Last updated on May 11th, 2025 at 01:07 pm
ಸುಳ್ಯ ಮೇ 11; ಕೆವಿಜಿ ಪಾಲಿಟೆಕ್ನಿಟ್ ಪ್ರಿನ್ಸಿಪಾಲ್ ಆದಿತ್ತಿನ ಪ್ರೊ.ಎ.ಎಸ್.ರಾಮಕೃಷ್ಣೆರೆನ್ ಕೆರ್ತಿನ ಪ್ರಕರಣೊಡು ಜೀವಾವಧಿ ಶಿಕ್ಷೆ ಆದಿತ್ತಿನ ಆರೋಪಿಲೆಗ್ ಇತ್ತೆ ಸುಪ್ರೀಂ ಕೋರ್ಟ್ ಮಲ್ಲ ರಿಲೀಫ್ ಕೊರ್ದಿತ್ತ್‌ದ್, ಮಾತಾ ಆರೋಪಿಲೆನ್ಲಾ ಪ್ರಕರಣೊಡು ಖುಲಾಸೆ ಮಲ್ತ್‌ದ್ ಸುಪ್ರೀಂ ಕೋರ್ಟ್ ಶುಕ್ರವಾರ ತೀರ್ಪು ಕೊರ್ತುಂಡು ಪನ್ದ್ ತೆರಿದ್ ಬೈದ್ಂಡ್.
2011 ಟ್ ಪ್ರೊ.ರಾಮಕೃಷ್ಣೆರೆನ್ ಕೆರ್ದಿತ್ತೆರ್. ಸ್ಥಳೀಯ ಜಿಲ್ಲಾ ಸೆಶೆನ್ಸ್ ನ್ಯಾಯಂತಡೆಡ್ ಈ ವಿಚಾರಣೆ ನಡತ್‌ದ್ ಈ ಪ್ರಕರಣ ಸಮಗಟ್ಟ್ ಸಾಕ್ಷ್ಯಾಧಾರೊಲು ದಾಂತೆ ಮದೆಕ್ ಬೂರ್ದಿತ್ತ್ಂಡ್, ಬೊಕ್ಕ ಈ ತೀರ್ಪುದ ವಿರುದ್ಧ ಸರಕಾರ ಹೈಕೋರ್ಟ್‌ಗ್ ಪೋದಿತ್ತ್‌ದ್, ವಿಚಾರಣೆ ನಡತ್‌ದ್ 2023 ಟ್ ಆರೋಪಿಲೆಗ್ ಜೀವಾವಧಿ ಶಿಕ್ಷೆ ಆದಿತ್ತ್ಂಡ್. ಉಂದೆತ ವಿರುದ್ಧ ಶಿಕ್ಷೆ ಆತಿನಕುಲು ಸುಪ್ರೀಂಕೋರ್ಟ್‌ಗ್ ಪೋದಿತ್ತೆರ್. ಸುಪ್ರೀಂಕೋರ್ಟ್ ಹೈಕೋರ್ಟ್ ಕೊರ್ತಿನ ಶಿಕ್ಷೆನ್ ಅಮಾನತ್ ಮಲ್ತ್‌ದ್, ಆರೋಪಿಲೆಗ್ ಜಾಮೀನ್ ಕೊರ್ದಿತ್ತ್ಂಡ್. ಬೊಕ್ಕ ವಿಚಾರಣೆ ಮಲ್ತ್‌ದ್ ಶುಕ್ರವಾರ ಸುಪ್ರೀಂಕೋರ್ಟ್ ತೀರ್ಪು ಕೊರ್ತುಂಡು.
ಪ್ರಕರಣದ ಆರೋಪಿಲಾಯಿನ ಡಾ.ರೇಣುಕಾಪ್ರಸಾದ್, ಮನೋಜ್ ರೈ, ನಾಗೇಶ್ ಎಚ್.ಆರ್., ವಾಮನ ಪೂಜಾರಿ, ಶರಣ್ ಕುಡ್ಲ, ಭವಾನಿಶಂಕರ ಮಾತೆರೆನ್ಲಾ ಸುಪ್ರೀಂಕೋರ್ಟ್ ದೋಷಮುಕ್ತ ಮಲ್ತ್‌ದ್ ಪ್ರಕರಣೊರ್ದು ಖುಲಾಸೆ ಮಲ್ದ್ಂಡ್. ಸುಪ್ರೀಂಕೋರ್ಟ್‌ಡ್ ಪುಗರ್ತೆದ ವಕೀಲೆರ್ ಸಿದ್ಧಾರ್ಥ್ ಲೂತ್ರಾ ಬೊಕ್ಕ ಗಿರೀಶ್ ಅನಂತಮೂರ್ತಿ ಡಾ.ರೇಣುಕಾಪ್ರಸಾದೆರೆನ ಪರವಾದ್ ವಾದ ಮಲ್ತಿತ್ತೆರ್.