Last updated on June 30th, 2025 at 01:25 pm
“ದಕ್ಷಿಣ ಕನ್ನಡ” ಪುದರ್ ಕೇನ್ಡಿನೇ ಏರ್ಲಾ ಎನ್ನೊಡು ಕನ್ನಡ ಪಾತೆರುನಕಲೆನನ ಜಿಲ್ಲೆ ಪನ್ದ್. ಆಂಡ ಸತ್ಯ ತೂನಗ ಮುಲ್ಪದ ಸಮಗಟ್ಟ್ 10% ಜನೊತಲಾ ಅಪ್ಪೆಬಾಸೆ ಕನ್ನಡ ಅತ್ತ್. ಈ ಪುದರ್ ಈ ಜಿಲ್ಲೆದ ಭಾಷೆ ಸಂಸ್ಕೃತಿದ ತಪ್ಪು ಕಲ್ಪನೆ ಕೊರ್ಪುಂಡು.
ಇತಿಹಾಸೊಡು ದಕ್ಷಿಣ ಕನ್ನಡ ಪುದರ್ ಎಂಚ ಬತ್ತ್ಂಡ್, ಅವು ದಾಯೆ ತಪ್ಪು?, ಈ ನೆಲತ ಭಾಷೆ, ಸಂಸ್ಕೃತಿನ್ ಪ್ರತಿನಧಿಪುನ ಪುದರ್ದ ಅವಶ್ಯಕತೆ ದಾದ ಪನ್ಪಿನೆನ್ ತೂಕ.
ಈ ಪುದರ್ದ ಮಾಮಲ್ಲ ಸಮಸ್ಯೆ ಪನ್ಡ ಈ ಪ್ರದೇಶೊನು ಕನ್ನಡ ಪಾತೆರುನ ಜಾಗೆ ಪನ್ದ್ ತಪ್ಪಾದ್ ತೋಜಾವುನ. ಆಂಡ ಮುಲ್ಪ ದಿನನಿಚ್ಚೊಲಾ ನಮ ಮುಖ್ಯವಾದ್ ಗಲಸುನ ತುಳುನ್. 90% ಜನ ಕನ್ನಡೊನು ಅಪ್ಪೆ ಭಾಷೆ ಆದ್ ಪಾತೆರುನ ಜಿಲ್ಲೆಲೆನ ಪುದರ್ಡೇ ಕನ್ನಡ ಇಜ್ಜಿ, ಆಂಡ ಮಾತಾ ಜಿಲ್ಲೆಲೆರ್ದ್ ಕಮ್ಮಿ ಕನ್ನಡ ಪಾತೆರುನ ಜಿಲ್ಲೆದ ಪುದರ್ಡ್ ಕನ್ನಡ!
ತುಳು ಸಂಸ್ಕೃತಿಡ್ ತನ್ನನೇ ಆಯಿನ, ಕರ್ನಾಟಕೊದ ಬೇತೆ ಒಲ್ಪಲಾ ತೂವರೆ ತಿಕ್ಕಂದಿನ ಅವೇತೋ ಕಲೆ, ಆಚರಣೆ, ಗೊಬ್ಬುಲು ಉಲ್ಲ. ಕೋಲ, ಕಂಬುಲ, ಆಟ, ಆಯನ, ಕಟ್ಟ, ಇಂಚ ಪನೊಂದು ಪೋಂಡ ಪಾಕ ಉಂಡು. ಆಂಡ ಉಂದು ಮಾತ ಇತ್ತಿನ ಜಿಲ್ಲೆಗ್ ಪುದರ್ ಉಂದೆಕ್ ಮಾತ ಸಂಬಂಧೊನೇ ಇಜ್ಜಂದಿನ ಭಾಷೆದ..!
ದಕ್ಷಿಣ ಕನ್ನಡ ಪನ್ಪಿ ಪುದರ್ ದೀತಿನ ಏರ್? ದಾಯೆ ದೀಯೆರ್?
ಉಂದೆನ್ ತೆರಿಯೊನರೆ ನಮ ಟಿಪ್ಪುನ ಕಾಲೊಗು ಪೋವೊಡು. ಆ ಕಾಲೊಡು ಮೈಸೂರ್ರ್ದ್ ಪರ್ಷಿಯನ್ ಭಾಷೆಡ್ ರಾಜ್ಯಭಾರ ಮಲ್ತೊಂದಿತ್ತಿನಕುಲು ಈ ಪ್ರದೇಶೊಗು ‘ಕಿನಾರಾ’ ಪನ್ದ್ ಲೆಪ್ಯೆರ ಪತ್ಯೆರ್. ಕಿನಾರಾ ಪನ್ಡ ಬರಿ, ಕರೆ ಪನ್ದ್ ಅರ್ಥ ಬರ್ಪುಂಡು, ಕಡಲ ಕರೆ, ಕಡಲ ಕಿನಾರೆ. ಆತ್ನೇಟ ವಿಜಯನಗರ, ಇಕ್ಕೇರಿ ಬೇತೆ ಬೇತೆ ರಾಜಮನೆತನದಕುಲು ಈ ಭಾಗೊನು ತುಳುದೇಶ, ತುಳುವಿಷಯ ಇಂಚ ತುಳುತ ಪುದರ್ಡೇ ಲೆಪ್ಪೆದೆರ್. ಶಾಸನೊಲೆಡ್ಲಾ ಅಂಚೆನೇ ಬರೆಪಾದೆರ್. ಅವೆರ್ದ್ ಬೊಕ್ಕ ಪೋರ್ಚುಗೀಸ್, ಬ್ರಿಟಿಷೆರೆ ಬಾಯಿಡ್ ಈ ಕಿನಾರಾ, ಕೆನರಾ ಆಂಡ್.
