Last updated on July 21st, 2025 at 10:44 am
ಬಂಟ್ವಾಳ, ಜು. 21: ಪುಗರ್ತೆದ ತೆಂಕುತಿಟ್ಟ್ ಯಕ್ಷಗಾನೊದ ಬಣ್ಣದ ವೇಷಧಾರಿ ಸಿದ್ಧಕಟ್ಟೆ ಸದಾಶಿವ ಶೆಟ್ಟಿಗಾರ್ (60) ಮೇರ್ ಉಸಾರ್ದಾಂತೆ ಕುಡ್ಲದ ಆಸ್ಪತ್ರೆಡ್ ಐತಾರ ತೀರ್ದೆರ್.
ಪುಂಜಾಲಕಟ್ಟೆ ಮುಟ್ಟದ ಸಂಗಬೊಟ್ಟು ಗ್ರಾಮೊದ ಮಂಚಕಲ್ಲ್ ನಿವಾಸಿ ಆದಿತ್ತಿನ ಮೇರ್ ಹನುಮಗಿರಿ ಮೇಳೊದ ಪೆರಿಯ ಕಲಾವಿದೆ ಆದಿತ್ತೆರ್. ಮೇರ್ ಬೊಡೆದಿ, ಇರ್ವೆರ್ ಆಣ್ ಜೋಕುಲು, ಒರ್ತಿ ಮಗಲೆನ್ ಅಗತ್ದೆರ್.
ಇಂಚಿಪ ಮುಟ್ಟಲಾ ಹನುಮಗಿರಿ ಮೇಳೊಡು ಬಣ್ಣದ ವೇಷಧಾರಿ ಆದಿತ್ತಿನ ಸದಾಶಿವ ಶೆಟ್ಟಿಗಾರ್ ಮೇರ್, ಮೂಜಿ ದಶಕೊರ್ದ್ಲಾ ಎಚ್ಚ ಕಾಲ ಯಕ್ಷಗಾನ ತಿರ್ಗಾಟ ಮಲ್ತ್ದೆರ್. ಮೇರ್ ಪುಗರ್ತೆದ ಯಕ್ಷಗಾನ ಗುರುಕುಲಾಯಿನ ರೆಂಜಾಳ ರಾಮಕೃಷ್ಣ ರಾವ್ ಬೊಕ್ಕ ಬಣ್ಣದ ಮಹಾಲಿಂಗೆರೆಡ ನಾಟ್ಯಾಭ್ಯಾಸ ಕಲ್ತಿತ್ತೆರ್.
ಸದಾಶಿವ ಶೆಟ್ಟಿಗಾರ್ ಮೇರ್ ತನ್ನ 36 ವರ್ಸೊದ ಪ್ರಯಾಣೊಡು, ಕಟೀಲ್, ಕುಡುಮ, ಪೊಸನಗರ, ಎಡನೀರ್ ಬೊಕ್ಕ ಹನುಮಗಿರಿತಂಚಿನ ಪುಗರ್ತೆದ ಮೇಳೊಲೆಡ್ ಪ್ರದರ್ಶನ ಕೊರ್ತೆರ್. ಕರಿನ ಕೆಲ ತಿಂಗೊಲುಗು ದುಂಬು ಹನುಮಗಿರಿ ಮೇಳೊಡು ತಿರ್ಗಾಟ ಉಂತಾದ್ ಮೇರ್ ನಿವೃತ್ತಿ ಘೋಷಣೆ ಮಲ್ತಿತ್ತೆರ್.
ಒಂತೆ ಸಮೆರ್ದಿಂಚಿ ಉಸಾರ್ ತತ್ತ್ದ್ ಇತ್ತಿನ ಮೆರೆಗ್ 10 ದಿನೊಕು ದುಂಬಾತೆ ಮಂಗಳೂರು ವಿಶ್ವವಿದ್ಯಾಲಯದ ಡಾ. ಪಿ. ದಯಾನಂದ ಪೈ ಬೊಕ್ಕ ಪಿ. ಸತೀಶ್ ಪೈ ಯಕ್ಷಗಾನ ಅಧ್ಯಯನ ಕೇಂದ್ರ ಯಕ್ಷಮಂಗಳ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತಿತ್ತ್ಂಡ್. ಶ್ರೀರಾಮ ವಿಠಲ ಪ್ರಶಸ್ತಿ, ಕಟೀಲ್ ಗೋಪಾಲಕೃಷ್ಣ ಆಸ್ರಣ್ಣ ಪ್ರಶಸ್ತಿ, ಕೀಲಾರ್ ಗೋಪಾಲಕೃಷ್ಣಯ್ಯ ಪ್ರಶಸ್ತಿ ಬೊಕ್ಕ ಅರಸಂಕಲ ಪ್ರಶಸ್ತಿ ಸೇರ್ದ್ ಬೇತೆ ಪ್ರಶಸ್ತಿಲೆನ್ಲಾ ಆರ್ ಗೆಂದ್ದಿತ್ತೆರ್.