Last updated on March 29th, 2025 at 08:20 am
ಬೊಲ್ತೇರ್, ಮಾ. 29: ಕರ್ನಾಟಕಡ್ ಎಸ್ಎಸ್ಎಲ್‌ಸಿ ಪರೀಕ್ಷೆ ನಡತೊಂದುಂಡು. ಆಂಡ 100 ಪರ್ಸೆಂಟ್‌ ರಿಸಲ್ಟ್‌ದ ಆಸೆಗ್ ಬೊಲ್ತೇರ್‌ದ ಒಂಜಿ ಸರ್ಕಾರಿ ಶಾಲೆ ತಪ್ಪು ಸಾದಿ ಪತ್ತ್‌ದ್ಂಡ್. ಇರ್ವೆರ್ ಎಸ್ಎಸ್ಎಲ್‌ಸಿ ವಿದ್ಯಾರ್ಥಿನಿಯೆರೆಗ್ ಪರೀಕ್ಷೆಗ್ ಕುಲ್ಲೆರೆ ಬುಡಂದೆ ಜೋಕುಲೆನ ಭವಿಷ್ಯದ ಒಟ್ಟುಗು ಗೊಬ್ಬೊಂದುಂಡು.
ಕಲ್ಪುನೆಟ್ ಪಿರವು ಉಲ್ಲೆರ್ ಪನ್ದ್ ನೆವನ ಕೊರ್ದು ಇರ್ವೆರ್ ಪೊಣ್ಣುಲೆಗ್ SSLC ಪರೀಕ್ಷೆ ಬರೆಯೆರ ಅವಕಾಶೊನೇ ಕೊರ್ತಿಜೆರ್‌ಗೆ. ಬೊಲ್ತೇರ್ ತಾಲೂಕ್‌ದ ಪದ್ಮುಂಜ ಸರ್ಕಾರಿ ಪ್ರೌಢ ಶಾಲೆ ಜೋಕುಲೆನ ಭವಿಷ್ಯೊದ ಒಟ್ಟುಗು ಗೊಬ್ಬೊಂದುಂಡು.
ಮುಖ್ಯ ಶಿಕ್ಷಕೆರ್ 100% ಫಲಿತಾಂಶ ಬರೊಡು ಪನ್ಪಿನ ದುರುದ್ದೇಶೊರ್ದಾವರ ಕಲ್ಪುನೆಟ್ ಪಿರವು ಇತ್ತಿನ ಇರ್ವೆರ್ ವಿದ್ಯಾರ್ಥಿನಿಯೆರೆಗ್ ಹಾಲ್ ಟಿಕೆಟ್ ಕೊರ್ತಿಜೆರ್. ಅಂಚೆನೇ ಎಂಕ್ಲೆನ ಜೋಕುಲೆನ ಭವಿಷ್ಯೊಡು ಗೊಬ್ಬೊಂದುಲ್ಲೆರ್ ಪನ್ದ್ ಅಪ್ಪೆಅಮ್ಮೆ ಆರೋಪ ಮಲ್ತ್‌ದೆರ್.
ಇಂಚಿರ್ದ್ ಈ ವಿದ್ಯಾರ್ಥಿನಿಯೆರ್ ಕ್ಷೇತ್ರ ಶಿಕ್ಷಣಾಧಿಕಾರಿ, ಡಿಡಿಪಿಐ, ಜೋಕ್ಲೆನ ಹಕ್ಕ್ ಕಾಪುನ ಆಯೋಗ, ರಾಜ್ಯ ಎಸ್ಡಿಎಂಸಿ ಸಮನ್ವಯ ವೇದಿಕೆಗ್ ಓಲೆ ಬರೆದ್ ನ್ಯಾಯೊಗು ಆಗ್ರಹ ಮಲ್ದೆರ್. ಉಂದೆತ ಬೆರಿಟೇ ಕೋಡೆ ಶಾಲೆಗ್ ಬತ್ತಿನ ಬಿಇಓ ಹಾಲ್ ಟಿಕೆಟ್ ಕೊರ್ಪಾದಿತ್ತ್‌ದ್, ಒರಿನ ಪರೀಕ್ಷೆ ಬರೆಯೆರೆ ಅವಕಾಶ ಮಲ್ತ್ ಕೊರ್ತೆರ್. ಅತ್ತಂದೆ ಈ ಬಗೆಟಾ ಜಡ್ತೆ ಮನ್ಪುವ ಪನ್ದ್ ಬಿಇಒ ಪನ್ತೆರ್.