Last updated on July 28th, 2025 at 08:55 am
ಕುಡ್ಲ, ಜು. 27: ಸುಮಾರ್ 10 ವರ್ಸೊರ್ದಿಂಚಿ ದೆಂಗ್ತಪ್ಪಾದಿತ್ತಿನ ಶೂಟೌಟ್ ಪ್ರಕರಣೊದ ಆರೋಪಿ ಮಹಾರಾಷ್ಟ್ರೊದ ಕರಾಡ್ ಗಣೇಶ್ ಲಕ್ಷ್ಮಣ್ ಸಕಟ್ ಪನ್ಪಿನಾಯನ್ ಉರ್ವ ಪೊಲೀಸೆರ್ ಕೈದ್ ಮಲ್ದೆರ್.
ಬಿಜೈದ ಭಾರತಿ ಬಿಲ್ಡರ್ಸ್ ಕಚೇರಿಡ್ ಅಂಡರ್ವರ್ಲ್ಡ್ ಡಾನ್ ರವಿ ಪೂಜಾರಿನ ಜನ 2014ಟ್ ಶೂಟೌಟ್ ಮಲ್ತಿತ್ತೆರ್. ಈ ಬಗೆಟ್ ಉರ್ವ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ಂಡ್. ಈ ಪ್ರಕರಣೊದ ಆರೋಪಿ ಆದಿತ್ತಿನ ಕರಾಡ್ ಗಣೇಶ್ 2015ರ್ದ್ ನ್ಯಾಯಂತಡೆದ ಎದುರು ಬರಂದೆ ದೆಂಗ್ದ್ ಕುಲ್ಲುದಿತ್ತೆ. ಆಯನ ಮಿತ್ತ್ ಕುಡ್ಲದ ಜೆಎಂಎಫ್ಸಿ 3ನೇ ನ್ಯಾಯಂತಡೆ ವಾರಂಟ್ ಪಿದಡ್ಪಾದಿತ್ತ್ಂಡ್.
ಆರೋಪಿನ ಮಿತ್ತ್ ಕಾವೂರು ಪೊಲೀಸ್ ಸ್ಟೇಶನ್ ಬೊಕ್ಕ ಮಹಾರಾಷ್ಟ್ರದ ಕರಾಡ್ ಸ್ಟೇಶನ್ಡ್ಲಾ ಪ್ರಕರಣೊಲು ದಾಕಲಾದುಲ್ಲ. ಇತ್ತೆ ಆರೋಪಿನ್ ನ್ಯಾಯಂತಡೆದ ಎದುರು ಹಾಜಿರ್ ಮಲ್ತಿತ್ತ್ದ್, ನ್ಯಾಯಾಂಗ ಕೈದ್ ಕೊರ್ತುಂಡು.
ಪೊಲೀಸ್ ಆಯುಕ್ತೆ ಸುಧೀರ್ ಕುಮಾರ ರೆಡ್ಡಿನ ಮಾರ್ಗದರ್ಶನೊಡು ಉರ್ವ ಪೊಲೀಸೆರ್ ಆರೋಪಿನ್ ಮಹಾರಾಷ್ಟ್ರದ ಪಂಡರಾಪುರಡ್ ಪತ್ತ್ದೆರ್. ಕಾರ್ಯಾಚರಣೆಡ್ ಉರ್ವ ಠಾಣಾ ನಿರೀಕ್ಷಕೆರೆ ಮುತಾಲಿಕೆಡ್ ಎಎಸ್ಸೈ ವೇಣುಗೋಪಾಲ್, ಹೆಡ್ ಕಾನ್ಸ್ಟೇಬಲ್ ಪ್ರಮೋದ್, ನಾರಾಯಣೆ, ಗೋವಿಂದರಾಜ್ ಪಾಲ್ಪಡೆದಿತ್ತೆರ್.