Last updated on July 26th, 2025 at 10:20 am
ಸುಬ್ರಹ್ಮಣ್ಯ, ಜು 26: ಕರಿನ ಕೆಲ ದಿನೊಕು ದುಂಬು ನಾಪತ್ತೆ ಆದಿತ್ತಿನ ಸುಬ್ರಹ್ಮಣ್ಯ ಪ್ರಾಥಮಿಕ ಆರೋಗ್ಯ ಕೇಂದ್ರೊದ ಆಂಬ್ಯುಲೆನ್ಸ್ ಡ್ರೈವರ್ನ ಪುನ ಕುಮಾರಧಾರ ಸುದೆಟ್ ಕೋಡೆ ತಿಕ್ಕ್ದ್ಂಡ್.
ತೀರ್ದಿನಾರೆನ್ ಸುಬ್ರಹ್ಮಣ್ಯ ದೇವೆರೆಕಂಡ ನಿವಾಸಿ ಹೊನ್ನಪ್ಪೆ (52) ಪನ್ದ್ ಗುರ್ತ ಪತ್ತ್ದೆರ್.
ಸುಬ್ರಹ್ಮಣ್ಯ ಪ್ರಾಥಮಿಕ ಆರೋಗ್ಯ ಕೇಂದ್ರೊದ ಆಂಬ್ಯುಲೆನ್ಸ್ ಡ್ರೈವರ್ ಆದ್ ಬೇಲೆ ಮಲ್ತೊಂದಿತ್ತಿನ ಹೊನ್ನಪ್ಪೆರ್ ಅಂಗಾರೆರ್ದ್ ನಾಪತ್ತೆ ಆದಿತ್ತೆರ್. ಆರ್ ಕುಮಾರಧಾರ ಸುದೆತಂಚಿ ಬಲಿತೊಂದು ಪೋಪುನ ದೃಶ್ಯ ಸಿಸಿ ಕೆಮರಾಡ್ ಕೈದಾತ್ಂಡ್. ಅಂಚಾದ್ ಸುದೆಕ್ ಲಾಗಿದಿಪ್ಪೆರ್ ಪನ್ದ್ ಅಂದಾಜಿ ಮಲ್ತ್ದ್ ಕುಮಾರಧಾರ ಸುದೆಟ್ ಆನಿ ರಾತ್ರೆರ್ದೆ ನಾಡೆರೆ ಸುರು ಮಲ್ತ್ದೆರ್.
ಬುಧವಾರರ್ದ್ ಎಸ್.ಡಿ.ಆರ್.ಎಫ್. ಕೂಟ, ಈಶ್ವರ್ ಮಲ್ಪೆರೆನ ಕೂಟ, ಆಂಬ್ಯುಲೆನ್ಸ್ ಡ್ರೈವರ್ನಕಲೆನ ಕೂಟ, ರವಿ ಕಕ್ಕೆಪದವು ಕೂಟ, ಅಗ್ನಿಶಾಮಕದಳ ಸುಳ್ಯ ಬೊಕ್ಕ ಊರುದಕುಲು ಸೇರ್ದ್ ನಾಡುನ ಕಾರ್ಯಾಚರಣೆ ಮಲ್ತ್ದೆರ್. ಉಂತಾವಂದೆ ಮಲ್ತಿನ ಕಾರ್ಯಾಚರಣೆದ 4ನೇ ದಿನ ಆಯಿನ ಕೋಡೆ, ಶುಕ್ರವಾರ ಕುಮಾರಧಾರಡ್ ಮೀಪುನಲ್ಪರ್ದ್ ಸುಮಾರ್ 1 ಕಿ.ಮೀ.ದಾತ್ ತಿರ್ತ್ ಹೊನ್ನಪ್ಪೆರೆನ ಪುನ ತಿಕ್ಕ್ದ್ಂಡ್. ಸುಬ್ರಹ್ಮಣ್ಯ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.