Last updated on July 28th, 2025 at 07:04 am
ಒಡಿಪು, ಜು 27: ಶಿರ್ವಡ್ ಇಂಚಿಪ ನಡತಿನ ಇಲ್ಲ ಕಲ್ವೆದ ಪ್ರಕರಣೊಡು ಒಡಿಪು ಜಿಲ್ಲಾ ಪೊಲೀಸೆರ್ ಮಲ್ಲ ಅಂತರ್ ಜಿಲ್ಲಾ ಕಲ್ವನ್ ಕೈದ್ ಮಲ್ತ್ದೆರ್.
ಕೈದಾತಿನಾಯನ್ ಅಬುಬಕರ್ ಅಲಿಯಾಸ್ ಅಬ್ದುಲ್ ಖಾದರ್ ಅಲಿಯಾಸ್ ‘ಇತ್ತೆ ಬರ್ಪೆ ಅಬೂಬಕ್ಕರ್’ ಪನ್ದ್ ಗುರ್ತ ಪತ್ತ್ದೆರ್.
ಶಿರ್ವದ ಮಟ್ಟಾರ್ ಸಾದಿದ ಕೈತಲ್ದ ಪವಿತ್ರ ಪೂಜಾರ್ತಿ ಮೆರೆನ ಇಲ್ಲಡ್ ಜೂನ್ 27, 2025 ತ ರಾತ್ರೆ ಕಲ್ವೆ ನಡತಿತ್ತ್ಂಡ್. ಪೊಂಜೊವು ಬೊಕ್ಕ ಆರೆನ ಮಗೆ ಉಲಯಿ ಜೆತ್ತುಪ್ಪುನಗ ಆರೋಪಿಲು ಕಂಡಿದ ಕೊಕ್ಕೆಲೆನ್ ಪೊಲ್ತ್ದ್ ಕೊಕ್ಕೆ ರಾಡ್ ಗಲಸ್ದ್ ಬಾಕಿಲ್ನ್ ದೆತ್ತ್ದೆರ್. ಉಲಯಿ ಪೊಗ್ಗುದ್ ಸುಮಾರ್ 12.75 ಲಕ್ಷ ರೂ. ಮೌಲ್ಯೊದ ಸುಮಾರ್ 137 ಗ್ರಾಂ ಪದ್ದೈ ಬಂಗಾರ್ನ್ ಲಕ್ಕಾದೆರ್. ಶಿರ್ವ ಪೊಲೀಸ್ ಸ್ಟೇಶನ್ಡ್ ಅಪಗನೇ ಪ್ರಕರಣ ದಾಕಲಾತ್ಂಡ್.
ಜಡ್ತೆ ಮಲ್ತಿನ ಪೊಲೀಸೆರ್ ಕಲ್ವನ್ ಪತ್ತುನೆಟ್ ಯಶಸ್ವಿ ಆತೆರ್. ಆರೋಪಿನ ಕೈರ್ದ್ ಇಲ್ಲ್ ಕಂಡ್ನಗ ಗಲಸ್ದಿನ ಜುಪಿಟರ್ ಸ್ಕೂಟರ್ದ ಒಟ್ಟುಗು ಸುಮಾರು 66.760 ಗ್ರಾಂ ಬಂಗಾರ್ ವಶೊಕು ಗೆತೊಂದೆರ್. ವಶೊಕು ಗೆತೊಂದಿನ ಸೊತ್ತುಲೆನ ಒಟ್ಟು ಮೌಲ್ಯ 7 ಲಕ್ಷ ರೂ. ಆವು ಪನ್ದ್ ಅಂಜಾಜಿ ಪಾಡ್ದೆರ್. ಬೇತೆ ಜಿಲ್ಲೆಲೆಡ್ 30 ಗ್ಲಾ ಎಚ್ಚ ಕಲ್ವೆದ ಪ್ರಕರಣೊಲೆಡ್ ಆರೋಪಿನ ಕೈ ಉಂಡು ಪನ್ದ್ ವರದಿ ಆತ್ಂಡ್.