Last updated on April 1st, 2025 at 02:10 pm
ಬೆಂಗಳೂರು, ಏ. 1: ಪ್ರಿ ಸ್ಕೂಲ್‌ಗ್ ಬರೊಂದಿತ್ತಿನ ಜೋಕುಲೆನ ಅಮ್ಮಗೇ ಮುತ್ತು ಕೊರ್ದು ಹನಿಟ್ರ್ಯಾಪ್ ಮಲ್ತಿನತ್ತಂದೆ, 50 ಸಾರ ರೂನ್ ಟೀಚರ್ ಒರ್ತಿ ಬೊರಿತಲ್. ಕೂಡ ಪೋಡಾಕಟ್ಟಾದ್ ಒಂಜಿ ಲಕ್ಷ ರೂಪಾಯಿಗ್ಲಾ ಎಚ್ಚಿನ ಕಾಸ್ ಪೀಂಕಾದಿನತ್ತಂದೆ, ಕುಡ ಕಾಸ್ ಪೀಂಕಾಯೆರ ತೂವೊಂದಿತ್ತಿನ ಟೀಚರ್ ಬೊಕ್ಕ ಗ್ಯಾಂಗ್ ಅತ್ತೆ ಪೊಲೀಸೆರೆ ಬೇಪುಗು ಬೂರ್ದ್ಂಡ್. ಬೆಂಗಳೂರ್‌ದ ಮಹಾಲಕ್ಷ್ಮಿ ಲೇಔಟ್‌ಡ್ ಪ್ರೈವೇಟ್ ಪ್ರೀಸ್ಕೂಲ್ ನಡಪಾವೊಂದಿತ್ತಿನ ಶ್ರೀದೇವಿ ರುಡಿಗಿ ಪನ್ಪಿನಾಲ್ ಹನಿಟ್ರ್ಯಾಪ್ ಮಲ್ದಿನ ಟೀಚರ್.
ಆರೋಪಿ ಶ್ರೀದೇವಿ ರುಡಿಗಿಗ್ 2023 ಟ್ ರಾಕೇಶ್ ಪನ್ಪಿನ ಪೋಷಕನ ಗುರ್ತ ಆದಿತ್ತ್ಂಡ್. ರಾಕೇಶ್‌ಡ ಶಾಲೆದ ಬೇಲೆಗ್, ಅಮ್ಮೆರೆನ ಮರ್ದ್‌ಗ್ ಪನೊಂದು ಶ್ರೀದೇವಿ 4 ಲಕ್ಷ ರೂ. ಕಡ ಗೆತೊಂದಿತ್ತಲ್. 2024ತ ಮಾರ್ಚ್‌ಡ್ ಪಿರ ಕೊರ್ಪೆ ಪನ್ದ್‌ಲಾ ಪನ್ದಿತ್ತಲ್. ಆಂಡ, ಕಾಸ್ ಪಿರ ಕೊರ್ದಿಜ್ಜಂಡ್. ಕೇನೆರ ಪೋನಗ ‘ಬಾರೀ ಬಂಙೊಡುಲ್ಲೆ. ಕಾಸ್ ಇತ್ತೆ ಕೊರ್ರ ಆಪುಜಿ. ಈರ್ ಶಾಲೆದ ಪಾರ್ಟನರ್ ಆಲೆ’ ಪನ್ದಿತ್ತಲ್. ಅವೆರ್ದ್ ಬೊಕ್ಕ ಇರ್ವೆರೆ ನಡುಟು ಎಡ್ಡೆಪ್ಪು ಬುಲೆದ್ಂಡ್. ಇರ್ವೆರ್ಲಾ ಒಟ್ಟೊಟ್ಟುಗು ತಿರ್ಗೊಂದಿತ್ತೆರ್. ಶ್ರೀದೇವಿ‌ಡ ಪಾತೆರ್ಯೆರ ಬೋಡಾದೇ ರಾಕೇಶ್ ಪೊಸ ಸಿಮ್ ಬೊಕ್ಕ ಪೋನ್ ಗೆತೊಂದಿತ್ತೆ. ಆಂಡ, ಅವೆರ್ದ್ ಬೊಕ್ಕ ಜನವರಿದ ಸುರುತ ವಾರೊಡು ಕಾಸ್ ಪಿರ ಕೇನ್ದೆ. ಕಾಸ್ ಕೇನ್ಡಿನ ರಾಕೇಶ್‌ಗ್, ‘ನಿನ್ನ ಒಟ್ಟುಗು ರಿಲೇಶನ್ ಶಿಪ್‌ಡ್ ಇಪ್ಪುವೆ’ ಪನ್ದ್ ಪನ್ದಿತ್ತಿನ ಶ್ರೀದೇವಿ 15 ಲಕ್ಷ ರೂ. ಕಾಸ್ ಕೇನ್ದಿತ್ತಲ್. ಇಂದೆಕ್ ರಾಕೇಶ್ ಒತ್ತೊಂದಿಜೆ.
