ಕಾಲಿ ಆಂಡಾ ಸರ್ಕಾರೊದ ಖಜಾನೆ? ಕಾಂಗ್ರೆಸ್ ಶಾಸಕೆರೆರ್ದ್ ಬೊಕ್ಕ ಇತ್ತೆ ಗೃಹ ಸಚಿವೆರೆರ್ದ್ ಶಾಕಿಂಗ್ ಪಾತೆರ..!

Last updated on June 24th, 2025 at 03:53 pm

ಬಾಗಲಕೋಟೆ, ಜೂ. 24: ಕಾಂಗ್ರೆಸ್ ಶಾಸಕೆರ್ ಸರ್ಕಾರೊದ ವಿರುದ್ಧ ಒರಿಯೊರಿಯೇ ಲಕ್ಕೊಂದುಲ್ಲೆರ್. ತಾರಾಮರ ಭ್ರಷ್ಟಾಚಾರ ನಡತೊಂದುಂಡು ಪನ್ಪಿ ಆರೋಪದ ಒಟ್ಟುಗು ಕ್ಷೇತ್ರ ಅಭಿವೃದ್ಧಿ ಆವೊಂದಿಜ್ಜಿ ಪನ್ದ್ ಶಾಸಕೆರ್ ಬೆಸರ್ ತೋಜಾವೊಂದುಲ್ಲೆರ್. ಉಂದೆತ ನಡುಟು ಗೃಹ ಸಚಿವೆ ಜಿ ಪರಮೇಶ್ವರ್‌ರೆನ ಪಾತೆರ ರಾಜ್ಯ ರಾಜಕೀಯೊಡು ಭಾರೀ ಚರ್ಚೆಗ್ ನೆವನ ಆತ್ಂಡ್.

ಬಾಗಲಕೋಟೆ ಬಾದಾಮಿಡ್ ಪಾತೆರ್ನ ಗೃಹ ಸಚಿವೆ ಜಿ ಪರಮೇಶ್ವರ್ ಮೇರ್ ಸರ್ಕಾರೊನು ನನಲಾತ್ ಬಂಙೊಗು ನೂಕುನ ಪಾತೆರ ಪನ್ತೆರ್. ಅಭಿವೃದ್ಧಿಗ್ ನಮ್ಮ ಸರ್ಕಾರೊಡ ಕಾಸ್ ಇಜ್ಜಿ, ಪ್ರಾಜೆಕ್ಟ್ ಮಲ್ತ್‌ದ್ ಕೇಂದ್ರೊಗು ಕಡಪುಡ್ಲೆ ಪನ್ದ್ ಗೃಹ ಸಚಿವೆರ್, ಶಾಸಕೆರೆಗ್ ಪನ್ತಿನ ಪಾತೆರ ಇತ್ತೆ ಭಾರೀ ಚರ್ಚೆಗ್ ನೆವನ ಆತ್ಂಡ್.

ಎಂಕ್ಲೆಡ ಕಾಸ್ ಇಜ್ಜಿ, ಸಿದ್ದರಾಮಯ್ಯಡಲಾ ಕಾಸ್ ಇಜ್ಜಿ. ಇತ್ತಿನೆನ್ ಮಾತಾ ಕೊರ್ದುಬುಡ್ತ. ಅರಿ, ಸಲಾಯಿ, ಅಟಿಲ್‌ದ ಎಣ್ಣೆದ ಒಟ್ಟುಗು ಗಂಗಸರಲಾ ಕೊರ್ತ ಅತಾ ಪನ್ದ್ ಅಬಕಾರಿ ಸಚಿವೆ ತಿಮ್ಮಾಪುರ ನಂಚೀ ಕೈ ಮಲ್ತ್‌ದ್ ಪರಮೇಶ್ವರ್ ಮಕ್ಕರ್ ಮಲ್ತ್‌ದೆರ್.

ಇಡೀ ಬಾದಾಮಿ ಅಭಿವೃದ್ಧಿಗ್ ಒಂಜಿ ಮಲ್ಲ ಪ್ರಾಜೆಕ್ಟ್ ರೆಡಿ ಮಲ್ಪುಲೆ. ಅವು ಸಾವಿರ ಕೋಟಿ ಪ್ರಾಜೆಕ್ಟ್ ಆದುಪ್ಪಡ್ ಪನ್ದ್ ಶಾಸಕೆರೆಗ್ ಗೃಹ ಸಚಿವೆ ಪರಮೇಶ್ವರ್ ಪನ್ಡೆರ್. ಸಾವಿರ ಕೋಟಿ ಪನ್ಡ ಪೋಡಿಗೆ ಆಪುಂಡಾ? ಈ ಪೋಡ್ಯೊರ್ಚಿ ಪನ್ದ್ ಗೃಹ ಸಚಿವೆರ್, ಬಾದಾಮಿ ಶಾಸಕೆ ಭೀಮಸೇನ ಚಿಮ್ಮನಕಟ್ಟಿನ ಕಾರ್ ಒಯ್ತೆರ್.

ಸರಕಾರೊಡ ಕಾಸ್ ಇಜ್ಜಾ?- ಗೃಹ ಸಚಿವೆ ಪರಮೇಶ್ವರ್‌ರೆನ ಪಾತೆರ ಕೇನ್ಡ ಈ ಪ್ರಶ್ನೆ ಬರ್ಪುನು ಸಹಜ. ಎಂಕ್ಲೆಡ ಕಾಸ್ ಇಜ್ಜಿ ಪನ್ದ್ ಪನ್ಪಿನ ಮುಕೇನ ಗೃಹ ಸಚಿವೆರ್ ಪರೋಕ್ಷವಾದ್ ಖಜಾನೆ ಕಾಲಿ ಆತ್ಂಡ್ ಪನ್ದ್ ಪನ್ತೆರ್. ಗ್ಯಾರಂಟಿ ಯೋಜನೆರ್ದಾವರ ಸರ್ಕಾರೊಗು ಮಲ್ಲ ಪುದೆ ಆದಿತ್ತ್‌ದ್, ಅಭಿವೃದ್ಧಿಗ್ ಕಾಸೇ ಇಜ್ಜಿ ಪನ್ದ್ ಜನ ಪಾತೆರೊಂದುಲ್ಲೆರ್.