Last updated on May 28th, 2025 at 06:53 am
ಕುಡ್ಲ, ಮೇ 27: ಬಂಟ್ವಾಳದ ಇರಾಕೋಡಿ ಪನ್ಪಿನಲ್ಪ ಜವನನ್ ಬರ್ಬರವಾದ್ ಕೆರ್ತಿನ ಪ್ರಕರಣೊಗು ಸಂಬಂಧಿತ್ದ್ ನನ ಒವ್ವೇ ಬೊರ್ಚಂದಿನ ನಡಕೆಲು ನಡಪಂದಿಲೆಕ ದುಂಬೆಚ್ಚರ್ಗೆದ ಕ್ರಮ ಆದ್ ಕುಡ್ಲ ಜಿಲ್ಲೆದ ಐನ್ ತಾಲೂಕ್ಲೆಡ್ ಮೂಜಿ ದಿನ ನಿಷೇಧಾಜ್ಞೆ ಜಾರಿ ಮಲ್ತ್ದೆರ್.
ಕುಡ್ಲ ಜಿಲ್ಲೆದ ಬಂಟ್ವಾಳ, ಬೊಲ್ತೇರ್, ಕಡಬ, ಪುತ್ತೂರು ಬೊಕ್ಕ ಸುಳ್ಯ ತಾಲೂಕ್ಲೆಡ್ ಮೇ 27ತ ಬಯ್ಯ 6 ಗಂಟೆರ್ದ್ ಮೇ 30ದ ಬಯ್ಯ 6 ಗಂಟೆ ಮುಟ್ಟ ನಿಷೇಧಾಜ್ಞೆ ಜಾರಿ ಮಲ್ತ್ದ್ ಅಪರ ಜಿಲ್ಲಾಧಿಕಾರಿಲು ಆದೇಶ ಮಲ್ತ್ದೆರ್.
ಬಂಟ್ವಾಳಡ್ ರಹೀಂ ಪನ್ಪಿನ ಜವನನ್ ಕೆರ್ತಿನ ಬೆರಿಟೇ ಪ್ರಕ್ಷುಬ್ಧ ವಾತಾವರಣ ಉಂಡಾದಿತ್ತ್ದ್, ಪಗೆತ ಪುಗೆಕ್ ನನ ದಾಲ ಎಚ್ಚಿಕಮ್ಮಿ ಆಯೆರೆ ದುಂಬು ಜಿಲ್ಲಾ ಪೋಲಿಸ್ ವರಿಷ್ಠಾಧಿಕಾರಿ ಸಾರ್ವಜನಿಕ ಶಾಂತಿ ಬೊಕ್ಕ ಕಾನೂನು ಸುವ್ಯವಸ್ಥೆ ಒರಿಪಾವುನ ದಿಟ್ಟಿಡ್ ನಿಷೇಧಾಜ್ಞೆ ಜಾರಿ ಮಲ್ಪೆರೆ ಓಲೆ ಬರೆದಿತ್ತ್ದ್, ಅಪರ ಜಿಲ್ಲಾಧಿಕಾರಿಲು ನಿಷೇಧಾಜ್ಞೆ ಆದೇಶ ಜಾರಿ ಮಲ್ತ್ದೆರ್.