Last updated on June 3rd, 2025 at 10:26 am
ಚಿಕ್ಕಬಳ್ಳಾಪುರ, ಜೂನ್ 03: ಆಜಿ ವರ್ಸ ಪ್ರಾಯೊದ ಪೊಣ್ಣು ಬಾಲೆದ ಮಿತ್ತ್ 55 ವರ್ಸದ ಆಂಜೊವು ಅತ್ಯಾಚಾರ ಮಲ್ದಿನ ಆರೋಪ ಚಿಕ್ಕಬಳ್ಳಾಪುರಡ್ ಕೇನ್ದ್ ಬೈದ್ಂಡ್. ಚಿಕ್ಕಬಳ್ಳಾಪುರ ನಗರೊದ ಶಮ್ಸ್ ಪಲ್ಲಿದ ಅದೆಟ್ ಅತ್ಯಾಚಾರ ಆತ್ಂಡ್ ಪನ್ದ್ ಸಂತ್ರಸ್ತೆದಿ ಪೊಣ್ಣನ ಅಪ್ಪೆ ಆರೋಪ ಮಲ್ತಿತ್ತ್‌ದ್, ಆರ್ ಕೊರ್ತಿನ ಒಯಿಲ್‌ದ ಆಧಾರೊಡು ಮಹಿಳಾ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.
ಆರೋಪಿ ಮಹಪ್ಯೂಸ್ ಪನ್ಪಿನಾಯನ್ ಕೈದ್ ಮಲ್ತ್‌ದ್ ನ್ಯಾಯಾಂಗ ಬಂಧನೊಗು ಒಪ್ಯಾದೆರ್. ಆರೋಪಿ ಮಹಪ್ಯೂಸ್ ಬೇತೆ ಒಂಜಿ ಪಲ್ಲಿಡ್ ಮೌಲ್ವಿ ಆದುಪ್ಪುನಾಯನ ಅಮ್ಮೆ.
ಆರೋಪಿನ ಮಗೆ ಬೇತೆ ಪಲ್ಲಿಡ್ ಮೌಲ್ವಿ ಆದುಪ್ಪುನೆರ್ದಾವರ ಮೌಲ್ವಿಗ್ ಇಪ್ಪೆರೆ ಪಲ್ಲಿದ ಅದೆನ್ ಜಮಾತ್ ಕೊರ್ದಿತ್ತ್ಂಡ್. ಅವ್ವೇ ಅದೆನ್ ಆರೋಪಿ ತೆಟ್ಟ್ ಬೇಲೆಗ್ ಗಲಸ್‌ದೆ. ಚಾಕೊಲೇಟ್ ಕೊರ್ಪೆ ಪನ್ದ್ ಪೊಣ್ಣು ಬಾಲೆನ್ ಲೆತೊಂದು ಪೋದು ಅತ್ಯಾಚಾರ ಮಲ್ತ್‌ದೆ ಪನ್ದ್ ಆರೋಪ ಮಲ್ದೆರ್.
ಆರೋಪಿ ಮಹಪ್ಯೂಸ್ ಮೂಲತಃ ಉತ್ತರ ಪ್ರದೇಶ ಮೂಲೊದಾಯೆ. 20 ವರ್ಸೊಗು ದುಂಬು ಚಿಕ್ಕಬಳ್ಳಾಪುರಗ್ ಬತ್ತ್‌ದ್ ಒಕ್ಕೆಲ್ ಕುಲ್ದಿತ್ತೆ. ಸಾದಿ ಬರಿಕ್ ಕುಂಟು ಮಾದೊಂದಿತ್ತೆ. ಅತ್ಯಾಚಾರ ಪ್ರಕರಣ ತೆರಿಲೆಕನೆ ಪಲ್ಲಿದ ಮೌಲ್ವಿ ಸುಹೇಬ್‌ನ್ ಅಲ್ಪದಕುಲು ತರಾಟೆಗ್ ಗೆತ್ಂದೆರ್. ಮೌಲ್ವಿಗ್ ಇಪ್ಪೆರೆ ಕೊರ್ತಿನ ಅದೆನ್ ಆಯನ ಅಮ್ಮಗ್ ದಾಯೆ ಕೊರ್ತುನ ಪನ್ದ್ ಪ್ರಶ್ನೆ ಮಲ್ದೆರ್. ಕುಡೊಂಜಿ ಕಡೆಟ್, ಸಂತ್ರಸ್ತೆದಿ ಪೊಣ್ಣನ ಅಪ್ಪೆ ಆರೋಪಿಗ್ ತಾರಾಮರ ಪೊಲಿ ಪಾಡ್ದೆರ್ ಪನ್ದ್ ತೆರಿದ್ ಬೈದ್ಂಡ್.