ಬೊಕ್ಕ ಆಡಳಿತೊಗು ಬೋಡಾದ್ ನಾರ್ತ್ ಕೆನರಾ, ಸೌತ್ ಕೆನರಾ ಆಂಡ್. ಅವೆನೇ ಬೊಕ್ಕ ಏರೋ ಭಾಂಷಾಂಧೆರ್ ಕನ್ನಡೊಗು ಜಪ್ಪಾನಗ ಉತ್ತರ ಕನ್ನಡ, ದಕ್ಷಿಣ ಕನ್ನಡ ಮಲ್ತೆರ್. ಆಂಡ ಅಲ್ಪ ಕನ್ನಡ ಇಜ್ಜಾಂಡ್ ಪನ್ಪಿನ ಅಕಲೆಗ್ ತೆರಿದಿತ್ತಿಜಾ, ಅತ್ತ್ ಬೋಡು ಬೋಡೂಂದೆ ಇಂಚ ಮಲ್ದೆರಾ ತೆರಿಯಂದ್.
ನನ ಮುಲ್ಪ ಕುಡ ಕೆಲ ಮಲ್ಲ ಮಂಡೆಲು ಬರ್ಪ, ಪೋರ್ಚುಗೀಸ್ದಕುಲೆಗ್ ‘ಡ’ ಪನರೆ ಆಪೆದಿಜಿ, ಅಂಚ ಕನ್ನಡ ಇತ್ತಿನೆನ್ ಕನರಾ ಪನ್ದ್ ಪನ್ಪೆದೆರ್ ಪನ್ದ್ ಬುದ್ದಿ ಪನ್ಪುನಕುಲು. ಪೋರ್ಚುಗೀಸೆರೆಗ್ ‘ಡ’ ಪನರೆ ಆವಂದಿನ ಸತ್ಯ, ಆಂಡ ಅಕುಲು ‘ಡ’ ಇತ್ತಿನೆನ್ ‘ದ’ ಪನ್ದ್ ಪನ್ಪೆರತ್ತಂದೆ ‘ರ’ ಪನ್ದ್ ಒಲ್ಪಲಾ ಪನ್ಪುಜೆರ್. ಮೊಕುಲು ಕನ್ನಡಗ್ Canarese ಪನ್ದ್ ಪನ್ಪೆದೆರ್ ಅತ್ತ್ಂದೆ ಒಲ್ಪಲಾ Canara ಪನ್ದ್ ಪನ್ತಿಜೆರ್.
ಬೊಕ್ಕ ಬೊಕ್ಕ ಈ ಕಥೆನೇ ಗಟ್ಟಿ ಆಂಡ್, ಕನ್ನಡೊದ ಪುದರೊಡೇ ಜಿಲ್ಲೆನ್ ಲೆಪ್ಪುಲೆಕ ಆಂಡ್.
