Last updated on July 28th, 2025 at 10:03 am
ಬೊಲ್ತೇರ್, ಜು. 28: ಕರಿನ ಕೆಲ ದಿನೊರ್ದಿಂಚಿ ಕುಡುಮಗ್ ಮುಟ್ಟದ ಬೊಳಿಯಾರ್ಡ್ ಆನೆಲು ಬುಲೆಕ್ಲೆನ್ ಪೊಡಿ ಮಲ್ತೊಂದುಲ್ಲ. ಇನಿ ಕಾಂಡೆ ಕಾಂಡೆನೇ ಸಾದಿಡ್ ಒಂಟಿ ಆನೆ ಒಂಜಿ ತೂಯೆರೆ ತಿಕ್ಕ್ದಿತ್ತ್ದ್ ಊರ್ದಕುಲು ಪೋಡಿದ್ ಪೋತೆರ್.
ಸಾದಿ ಬರಿಟ್ ಬಸ್ ಉಂತಡೆಡ್ ಶಾಲೆ ಪೋಪಿನ ಜೋಕುಲು ಬಸ್ಗ್ ಕಾತೊಂದುಪ್ಪುನಗ ಒಂಟಿ ಆನೆ ಬಸ್ ಉಂತಡೆದಂಚಿ ಬಲ್ತೊಂದು ಬೈದ್ಂಡ್. ಈ ಪೊರ್ತುಡು ಬಸ್ ಉಂತಡೆಡ್ ಇತ್ತಿನ ಜೋಕುಲು ನೇಲ್ಯ ಆನೆನ್ ತೂದು ಪೋಡಿದ್ ಮುಟ್ಟಡಿತ್ತಿನ ಅಂಗಡಿದುಲಯಿ ದೆಂಗ್ದ್ ಕುಲ್ದೆರ್.
ಬೊಕ್ಕ ಆನೆ ಕಾಡ್ದಂಚಿ ಪೋದಿತ್ತ್ದ್, ಮಲ್ಲ ಪಡಾಯಿ ಒಂಜಿ ತತ್ತ್ದ್ಂಡ್. ಕರಿನ ರಡ್ಡ್ ವಾರೊಗು ದುಂಬು ಕೊಕ್ಕಡದ ಸೌತಡ್ಕ ಗುಂಡಿ ಪನ್ಪಿನಲ್ಪ ಆಂಜೊವು ಒರ್ಯನ್ ಕಾಡಾನೆ ದಾಳಿ ಮಲ್ತ್ದ್ ಕೆರ್ದಿತ್ತ್ದ್, ಇತ್ತೆ ಈ ಒಂಟಿ ಆನೆ ತೋಜಿದಿನ ಜನೊಕ್ಲೆಡ ಬೊಕಲಾ ಪೋಡಿಗೆ ಎಚ್ಚ ಮಲ್ದ್ಂಡ್.
ಬೊಲ್ತೇರ್ ಸೀಮೆಡ್ ಏಪೊಲಾ ಕಾಡಾನೆ ದಾಳಿರ್ದಾವರ ಬೆನ್ನಿದಕ್ಲೆಗ್ ನಷ್ಟ ತಪ್ಪುಜಿ. ಇಂದೆತ ನಡುಟು ಕಾಡಾನೆಲು ನರಮಾನ್ಯನ ಮಿತ್ತ್ಲಾ ದಾಳಿ ಮಲ್ಪೆರ ಪತ್ತ್ದ. ಉಂದೆರ್ದಾವರ ಕಾಂಡೆ ಶಾಲೆ ಜೋಕುಲು, ಪೇರ್ ಕೊನೊಪುನಕುಲು ಜೂವ ಕೈಟ್ ಪತೊಂದೇ ಪೋವೊಡಾಪಿನ ಪರಿಸ್ಥಿತಿ ಬೈದ್ಂಡ್.