ತುಳು ಭಾಷೆನ್ ಕರ್ನಾಟಕೊಡು ಅಧಿಕೃತ ಭಾಷೆ ಆದ್ ಘೋಷಣೆ ಮಲ್ಪೆರ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರೆಡ ಬಿನ್ನಪು ಮಲ್ತಿನ ಶಾಸಕೆ ಅಶೋಕ್ ರೈಕುಲು

Last updated on June 12th, 2025 at 01:11 pm

ಬೆಂಗಳೂರು, ಜೂನ್ 12: ತುಳು ಭಾಷೆನ್ ಕರ್ನಾಟಕೊದ ಅಧಿಕೃತ ಭಾಷೆ ಮಲ್ಪೊಡು ಪನ್ದ್ ಕಾಯೆಸ್ ಮಲ್ತ್‌ದ್ ಪುತ್ತೂರು ವಿಧಾನಸಭಾ ಕ್ಷೇತ್ರೊದ ಶಾಸಕೆ ಅಶೋಕ್ ರೈಕುಲು, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆ ಶಿವರಾಜ್ ತಂಗಡಗಿ ಮೆರೆಗ್ ಬಿನ್ಪಪುದೋಲೆ ಕೊರ್ಯೆರ್.

ಈ ಇಸಯೊನು ಶಾಸಕೆರ್ ತನ್ನ ಅಧಿಕೃತ ಇನ್ಸ್ಟಾ‌ಗ್ರಾಮ್ ಅಕೌಂಟ್‌ಡ್ ಪಾಡೊಂದೆರ್.

ತುಳು ಭಾಷೆಗ್ ಅಧಿಕೃತ ಭಾಷೆದ ಮಾನಾದಿಗೆ ಕೇನೊಂದುಪ್ಪುನು ಇನಿ ಕೋಡೆರ್ದ್ ಅತ್ತ್. ಸುಮಾರ್ 50-60 ವರ್ಸೊರ್ದಿಂಚಿ ತುಳು ಭಾಷೆನ್ ಅಧಿಕೃತ ಮಲ್ಪೊಡು ಪನ್ಪಿ ಬಿನ್ನಪು ತುಳುವೆರ್ ಮಲ್ತೊಂದೇ ಉಲ್ಲೆರ್. ಆಂಡ ಇದಮುಟ್ಟಲಾ ಈ ದಿಸೆಟ್ ನಮಕ್ ಎಡ್ಡೆ ಸುದ್ದಿ ಕೇನ್ದಿನೇ ಇಜ್ಜಿ. ಈ ಸರ್ತಿ ಆಂಡಲಾ ತುಳು ಭಾಷೆಗ್ ತಿಕ್ಕೊಡಾಯಿನ ಮಾನಾದಿಗೆ ತಿಕ್ಕಡ್.