Last updated on July 14th, 2025 at 12:20 pm
ಬೆಂಗಳೂರು, ಜು. 14: ಒಂಜಿ ಕಾಲೊಡು ದಕ್ಷಿಣ ಭಾರತೊದ ಚಿತ್ರರಂಗೊಡು ರಾಣಿ ಲೆಕ ಮೆರೆದಿನ, ಬಹುಭಾಷಾನಟಿ ಬಿ.ಸರೋಜಾದೇವಿ ಮೇರ್ ತೀರ್ಯೆರ್. 87 ವರ್ಸ ಪ್ರಾಯ ಆದಿತ್ತ್ದ್ ಉಸಾರ್ದಾಂತೆ ಇತ್ತಿನ, ಸರೋಜಾದೇವಿ ಬೆಂಗಳೂರುದ ಯಶವಂತಪುರಡ್ ಇಪ್ಪುನ ಮಣಿಪಾಲ್ ಆಸ್ಪತ್ರೆಡ್ ತೀರ್ದೆರ್.
ದಕ್ಷಿಣಭಾರತೊದ ಚಿತ್ರರಂಗೊಡು ಸರೋಜಾದೇವಿ ಸೂಪರ್ ಸ್ಟಾರ್ ನಟಿ ಆದಿತ್ತೆರ್, ಅಪಗದ ಕಾಲೊದ ದಕ್ಷಿಣ ಭಾರತ ಚಿತ್ರರಂಗೊದ ಮಾತಾ ಸೂಪರ್ ಸ್ಟಾರ್ಲೆನ ಒಟ್ಟುಗು ಬೇಲೆ ಮಲ್ತಿತ್ತೆರ್.
ಬಿ.ಸರೋಜಾದೇವಿ ಮೆರೆನ್ ‘ಅಭಿನಯ ಸರಸ್ವತಿ’ ಪನ್ದ್ ಲೆಪ್ಪೆದೆರ್. ಮೇರ್ ಕನ್ನಡ, ತಮಿಳು, ತೆಲುಗು ಬೊಕ್ಕ ಹಿಂದಿ ಚಿತ್ರರಂಗೊಡು ಬಾರೀ ಪುದರ್ ಮಲ್ದೆರ್. ಮೇರ್ 1955 ರ್ದ್ 1984 ಮುಟ್ಟ ಬೆರಿಬೆರಿ 161 ಚಿತ್ರೊಲೆಡ್ ನಾಯಕಿ ಆದ್ ನಟನೆ ಮಲ್ದಿನ ದಾಕಲೆಲಾ ಬರೆತೆರ್.
ನಟಿ ಸರೋಜಾ ದೇವಿ ಮೆರೆಗ್ ಭಾರತ ಸರ್ಕಾರೊದ ಮಾಮಲ್ವ ನಾಗರಿಕ ಪ್ರಶಸ್ತಿಲಾಯಿನ ಪದ್ಮಶ್ರೀ, ಪದ್ಮಭೂಷಣ ಬೊಕ್ಕ ಜೀವಮಾನ ಸಾಧನೆ ಪ್ರಶಸ್ತಿಲು ತಿಕ್ಕ್ದ ಅಂಚೆನೇ ಬೇತೆ ಪಾಕ ಸರ್ಕಾರಿ ಪ್ರಶಸ್ತಿಲುಲಿ ಮೆರೆನ್ ನಾಡೊಂದು ಬೈದ.
ಭಾರತೀಯ ಚಿತ್ರರಂಗೊದ ದಂತಕಥೆ, ಅಭಿನಯ ಸರಸ್ವತಿ ಬಿ ಸರೋಜಾದೇವಿ ಮೆರೆನ ಆತ್ಮೊಗು ಶಾಂತಿ ತಿಕ್ಕಡ್.
