Last updated on June 11th, 2025 at 01:20 pm
ಒಡಿಪು: ಅನ್ನಭಾಗ್ಯದ ಅರಿನ್ ದೆತ್ತ್‌ದೀತಿನ ಬಗೆಟ್ ಪೋಲೀಸೆರೆಗೆ ತಿಕ್ಕಿನ ಪತ್ತ ಒಲವುದ ಆಧಾರೊಡು ದಾಳಿ ಮಲ್ತ್‌ದ್ ಸುಮಾರ್ 1,27,880 ರೂ. ಮೌಲ್ಯೊದ 55 ಕ್ವಿಂಟಾಲ್ 60 ಕೆ.ಜಿ. ಅರಿನ್ ವಶೊಕು ಗೆತೊಂದು ಬೆರ್ಮೆರೆಬೊಟ್ಟುದ ವಾಸುದೇವ ಪ್ರಭು (56) ಪನ್ಪಿನ ಜನನ್ ಅರೆಸ್ಟ್ ಮಲ್ತ್‌ದೆರ್ .
ಜೂ. 10ತಾನಿ ಪೆರಿಯಡ್ಕ ಸ್ಟೇಶನ್ ಸೀಮೆದ ಬೆರ್ಮೆರೆಬೊಟ್ಟು ಗ್ರಾಮೊದ ಮಾಂಬೊಟ್ಟು ಪನ್ಪಿನಲ್ಪ ಜನರಲ್ ಸ್ಟೋರ್‌ಡ್ ಸರಕಾರೊದ ದರ್ಮೊದ ಅನ್ನಭಾಗ್ಯ ಯೋಜನೆಗದ ಅರಿನ್ ಸಾರ್ವಜನಿಕೆರೆರ್ದ್ ಗೆತೊಂದು ರಾಶಿ ದೀತಿನ ಬಗೆಟ್ ತಿಕ್ಕಿನ ಒಲವುದ ಪ್ರಕಾರ ಒಡಿಪುದ ಆಹಾರ ನಿರೀಕ್ಷಕೆರ್ ಬೊಕ್ಕ ಪೆರಿಯಡ್ಕ ಸ್ಟೇಶನ್ ಪಿಎಸ್‌ಐ ಪುನಿತ್ ಕುಮಾರ್ ಬಿ.ಇ. ಅಚೆನೇ ಸಿಬಂದಿಲು ಆದರ್ಶ್, ಕಾರ್ತಿಕ್ ಮೊಕೆನೊಟ್ಟುಗು ಜಾಗೆಗ್ ದಾಳಿ ಮಲ್ತೆರ್.
ಈ ಪೊರ್ತುಡು ಅಂಗಡಿದ ಸಿಟೌಟ್‌ಡ್ ಒಟ್ಟು 131 ಪ್ಲಾಸ್ಟಿಕ್ ಗೋಣಿಲೆಡ್ 1,27,880 ರೂ. ಮೌಲ್ಯೊದ ಒಟ್ಟು 55 ಕ್ವಿಂಟಾಲ್ 60 ಕೆ.ಜಿ. ಅರಿ ದೆತ್ತ್‌ದೀದಿತ್ತೆರ್. ಉಂದೆನ್ ಪರಿಶೀಲಿಪುನಗ ಅನ್ನಭಾಗ್ಯ ಯೋಜನೆದ ಅಡಿಟ್ ಪಟ್ಟುನ ಅರಿ ಪನ್ದ್ ತೆರಿದ್ ಬೈದ್ಂಡ್. ಅರಿನ್ ಆಹಾರ ನಿರೀಕ್ಷಕೆರೆ ಎದುರು ಸ್ವಾಧೀನ ಮಲ್ತೊಂಡೆರ್. ಪೆರಿಯಡ್ಕ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್. ಆರೋಪಿನ್ ನ್ಯಾಯಂತಡೆಕ್ ಹಾಜಿರಿ ಮಲ್ದೆರ್.