Last updated on March 13th, 2025 at 07:10 pm
ಕುಡ್ಲ, ಮಾ. 13: ಗೆಜ್ಜೆಗಿರಿ ಕ್ಷೇತ್ರೊಡು ನಡತಿನ ವರ್ಷಾವಧಿ ಜಾತ್ರೆದ ಪೊರ್ತುಡು ಮಟ್ಟೆಲ್ ದಿಂಜಾವುನ ಸೇವೆಗ್ ಕುಡ್ಲದ ಕುಂಟುದಂಗಡಿ ಪರ ಪರ್ಕಟೆ ಸೀರೆಲೆನ್ ಕಡಪುಡ್ದಿನ ನಡಕೆ ನಡತಿತ್ತ್‌ದ್, ಇನಿ ಕುಡ್ಲಡ್ ಇಪ್ಪುನ ಆ ಕುಂಟುದಂಗಡಿದ ಎದುರೇ ಪರ ಸೀರೆಲೆನ್ ರಾಶಿ ಪಾಡ್ದ್ ಪೊಂಜೊವುನಕುಲು ಆಕ್ರೋಶ ತೂಪಾಯೆರ್.
ಮಾರ್ಚ್ 1 ರ್ದ್ 5 ಮುಟ್ಟ ನಡತಿನ ಜಾತ್ರೆಡ್ ಈ ಸರ್ತಿ ಮಟ್ಟೆಲ್ ದಿಂಜಾವುನ ಕಾರ್ಯಕ್ರಮ ಅಟ್ಟನೆ ಮಲ್ತಿತ್ತೆರ್. ಈ ಮಟ್ಟೆಲ್ ದಿಂಜಾವುನ ಸೇವೆಗ್ ಕುಡ್ಲದ ಎಂ ಪಿ ಸಿಲ್ಕ್ ಪನ್ಪಿನ ಕುಂಟುದಂಗಡಿರ್ದ್ ಸೀರೆಲೆನ್ ದೆತೊಂದಿತ್ತೆರ್. ಎಂ.ಪಿ ಸಿಲ್ಕ್ ಸಂಸ್ಥೆ 8000 ಸೀರೆಲೆನ್ ಕೊರ್ದಿತ್ತ್‌ದ್ ಅವೆಟ್ 75 % ಪರ ಸೀರೆಲು ಪನ್ದ್ ಭಕ್ತೆರ್ ಆರೋಪ ಮಲ್ದೆರ್. ಈ ಸೀರೆಲೆನ ಅಮೌಂಟ್ ₹ 9,78,925 ಆತ್ಂಡ್. ಆಂಡ ಈತ್ ಕಾಸ್‌ಗ್ ಕೊರ್ತಿನ ಸೀರೆ ಪರಿದ್ ಪೋದಿತ್ತ್‌ದ್ ಕೊರ್ತಿನ ಕಾಸ್‌ಗ್ ಸಮಗಟ್ಟ್‌ದ ಎಡ್ಡೆ ಗುಣಮಟ್ಟೊದ ಸೀರೆ ಕೊರೊಡು ಪನ್ದ್ ಅಂಗಡಿದ ದನಿನ್ ತರಾಟೆಗ್ ಗೆತೊಂದೆರ್.
ದೈವೊದ ಪುರ್ಸದ ಪನ್ದ್ ದೆತೊಂದು ಪೋದಿತ್ತಿನ ಪೊಂಜೊವುಲು ಇಲ್ಲಡ್ ತೂನಗ ಅವು ಪರ ಕುಂಟು ಪನ್ದ್ ತೆರಿದ್ ಪೊಂಜೊವುಲು ಪಿಸಿರಾದಿತ್ತೆರ್. ಬೊಕ್ಕ ಈ ಬಗೆಟ್ ಅಂಗಡಿದ ದನಿಕ್ ತೆರಿಪಾದಿತ್ತ್‌ದ್, ತಪ್ಪು ಒತ್ತೊಂದಿತ್ತೆರ್.
ಉಂದೆತ ಪಗತೆಗ್ ಬೇತೆ ಸೀರೆ ಕೊರ್ಪೆ ಪನ್ದ್ ಪಾತೆರ ಕೊರ್ದಿತ್ತೆರ್. ಆಂಡ ಪಿರ ಕೊರ್ತಿನ ಸೀರೆಲಾ ಏರೋ ತುತ್ತುದು ಕೊರ್ಲೆಕ, ಸಂತೆಡ್ ಮಾರುನ ಪರಿನ ಸೀರೆ ಲೆಕ ಇತ್ತ್ಂಡ್ .ಉಂದೆನ್ ಅಂಗಡಿದ ದನಿಕ್ ಪನ್ಡಲಾ ಗೆನ್ತಿನೇ ಇಜ್ಜೆರ್. ಅಂಚಾದ್ ಕುಡ್ಲದ ಎಂ.ಪಿ ಸಿಲ್ಕ್ ಅಂಗಡಿದ ಎದುರು ಸೀರೆನ್ ಸಾದಿಡ್ ದೊರಿತ್‌ದ್ ಭಕ್ತೆರ್ ಆಕ್ರೋಶ ತೂಪಾದೆರ್.