Last updated on July 14th, 2025 at 08:38 am
ಕುಡ್ಲ, ಜು. 14: ಹೋಟೆಲ್, ರೆಸ್ಟೋರೆಂಟ್ಲೆನ ಅಡ್ವರ್ಟೈಸಿಂಗ್ಡ್ ಆನ್ಲೈನ್ಡ್ 5 ಸ್ಟಾರ್ ರೇಟಿಂಗ್ ಕೊರ್ನ್ಡ ಕಮಿಷನ್ ತಿಕ್ಕುಂಡು ಪನ್ಪಿನ ಆಸೆಡ್ ಆಂಜೊವು ಒರಿ ಆನ್ಲೈನ್ ದಗೆಕ್ ಬೃರ್ದು ₹ 20.62 ಲಕ್ಷ ಕಲೆವೊಂದೆರ್. ಈ ಬಗೆಟ್ ಸಂತ್ರಸ್ತೆ ಆಂಜೊವು ಬರೆಪಾದಿನ ಒಯಿಲ್ದ ಆಧಾರೊಡು ಬಜ್ಪೆ ಸ್ಟೇಶನ್ಡ್ ಎಫ್ಐಆರ್ ದಾಕಲಾತ್ಂಡ್.
“ಇನ್ಸ್ಟಾಗ್ರಾಮ್ಡ್ ಇಲ್ಲಡೇ ಬೇಲೆ ಮಲ್ಪುನ ಅಂಚೆನೇ ಪಾರ್ಟ್ ಟೈಮ್ ಬೇಲೆರೆನ ಬಗೆತ ಅಡ್ವರ್ಟೈಸ್ಮೆಂಟ್ ಮೇ 6ತಾನಿ ತೂದಿತ್ತೆ. ಅವೆಟ್ ಇತ್ತಿನ ವಾಟ್ಸ್ ಆ್ಯಪ್ ನಂಬರ್ಗ್ ಮೆಸೇಜ್ ಮಲ್ಪುನಗ, ಮೂಜಿ ಟೆಲಿಗ್ರಾಂ ಲಿಂಕ್ ಕಡಪುಡ್ದಿತ್ತೆರ್. ಹೋಟೆಲ್, ರೆಸ್ಟೋರೆಂಟ್ಲೆನ ಆನ್ಲೈನ್ ಅಡ್ವರ್ಟೈಸ್ಮೆಂಟ್ಗ್ ಲೈಕ್ ಮಲ್ತ್ದ್ 5 ಸ್ಟಾರ್ ರೇಟಿಂಗ್ ಕೊರ್ನ್ಡ ಕಮಿಷನ್ ಕೊರ್ಪ ಪನ್ದ್ ಅವೆಟ್ ತೆರಿಪಾದಿತ್ತೆರ್. ಅವೆರ್ದ್ ಬೊಕ್ಕ ಮೀನಾ ರೆಡ್ಡಿ ಪನ್ಪಿನಾರ್ ಕಾಂಟಾಕ್ಟ್ ಮಲ್ತ್ದ್ ಬ್ಯಾಂಕ್ ಅಕೌಂಟ್ದ ಒಲವು ಗೆತೊಂದೆರ್. ಈ ಬೇಲೆಡ್ ಸುರುಟು ಎಂಕ್ ₹ 120, ₹ 200… ಇಂಚ ಕಾಸ್ ಕಡಟುಡೊಂದಿತ್ತೆರ್” ಪನ್ದ್ ಸಂತ್ರಸ್ತೆ ಅಂಜೊವು ಒಯಿಲ್ಡ್ ಬರೆಪಾದೆರ್ ಪನ್ದ್ ಪೊಲೀಸೆರ್ ಒಲವು ಕೊರ್ತೆರ್.
‘ಅವೆರ್ದ್ ಬೊಕ್ಕ ಟ್ರೇಡಿಂಗ್ ಅಕೌಂಟ್ದ ಟಾಸ್ಕ್ ಕಂಪ್ಲೀಟ್ ಮಲ್ತ್ದ್ ಎಚ್ಚ ಕಾಸ್ ಮಲ್ಪೊಲಿ ಪನ್ದ್ ತೊಡು ಪುಟ್ಟಾದೆರ್. ಅಕ್ಲೆನ ಸೂಚನೆದ ಪ್ರಕಾರ ರಾಜೇಶ್ ಶರ್ಮ ಪನ್ಪಿನಾರೆಡ ಪಾತೆರ್ಯೆ. ಆರೆನ ಮುಕೇನ ಲಕ್ಕಿ ಸಿಂಗ್ ಬೊಕ್ಕ ರವಿ ಪಾಟೇಲ್ನ ಗುರ್ತ ಆಂಡ್. ಅಕುಲು ಕೊರ್ನ ಸೂಚನೆದ ಪ್ರಕಾರ ಮೆಲ್ಲ ಮೆಲ್ಲ ಬೇತೆ ಬೇತೆ ಬ್ಯಾಂಕ್ ಅಕೌಂಟ್ಲೆಗ್ ಒಟ್ಟು ₹ 20.62 ಲಕ್ಷ ಕಾಸ್ ಕಟ್ಟ್ದೆ. ಯಾನ್ ಕಟ್ಟಿನ ಕಾಸ್ನ್ಲಾ ಕೊರಂದೆ, ಕಮಿಷನ್ಲಾ ಕೊರಂದೆ ದಗೆ ಮಲ್ದೆರ್ ಪನ್ದ್ ಸಂತ್ರಸ್ತೆ ಆಂಜೊವು ಆರೋಪ ಮಲ್ದೆರ್’ ಪನ್ದ್ ಪೊಲೀಸೆರ್ ತೆರಿಪಾದೆರ್.