಸಂಸ್ಕೃತಿ ಬೊಕ್ಕ ಆಚಾರ ವಿಚಾರೊಲಿತ್ತಿನ ಅಂಚೆನೆ ತುಳುನಾಡ್‌ದ ಪೂರ್ವ ಪರಂಪರೆನ್ ದೆರ್ತ್ ತೋಜಾದಿನ ಸಾನಿಧ್ಯ ಈ ತುಳುವೇಶ್ವರನವು.

ಇಡೀಯ ಏಕೀಕೃತ ತುಳುನಾಡೇ ತುಳುವೇಶ್ವರನ ಸೀಮೆಡ್ ಉಂಡುಗೆ. ತೌಲವೇಶ್ವರಿ ಬೊಕ್ಕ ಪಂಜುರ್ಲಿ ದೈವ ಸಹಿತ ಪರಿವಾರ ದೈವ ದೇವರೆನ ಆರಾಧನೆ ಪಾಕ ಸಮೆರ್ದಿಂಚಿ ನಡತೊಂದಿಜ್ಜಿ. ಆಂಡಲಾ ತುಳುನಾಡ್‌ದ ಪ್ರತಿ ಇಲ್ಲಡ್‌ ಬೇತೆ ಬೇತೆ ರೂಪೊಡು ಆರಾಧನೆ ನಡತೊಂದುಪ್ಪುನೆರ್ದಾವರ ಈ ದೈವ ದೇವೆರ್ನ ಆಶೀರ್ವಾದ ತಿಕೊಂದುಂಡು. ಈ ಆರಾಧನಾ ಸಂಸ್ಕೃತಿನ್ ಪಿರ ಸ್ಥಾಪನೆ ಮಲ್ತ್‌ಂಡ ತುಳುನಾಡ್‌‌ದ ಪ್ರತಿಯೊರಿಯಗ್‌ಲ ಎಡ್ಡೆ ಆಪುಂಡು ಪನ್ದ್ ಪ್ರಶ್ನೆ ಚಿಂತನೆಡ್ ತೋಜಿದ್ ಬೈದ್ಂಡ್.

ಈ ದೇಲಂತಡೆ ಕುಡೊರ ವೈಭವೊಡು ಮೆರೆಪಿನೆಕ್ ತುಳುನಾಡ್‌ದ ಪ್ರತಿಯೊರಿಲ ಸಾಕ್ಷಿ ಆವೊಡು. ಒರಿಯೇ ವ್ಯಕ್ತಿ ಈ ಕ್ಷೇತ್ರ ಜೀರ್ಣೋದ್ದಾರ ಮಲ್ಪರೆ ದುಂಬು ಬರ್ಪೆರ್. ಆಂಡ ತುಳುನಾಡ್‌ ಪ್ರತಿಯೊರಿಯನಲ ಕೊರ್ಪುಗೆನ್ ದೇಬೆರ್ ಬಯಕ್‌ದೆರ್.

ಅಯಿಕ್ ಬೋಡಾದ್ ನನ ದುಂಬುದ ಅಷ್ಟಮಂಗಳ ಪ್ರಶ್ನಾ ಚಿಂತನೆರ್ದ್ ದುಂಬು ಪ್ರತಿಯೊರಿಯಗ್ಲಾ ಈ ವಿಚಾರ ಮುಟ್ಟೊಡು. ಅಂಚೆನೆ ಪ್ರತಿಯೊರಿಲ ಈ ಬೇಲೆಡ್ ಕೈ ತಾಂಗ್ ಕೊರ್ದು ಶಾಶ್ವತವಾದ್ ಪಾಲ್ ಪಡೆಪಿನ ಬಗೆಟ್ ಖಾತರಿ ಮಲ್ತೊನೊಡು ಪನ್ದ್ ಪ್ರಶ್ನೆ ಚಿಂತನೆಡ್ ಗೊತ್ತಾತ್‌ಂಡ್. ಈ ಬಗೆಟ್ ಬೇಲೆ ಮಲ್ಪರೆ ತುಳುವರ್ಲ್ಡ್ ಫೌಂಡೇಶನ್ ಬೊಕ್ಕ ಮಾತ ತುಳುಕೂಟ ಬೊಕ್ಕ ಸಂಘ ಸಂಸ್ಥೆಲೆನ ಮುತಾಲಿಕೆಡ್ ತುಳುನಾಡ್‌ದ ಪ್ರತಿ ಗ್ರಾಮಡ್ ಅಂಚೆನೆ ಓಲು ಮಾತ ತುಳುವೆ‌ರ್ ಉಲ್ಲೆರಾ ಅಲ್ಪಲ್ಪ ತುಳುವ ಮಹಾಸಭೆ ಮಲ್ತ್‌ ಕೆಲಸ ಸುರು ಮಲ್ಪರೆ ಪ್ರಶ್ನೆ ಚಿಂತನೆಡ್ ಅನು ತಿಕ್‌ಂಡ್.

ಅಂಚಾದ್ ಪ್ರತಿಯೊರಿಲ ಪ್ರತಿಯೊರಿಯಡಲ ಈ ಬಗೆಟ್ ಜಾಗೃತಿ ಪುಟ್ಟಾದ್ ಈ ಮಲ್ಲ ಬೇಲೆನ್ ಯಶಸ್ವಿ ಮಲ್ಪುನ ನಿಲೆಟ್ ನಮ್ಮ ನಮ್ಮ ಊರುಡು ಈ ಬಗ್ಗೆ ಸಮಿತಿ ರಚನೆ ಮಲ್ಪರೆ ದುಂಬಾವೊಡು ಪಂದ್ ತುಳು ವರ್ಲ್ಡ್ ಫೌಂಡೇಶನ್ ಬಿನ್ನಪು ಮಲ್ಡ್‌ಂಡ್.

Leave a Reply

Your email address will not be published. Required fields are marked *

Share
error: Content is protected !!