Last updated on July 26th, 2025 at 09:52 am
ಬೊಲ್ತೇರ್, ಜು. 25: ಹನಿಮೂನ್ಗ್ ಬೊಡೆದಿನ್ ಲೆತೊಂದು ಬತ್ತಿನ ಕಂಡನೆ ರಾತ್ರೆ ಆಲೆಗ್ ಬದಿ ಕೊರ್ಯೆರ ಉಪದ್ರ ಕೊರ್ದು ಕೆರ್ಯೆರೆ ತೂಯಿನ ನಡಕೆ ನಡತಿತ್ತ್ದ್, ಇತ್ತೆ ಕಂಡನೆ ಪೊಲೀಸೆರೆಗ್ ಬಿನ್ನೆ ಆತೆ. ಕೈದಾತಿನಾಯನ್ ಬೆಂಗಳೂರು ರಾಮನಗರ ಜಿಲ್ಲೆದ ಬಿಡದಿ ತಾಲೂಕ್ದ ನಂದಗೋಕುಲ ನಿವಾಸಿ ವಿಶ್ವನಾಥೆ (24) ಪನ್ದ್ ಗುರ್ತ ಪತ್ತ್ದೆರ್.
ವಿಶ್ವನಾಥಗ್ ರಡ್ಡ್ ತಿಂಗೊಲುಗು ದುಂಬು ಮದಿಮೆ ಆದಿತ್ತ್ಂಡ್. ದಂಪತಿಲು ಜುಲೈ 22 ತಾನಿ ರಾತ್ರೆ ಉಜಿರೆದ ಹೊಟೇಲ್ಡ್ ರೂಂ ಮಲ್ತ್ದ್ ಇತ್ತೆರ್. ಹೊಟೇಲ್ ರೂಂ ಡ್ ಆರೋಪಿ ವಿಶ್ವನಾಥೆ ಜುಲೈ 22 ತ ರಾತ್ರೆ ಪರ್ತಿನ ಅಮಲ್ಡ್ ಬೊಡೆದಿಗ್ ಬದಿ ಕೊರ್ಯೆರೆ ಪನ್ಡ್ದ್ ಆಕ್ದ್ ಕೆರ್ಯೆರೆ ತೂತೆ ಪನ್ದ್ ಆರೋಪ ಮಲ್ತ್ದ್ ಬೊಡೆದಿ ಬೊಲ್ತೇರ್ ಪೊಲೀಸ್ ಸ್ಟೇಶನ್ಡ್ ಜುಲೈ 23 ತಾನಿ ಬಯ್ಯಡ್ ಕಂಡನೆ ವಿಶ್ವನಾಥನ ಮಿತ್ತ್ ಒಯಿಲ್ ಬರೆಪಾದಲ್.
ಬೊಲ್ತೇರ್ ಪೊಲೀಸ್ ಸ್ಟೇಶನ್ಡ್ ಕಂಡನೆ ವಿಶ್ವನಾಥನ ಮಿತ್ತ್ BNS 109,115(1), 85 ,4DP (ಕೆರ್ಪುನ ಪುನೆಪು, ಹಲ್ಲೆ, ಕೌಟುಂಬಿಕ ದೌರ್ಜನ್ಯ, ಬದಿ ಕೇನುನ) ಅಡಿಟ್ ಪ್ರಕರಣ ದಾಕಲಾತ್ಂಡ್. ಆರೋಪಿ ವಿಶ್ವನಾಥನ್ ಪೊಲೀಸೆರ್ ಪತ್ತ್ದ್ ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್. ನ್ಯಾಯಂತಡೆ 14 ದಿನೊತ ನ್ಯಾಯಾಂಗ ಕೈದ್ ಕೊರ್ತುಂಡು. ಹನಿಮೂನ್ಗ್ ಬತ್ತಿನಾಯೆ ಜೈಲ್ಡ್ ಕುಲ್ಲುಲೆಕ ಆತ್ಂಡ್.