Last updated on May 16th, 2025 at 09:19 am
ಬಂಟ್ವಾಳ , ಮೇ 16 : ರಡ್ಡ್ ಲಾರಿಲು ಎಡ್ತೊಂದು ಒಂಜಿ ಲಾರಿದ ಡ್ರೈವರ್ನ ಮಿತ್ತ್ ಜಲ್ಲಿ ಮಿಕ್ಸ್ ಆತಿನ ಬೆಚ್ಚ ಡಾಮಾರ್ ಬೂರ್ದ್ ತೀರ್ದಿನ ನಡಕೆ ಬಂಟ್ವಾಳ ತಾಲೂಕ್ದ ಸಜಿಪನಾಡು ಕೈತಲ್ ನಡತ್ದ್ಂಡ್.
ತೀರ್ದಿನಾರೆನ್ ಸಜೀಪನಡು ಗೋಳಿಪಡ್ಪುದ ರಫೀಕ್ ( 45) ಪನ್ದ್ ಗುರ್ತ ಪತ್ತ್ದೆರ್. ಲಾರಿಡ್ ಇತ್ತಿನ ಕ್ಲೀನರ್ ಯೂಸುಫ್ ಪನ್ಪಿನಾರೆನ ಕೈ ಕಾರ್ದ ಮಿತ್ತ್ ಡಾಮರ್ ಬೂರ್ದ್ ಮೆಯಿ ಕೈ ಪೊತ್ತುದ್ ಗಾತಿದ ಗಡಿಕುಲಾತ. ಕುಡೊಂಜಿ ಲಾರಿದ ಡ್ರೈವರ್ ರಿಜ್ವಾನ್ ಬೊಕ್ಕ ಅಲ್ಪಾಸ್ ಪನ್ಪಿನಕ್ಲೆಗ್ಲಾ ಗಡಿಕುಲಾದಿತ್ತ್ದ್ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು. ಕಂಚಿನಡ್ಕಪದವು ಪನ್ಪಿನಲ್ಪ ಈ ಎಡ್ತೆ ನಡತಿತ್ತ್ದ್, ಕೆಂಪು ಕಲ್ಲ್ ಕೊನೊವೊಂದಿತ್ತಿನ ಲಾರಿ ಸಜಿಪನಡು ತಂಚಿ ಪೋವೊಂದುಪ್ಪುನಗ ಪಿರವುರ್ದ್ ಬೆಚ್ಚ ಬಿಟುಮೆನ್ ಕೊನೊವೊಂದಿತ್ತಿನ ಟಿಪ್ಪರ್ ಲಾರಿ ಎಡ್ತ್ದ್ಂಡ್ ಪನ್ದ್ ವರದಿ ಆತ್ಂಡ್.
ಏತ್ ಗಾತಿದ ಎಡ್ತೆ ಆತ್ಂಡ್ ಪನ್ಡ, ರಡ್ಡ್ ಟಿಪ್ಪರ್ಲಾ ಕಬ್ಬೆ ಬೂರ್ದ್ ಸಾದಿದ ಬರಿತ ತೋಟಗ್ ಬೂರ್ದ. ಟಿಪ್ಪರ್ಡ್ ಇತ್ತಿನ ಜಲ್ಲಿ ಮಿಕ್ಸ್ ಆತಿನ ಬೆಚ್ಚ ಡಾಮಾರ್ ಕೆಂಪು ಕಲ್ಲ್ ದಿಂಜಿನ ಲಾರಿದ ಡ್ರೈವರ್ನ ಮಿತ್ತ್ ಬೂರಿನೆರ್ದಾವರ ಮೆಯಿ ಅಲಕ್ಕ ಬೆಯ್ತ್ದ್ ಪೋತುಂಡು. ಆರೆನ್ ರಪಕ್ಕ ಕುಡ್ಲದ ಪ್ರೈವೇಟ್ ಆಸ್ಪತ್ರೆಗ್ ಲೆತೊಂದು ಪೋಂಡಲಾ ಮರ್ದ್ ಪಲಿಪಂದೆ ತೀರ್ದೆರ್. ರಫೀಕ್ನ ಒಟ್ಟುಗಿತ್ತಿನ ಕ್ಲೀನರ್ ಯೂಸುಫ್ನ ಮಿತ್ತ್ಲಾ ಬೆಚ್ಚ ಡಾಮಾರ್ ಬೂರ್ದಿತ್ತ್ದ್, ಆಸ್ಪತ್ರೆಡ್ ಮರ್ದ್ ನಡತೊಂದುಂಡು.