ಬೊಕ್ಕ ಶ್ರೀದೇವಿ ಪೋಷಕೆ ರಾಕೇಶ್‌ನ ಇಲ್ಲಗ್ ಪೋದು ಆಯಗ್ ಮುತ್ತು ಕೊರ್ದಿತ್ತಲ್. ಅವೆರ್ದ್ ಬೊಕ್ಕ ಬ್ಲ್ಯಾಕ್ಮೇಲ್ ಮಲ್ತ್‌ದ್ 50 ಸಾವಿರ ರೂ. ಗೆತೊಂದಲ್ ಪನ್ದ್ ಪೊಲೀಸೆರೆಡ ಬರೆಪಾದಿನ ಒಯಿಲ್‌ಡ್ ದಾಕಲಾತ್ಂಡ್. ಅವೆರ್ದ್ ಬೊಕ್ಕ, ಗಡೀ ಗಡಿ ಕಾಸ್ ಕೇನೊನ್ದಿತ್ತಿನೆರ್ದಾವರ ಆಲೆಡ ಪಾತೆರೊಂದಿತ್ತಿನ ಸಿಮ್‌ನ್ ರಾಕೇಶ್ ಪೊಲ್ತ್ ದಕ್ಕ್‌ದಿತ್ತೆ.
ಮಾರ್ಚ್ 12 ತಾನಿ ರಾಕೇಶ್‌ನ ಬೊಡೆದಿಗ್ ಕಾಲ್ ಮಲ್ತಿನ ಶ್ರೀದೇವಿ , ಜೋಕುಲೆನ ಸ್ಕೂಲ್ ಟಿಸಿ ಕಡಪುಡ್ವೆ, ಈರೆನ ಕಂಡನ್ಯನ್ ಕಡಪುಡ್ಲೆ ಪನ್ದಿತ್ತಲ್. ಆ ಪ್ರಕಾರ ಶ್ರೀದೇವಿನ ಪ್ರೀ ಸ್ಕೂಲ್‌ಗ್ ರಾಕೇಶ್ ಪೋದಿತ್ತೆ. ಅಪಗ ಅಲ್ಪ ಶ್ರೀದೇವಿನ ಒಟ್ಟುಗು ಇತ್ತಿನ ಬೇತೆ ಆರೋಪಿಲಾಯಿನ ಸಾಗರ್ ಬೊಕ್ಕ ಗಣೇಶ್ ಪೋಡಿಕಟ್ಟಾದೆರ್. ‘‘ಸಾಗರ್‌ನ ಒಟ್ಟುಗು ಶ್ರೀದೇವಿಗ್ ನಿಶ್ಚಯ ಆತ್ಂಡ್. ಆಂಡ ಈ ಆಲೆನೊಟ್ಟುಗು ತಿರ್ಗೊಂದುಲ್ಲ’’ ಪನ್ಜ್ ಆರೋಪಿ ಗಣೇಶ್ ಪನ್ತೆ. ಬೊಕ್ಕ ಕಾರ್‌ಡ್ ಕುಲ್ಲಾದ್, ‘‘ಏರೆಡಲಾ ಈ ವಿಚಾರ ಪನರೆ ಬಲ್ಲಿಂದಾಂಡ 1 ಕೋಟಿ ರೂ. ಕೊರು’’ ಪನ್ದ್ ಬ್ಲ್ಯಾಕ್ಮೇಲ್ ಮಲ್ತಿತ್ತೆ. ಕಡೇಕ್ ಆರೋಪಿಲು 20 ಲಕ್ಷ ರೂ.ಗ್ ಕಾಯೆಸ್ ಮಲ್ದಿತ್ತ್‌ದ್, 1.90 ಲಕ್ಷ ರೂ. ಕಾಸ್ ಗೆತೊಂದು ಬುಡ್ದು ಕಡಪುಡ್ದೆರ್. ಆಂಡ, ಒರಿನ ಕಾಸ್ ಕೊರ್ಜಿಂಡ ಕೆರ್ಪ ಪನ್ದ್ ಪೋಡಿಕಟ್ಟಾದೆರ್ ಪನ್ದ್ ರಾಕೇಶ್ ಆರೋಪ ಮಲ್ತ್‌ದೆ.
ಈ ಬಗೆಟ್ ರಾಕೇಶ್ ಸಿಸಿಬಿ ಪೊಲೀಸೆರೆಗ್ ದೂರು ಕೊರ್ದಿತ್ತೆ. ಈ ದೂರುದ ಪ್ರಕಾರ ಶ್ರೀದೇವಿ, ಅರುಣ್ ಬೊಕೂ ಸಾಗರ್‌ನ್ ಅರೆಸ್ಟ್ ಮಲ್ದೆರ್. ಇತ್ತೆ ಆರೋಪಿಲೆನ್ ಎಚ್ಚಿನ ವಿಚಾರಣೆಗ್ ಸಿಸಿಬಿ ಪೊಲೀಸೆರ್ ಕಸ್ಟಡಿಗ್ ಗೆತೊಂದೆರ್. ಮೂವೆರ್ ಆರೋಪಿಲುಲಾ ವಿಜಯಪುರ ಮೂಲೊದಕುಲು.