Last updated on May 15th, 2025 at 10:07 am
ಕುಡ್ಲ, ಮೇ 15: ಬಜ್ಪೆಡ್ ಹಿಂದೂ ಕಾರ್ಯಕರ್ತೆ ಸುಹಾಸ್ ಶೆಟ್ಟಿನ್ ಕೆರ್ತಿನ ಪ್ರಕರಣೊಗು ಸಂಬಂಧಿತ್‌ದ್ ಕುಡ ಮೂವೆರ್ ಆರೋಪಿಲೆನ್ ಕುಡ್ಲ ಸಿಸಿಬಿ ಪೊಲೀಸೆರ್ ಕೈದ್ ಮಲ್ತ್‌ದೆರ್.
ಕೈದಾತಿನಕಲೆನ್ ಕಳವಾರ್ ಗ್ರಾಮೊದ ಅಝರುದ್ದೀನ್ ಯಾನೆ ಅಝರ್ ಯಾನೆ ಅಜ್ಜು (29), ಬಜ್ಪೆದ ಅಬ್ದುಲ್ ಖಾದರ್ ಯಾನೆ ನೌಫಲ್ (24), ಫರಂಗಿಪೇಟೆ ಕುಂಪನಮಜಲ್‌ದ ಇತ್ತೆ ಹಾಸನದ ಕೆ.ಆರ್.ಪುರಂಡ್ ಇಪ್ಪುನ ನೌಷಾದ್ ಯಾನೆ ವಾಮಂಜೂರು ನೌಷಾದ್ (39) ಪನ್ದ್ ಗುರ್ತ ಪತ್ತ್‌ದೆರ್.
ಆರೋಪಿಲೆಡ್ ಅಝರುದ್ದೀನ್ ಪನ್ಪಿನಾಯನ ಮಿತ್ತ್ ಪಣಂಬೂರು, ಸುರತ್ಕಲ್, ಮುಲ್ಕಿ ಪೊಲೀಸ್ ಸ್ಟೇಶನ್‌ಲೆಡ್ 3 ಕಲ್ವೆ ಪ್ರಕರಣ ದಾಕಲಾದುಂಡು. ಉಂಬ್ಯೆ ಸುಹಾಸ್ ಶೆಟ್ಟಿ ಓಡೆ ಪೋಪೆರ್ ರ್ಬಪೆರ್ ಪನ್ಪಿನೆತ ಒಲವು ಕೊರ್ದು ಕೆರ್ಯೆರ ಸಕಾಯ ಮಲ್ತಿತ್ತೆ ಪನ್ದ್ ಪೊಲೀಸೆರ್ ತೆರಿಪಾದೆರ್.
ಆರೋಪಿ ಅಬ್ದುಲ್ ಖಾದರ್ ಪನ್ಪಿನಾಯೆ ಆರೋಪಿಲು ಕೆರ್ನೆರ್ದ್ ಬೊಕ್ಕ ಕಾರ್‌ಡ್ ಪದ್ರಾಡಾಪುನ ಪೊರ್ತುಡು ಸಕಾಯ ಮಲ್ತಿತ್ತೆ ಪನ್ದ್ ಪೊಲೀಸೆರ್ ಒಲವು ಕೊರ್ತೆರ್. ಕೂಡೊರಿ ಆರೋಪಿ ನೌಷಾದ್ ಪನ್ಪಿನಾಯೆ ಬೇತೆ ಆರೋಪಿಲೆ ಒಟ್ಟುಗು ಕೆರ್ಪುನ ಪ್ಲಾನ್ ಮಲ್ತ್‌ದೆ. ಉಂಬ್ಯೆ ಸುರತ್ಕಲ್, ಬಜ್ಪೆ, ಬೆದ್ರ, ಬಡಕಾಯಿ ಕುಡ್ಲ, ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಸ್ಟೇಶನ್‌ಲೆಡ್ ಕೊಲೆ, ಕೊಲೆಯತ್ನ, ಕಲ್ವೆ ಪುನೆಪು ಸೇರ್ದ್ 6 ಪ್ರಕರಣೊಲೆಡ್ ಇತ್ತೆ ಪನ್ದ್ ಪೊಲೀಸೆರ್ ತೆರಿಪಾದೆರ್.
ಆರೋಪಿಲೆನ್ ನ್ಯಾಯಂತಡೆಕ್‌ ಹಾಜಿರಿ ಮಲ್ದೆರ್. ಉಂದೆಟ್ ಅಝರುದ್ದೀನ್‌ಗ್ ನ್ಯಾಯಾಂಗ ಕೈದ್ ಕೊರ್ತೆರ್. ಒರಿನ ಇರ್ವೆರೆನ್ ಎಚ್ಚಿನ ವಿಚಾರಣೆಗ್ 7 ದಿನ ಪೊಲೀಸ್ ಕಸ್ಟಡಿಗ್ ಗೆತೊಂದೆರ್. ಈ ಕೊಲೆ ಪ್ರಕರಣೊಡು ಪಾಲ್‌ಪಡೆತಿನ ಬೇತೆ ಆರೋಪಿಲೆನ್ ನಾಡುನ ಬೇಲೆ ನಡತೊಂದುಂಡು ಪನ್ದ್ ಪೊಲೀಸೆರ್ ಪನ್ಡೆರ್.