Last updated on May 15th, 2025 at 03:26 pm
ಕಾರ್ಲ, ಮೇ 15: ಒಡಿಪು ಜಿಲ್ಲೆದ ಕಾರ್ಲಡ್ ಆಪರೇಷನ್ ಮಲ್ತ್ದ್ ಜಂಜಿದ ಗೆಡ್ಡೆನ್ ಪಿದಯಿ ದೆಪ್ಪುವ ಪೊರ್ತುಡು ಪಾಕ ನೆತ್ತೆರ್ ಪೋದು ಪೊಂಜೊವು ಒರ್ತಿ ತೀರ್ದಿತ್ತ್ದ್, ಡಾಕ್ಟರ್ನಕ್ಲೆನ ಗೋಸ್ಮರಿಯೇ ನೆವನ ಪನ್ದ್ ಆರೋಪ ಮಲ್ತ್ದ್ ತೀರ್ದಿನ ಪೊಂಜೊವುನ ಇಲ್ಲದಕುಲು ಆಸ್ಪತ್ರೆಡ್ ಡಾಕ್ಟರ್ನಕ್ಲೆನ ಮಿತ್ತ್ ಆಕ್ರೋಶ ತೂಪಾದ್ ಪೊರ್ಮ್ಬಾಟ ಮಲ್ತಿನ ನಡಕೆ ಕಾರ್ಲದ ಸ್ಪಂದನ ಆಸ್ಪತ್ರೆಡ್ ನಡತ್ದ್ಂಡ್.
ಕಾರ್ಲ ತಾಲೂಕ್ದ ಸಾಣೂರು ಗ್ರಾಮೊದ ಜುಬೇದಾ(54) ಪನ್ಪಿನಾರ್ ಬಂಜಿ ಬೇನೆಡ್ ನರಲೊಂದಿತ್ತೆರ್. ಆರ್ ಸಾಣೂರ್ದ ಕ್ಲಿನಿಕ್ಡ್ ಚೆಕಪ್ ಮಲ್ಪಾನಗ ಆರೆನ ಬಂಜಿಡ್ ಗೆಡ್ಡೆ ಬುಲೆದ್ಂಡ್, ಅಂಚಾದ್ ಆಪರೇಶನ್ ಮಲ್ಪಾವೊಡು ಪನ್ದ್ ಪನ್ದಿತ್ತೆರ್.
ಅಂಚೆನೇ ಜುಬೇದಾ ಮೆರೆನ್ ಬುಧವಾರ ಕಾರ್ಲದ ಸ್ಪಂದನ ಆಸ್ಪತ್ರೆಗ್ ದಾಕಲ್ತ್ದೆರ್.
ಡಾಕ್ಟರ್ನಕುಲು ಆಪರೇಶನ್ ಮಲ್ತ್ದ್ ಬಂಜಿದ ಗೆಡ್ಡೆ ದೆಪ್ಪೆರೆ ತೂನಗ ಬಾರೀ ನೆತ್ತೆರ್ ಪೋದು
ಜುಬೇದಾ ತೀರ್ದೆರ್ ಪನ್ದ್ ಆರೆನ ಸಂಬಂಧಿಕೆರ್ ಆರೋಪ ಮಲ್ತ್ದೆರ್.
ನೆತ್ತೆರ್ಡ್ ಮುರ್ಕುದಿನ ಕುಂಟುಲು ಬೆಡ್ದ ಬರಿಟ್ ಇತ್ತಿನವು ಅವೆಕ್ ಪುಷ್ಟಿ ಕೊರ್ಪುಲೆಕ ಇತ್ತ್ಂಡ್. ಪೊಂಜೊವು ತೀರಿಬೊಕ್ಕ ಆರೆನ ಸಂಬಂಧಿಕೆರ್ ಬೊಕ್ಕ ಮುಟ್ಟದಕುಲು ಆಸ್ಪತ್ರೆಡ್ ಸೇರ್ದ್ ಡಾಕ್ಟರ್ನಕಲೆನ್ ತರಾಟೆಗ್ ಗೆತ್ಂದೆರ್. ಅಕಲೆನ ಗೋಸ್ಮರಿರ್ದಾವವರನೆ ತೀರ್ದೆರ್ ಪನ್ದ್ ಆರೋಪ ಮಲ್ತ್ದ್ ಪೊರ್ಮ್ಬಾಟ ಮಲ್ದೆರ್.