Last updated on June 24th, 2025 at 12:31 pm
ಒಡಿಪು, ಜೂ. 24: ಒಡಿಪುದ ಪ್ರೈವೇಟ್ ಶಾಲೆ ಒಂಜೆಕ್ ಇ-ಮೇಲ್ ಮುಕೇನ ಶಾಲೆಡ್ ಬಾಂಬ್ ಉಂಡು ಪನ್ದ್ ಬೈದಿನ ಕಲುಸುದ್ದಿಗ್ ಸಂಬಂಧಿತ್ದ್ ತಮಿಳ್ನಾಡ್ದ ಚೆನ್ನೈ ಮೂಲೊದ ಪೊಂಜೊವು ಒರ್ತಿನ್ ಅಹಮದಾಬಾದ್ ಪೊಲೀಸೆರ್ ವಶೊಕು ಗೆತೊಂದಿತ್ತ್ದ್, ಆಲೇ ಈ ಬೇಲೆ ಮಲ್ದಲ್ ಪನ್ದ್ ಪನೊಂದುಲ್ಲೆರ್.
ಒಂಜಿ MNC ಕಂಪೆನಿಡ್ ಸೀನಿಯರ್ ಕಂಸಲ್ಟಂಟ್ ಆದುಪ್ಪುನ ರೀನ್ ಜೊಶಿಲ್ಡಾ ಪನ್ಪಿನಾಲೆನ್ ಅಹ್ಮದಾಬಾದ್ ಪೋಲೀಸೆರ್ ಈ ಬಗೆಟ್ ಕೈದ್ ಮಲ್ದೆರ್. ತನನ್ ಮದಿಮೆ ಆವರೆ ಒತ್ತೊನಂದಿನ ದಿವಿಜ್ ಪ್ರಭಾಕರ್ ಪನ್ಪಿನಾಯನ ಪುದರ್ ಹಾಲ್ ಮಲ್ಪೆರೆ ಆಯನ ಪುದರ್ಡ್ 11 ರಾಜ್ಯೊಲೆನ ಸ್ಟೇಡಿಯಂ, ಶಾಲೆ, ಆಸ್ಪತ್ರೆಲೆಗ್ ಇಂಚಿನ ಮೇಲ್ ಕಡಪುಡ್ದಲ್ ಪನ್ದ್ ತೆರಿದ್ ಬೈದ್ಂಡ್.
ಆಲೆನ್ ವಶೊಕು ಕೊರ್ಯೆರ ಒಡಿಪು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಲು ಓಲೆ ಬರೆದಿತ್ತ್ದ್, ಅಲ್ಪ ವಿಚಾರಣೆ ಮುಗಿನೇ ಒಡಿಪುಗು ಲೆತ ಬರ್ಪಿನ ಸಾಧ್ಯತೆ ಉಂಡು.
ಕರಿನ ವರ್ಸೊಲಾ ಪೇಂಟೆದ ವಿದ್ಯಾಸಂಸ್ಥೆ ಒಂಜೆಕ್ ಇಂಚಿನನೇ ಪೊಟ್ಟು ಬಾಂಬ್ ಮೇಲ್ ಬತ್ತಿತ್ತ್ಂಡ್, ಅವೆಟ್ಲಾ ಮೊಲೆನ ಕೈ ಮಿನಿ ಉಂಡಾ ಪನ್ಪಿ ದಿಟ್ಟಿಡ್ ಪೊಲೀಸೆರ್ ಜಡ್ತೆ ಮಲ್ಪರೆಗುಲ್ಲೆರ್.