Last updated on June 29th, 2025 at 02:01 pm
ಉಳ್ಳಾಲ, ಜೂ. 29: ಸಾಮಾಜಿಕ ಬಲೆತ್ತಾನೊಡು ಗುರ್ತ ಆತಿನ ಎಲ್ಯ ಪ್ರಾಯೊದ ಪೊಣ್ಣನ್ ಮರ್ಲ್ ಕಟ್ಟಾದ್ ಲೆತೊಂದು ಪೋದು, ಸೋಮೇಶ್ವರ ಕಡಲ ಕರೆಟ್ ಕಾರ್ಡ್ ಆಲೆನ್ ಅತ್ಯಾಚಾರ ಮಲ್ದಿನ ಬಗೆಟ್ ಉಳ್ಳಾಲ ಪೊಲೀಸ್ ಸ್ಟೇಶನ್ಡ್ ಪೋಕ್ಸೋ ಕೇಸ್ ದಾಕಲಾತ್ಂಡ್. ಕೈದಾತಿನ ಆರೋಪಿನ್ ಅಡ್ಯಾರ್ ವಳಚ್ಚಿಲ್ ನಿವಾಸಿ ಕೆಲ್ವಿನ್ (24) ಪನ್ದ್ ಗುರ್ತ ಪತ್ತ್ದೆರ್.
ಆರೋಪಿ ಕೆಲ್ವಿನ್ ಅಪ್ರಾಪ್ತೆದಿ ಪೊಣ್ಣನೊರ್ತಿನ್ ಇನ್ಸಾಗ್ರಾಮ್ಡ್ ಗುರ್ತ ಮಲ್ತೊಂದಿತ್ತೆ. ಚಾಟಿಂಗ್ಡೇ ಆಲೆನ್ ಮೋಕೆ ಮಲ್ತೊಂದುಲ್ಲೆ ಪನ್ದ್ ನಂಬಾದೆ. ಕರಿನ ಗುರುವಾರ, ಆರೋಪಿ ಫೋನ್ ಮಲ್ತ್ದ್ ಆ ಪೊಣ್ಣನ್ ಆಲೆನ ಇಲ್ಲದ ಕೈತಲೇ ತಿಕ್ಕ್ದಿತ್ತ್ದ್, ಬೊಕ್ಕ ಕೆಲ್ವಿನ್ ಉಳ್ಳಾಲದ ಇಲ್ಲಗ್ ಕಾರ್ಡ್ ಲೆತೊಂದು ಬತ್ತ್ದೆ. ಅವೆರ್ದ್ ಬೊಕ್ಕ ಕುತ್ತಾರ್ ಮುಟ್ಟದ ಲಾಡ್ಜ್ಗ್ ಲೆತೊಂದುಪೋದು ರೂಮ್ ಕೇನ್ದೆ. ಆಂಡ, ಎಲ್ಯ ಪ್ರಾಯೊದ ಪೊಣ್ಣು ಆಯಿನೆರ್ದಾವರ ಲಾಡ್ಜ್ ಸಿಬ್ಬಂದಿಲು ರೂಮ್ ಕೊರ್ದಿಜ್ಜಂಡ್. ಸೋಮೇಶ್ವರ ಕಡಲ ಕರೆಕ್ ಲೆತೊಂದು ಪೋದು ಕಾರ್ದುಲಯಿಡೇ ಅತ್ಯಾಚಾರ ಮಲ್ತ್ದೆ ಪನ್ದ್ ಪೊಲೀಸೆರ್ ತೆರಿಪಾದೆರ್.
ಅವೆರ್ದ್ ಬೊಕ್ಕ ಆಲೆನ್ ಇಲ್ಲಮುಟ್ಟ ಕಾರ್ಡ್ ಬುಡ್ದು ಪೋತೆ. ಕಾಂಡೆ ಬೊಕ್ಕ ಬಯ್ಯಡ್ ಕಾರ್ಡ್ ಪೊಣ್ಣನ್ ಲೆತೊಂದು ಪೋತಿನೆನ್ ಮುಟ್ಟದಕುಲು ತೂತೆರ್. ರಾತ್ರೆ ಪೊಣ್ಣಗ್ ಬಂಜಿ ಬೇನೆ ತೋಜಿದ್ ಬತ್ತಿನೆರ್ದಾವರ ಡಾಕ್ಟ್ರೆನಡೆ ಲೆತೊಂದು ಪೋದು ಪರಿಶೀಲನೆ ಮಲ್ಪುನಗ ಅತ್ಯಾಚಾರ ಆತಿನ ತೆರಿದ್ ಬೈದ್ಂಡ್ ಪನ್ದ್ ಪೊಲೀಸೆರ್ ತೆರಿಪಾದೆರ್. ಆರೋಪಿ ಕೆಲ್ವಿನ್ ಪೈಂಟಿಂಗ್ ಬೇಲೆಗ್ ಪೋಪೆದೆ ಪನ್ದ್ ತೆರಿದ್ ಬೈದ್ಂಡ್.