ಅಪಗದಕುಲು ಉಂದೆನ್ ವಿರೋಧ ಮಲ್ದಿಜೆರಾ ಪನ್ದ್ ಕೇನ್ಡರ್ನ್ಡ, ವಿರೋಧ ಮಲ್ತ್ದೆರ್. 1931 ಟೇ ಶ್ರೀ ಎಸ್. ಯು. ಪಣಿಯಾಡಿಯೆರ್ ಜಿಲ್ಲಾ ಪರಿಷತ್ದ ಸಭೆಟ್ ಈ ಜಿಲ್ಲೆದ ಪುದರ್ನ್ ದಕ್ಷಿಣ ಕನ್ನಡ ರ್ದ್ ಪಗತ್ದ್ ತುಳುನಾಡ್ ಪನ್ದ್ ದೀಯೆರ ಠರಾವು ಮಲ್ತಿತ್ತೆರ್. ಅಪಗ ಠರಾವುಗು 22 ಜನ ಒಪ್ಯೆರ್, 44 ಜನ ಒಪ್ಪಿಗೆ ಇಜ್ಜಿ ಪನ್ಡೆರ್. ಅಂಚಾದ್ ಏಪೊನಾ ಸಮ ಆಪಿನ ಒಂಜಿ ತಪ್ಪು ಇನಿ 94 ವರ್ಸ ಕರೀಂಡಲಾ ಅಂಚೆನೇ ಉಂಡು, ಲೋಕೊಗು ತಪ್ಪು ಸಂದೇಶ ಕೊರೊಂದೇ ಉಂಡು. ಆನಿದ ಸಭೆಟ್ ವಿಷಯ ನಿಯಾಮಕ ಮಂಡಳಿಡ್ ಮಾತೆರ್ಲಾ ಈ ಜಿಲ್ಲೆಗ್ ‘ದಕ್ಷಿಣ ಕನ್ನಡ’ ಪುದರ್ ತಪ್ಪು ಪನ್ದ್ ಒತ್ತೊಂಡೆರ್ನ್ಡಲಾ ಪೊಸ ಪುದರ್ಡ್ ಒಪ್ಪಿಗೆ ಇಜ್ಜಂದಿನೆರ್ದಾವರ ಅಡೇಗೆ ಉಂತುದು ಪೋಂಡು.
ಇತ್ತೆಲಾ ನಮ ಪುದರ್ ಪಗಪುನ ಸುದ್ದಿ ದೆಪ್ಪುನಗ ನಮ್ಮ ಎದುರು ಒಂಜಾತ್ ಪುದರ್ಲ್ ಬರ್ಪ. ಒಂತೆ ಜನ ಕುಡ್ಲ, ಒಂತೆ ಜನ ಮಂಗಳೂರು, ಒಂತೆ ಜನ ಮಂಗಲಾಪುರಲಾ ಪನ್ಪೆರ್. ಆಂಡ ಮಾತೆರೆನಲಾ ಒಂಜೇ ಪಾತೆರ ದಕ್ಷಿಣ ಕನ್ನಡ ಪುದರ್ ಸಮ ಅತ್ತ್ ಪನ್ಪಿನವು.
ಮಂಗಳೂರ್ ಪನ್ಪಿನವು ದುಂಬುರ್ದೇ ಇತ್ತಿನ ಪುದರ್. ರಾಜೆರೆ ಕಾಲೊಡು ತುಳುನಾಡ್ನ್ ಆಡಳಿತೊಗು ಬೋಡಾದ್ ಮಂಗಳೂರ ರಾಜ್ಯ ಬೊಕ್ಕ ಬಾರ್ಕೂರ ರಾಜ್ಯ ಪನ್ದ್ ರಡ್ಡ್ ಪಾಲ್ ಮಲ್ತಿತ್ತೆರ್. ಕೆಲ ಪಾಡ್ದನೊಲೆಡ್ಲಾ ಮಂಗಳೂರ್ ಪದ ಬರ್ಪುಂಡು.
ಕುಡ್ಲ ಪನ್ಡ ತುಳುನಾಡ ಜನೊಕುಲೆಗ್ ಬೇತೆನೇ ಎಮೋಷನ್. ನಮ್ಮ ಉಡಲ್ಗ್ ಮಂಗಳೂರುರ್ದ್ ಕುಡ್ಲ ಮುಟ್ಟ. ತಮಿಳ್ನಾಡ್ರ್ದ್ ಬತ್ತ್ದ್ ಮುಲ್ಪ ಡಿಸಿ ಆಯಿನ ಅಧಿಕಾರಿ ಒರಿ ಅಮೆರಿಕಾಗ್ ಪೋದು ಅಲ್ಪ “ಯಾನ್ ಕುಡ್ಲದ ಡಿಸಿ” ಪನ್ದ್ ಪನ್ಪೆರ್ಂದಾಂಡ ಕುಡ್ಲ ಪನ್ಪಿನ ಪುದರ್ ನಮ್ಮ ಉಲಯಿಡ್ ಎಂಚ ಸೇರೊಂದುಂಡು ಪನ್ಪಿನ ಅರ್ಥ ಮಲ್ತೊನೊಲಿ.
ಮಂಗಳೂರ್ ಆವಡ್ ಕುಡ್ಲ ಆವಡ್, ಈ ಮಣ್ಣ್ಗ್ ಸೇರ್ದಿನ ಪದೊಕುಲು. ಈ ರಡ್ಡೆಟ್ ವಾ ಪುದರ್ ದೀಡ್ಯೆರ್ನ್ಡಲಾ ಎಡ್ಡೆನೇ.
ಏರೋ ದುಂಬುದಕುಲು ಮಲ್ದಿನ ತಪ್ಪುರ್ದಾವರ ನಮ್ಮ ಅತ್ತಂದಿನ, ಕೊಲೋನಿಯಲ್ ಮೈಂಡ್ಸೆಟ್ದ ಪುದರ್ರ್ದ್ ಪಿದಯಿ ಬರೊಡು.