Last updated on July 9th, 2025 at 11:09 am
ಕುಡ್ಲ, ಜು. 09: ಕೊಡಿಯಾಲ್ಬೈಲ್ಡ್ ಇಪ್ಪುನ ಪೌಷ್ಟಿಕಾಂಶ ಉತ್ಪನ್ನೊಲೆನ ಅಂಗಡಿರ್ದ್ 3.30 ಲಕ್ಷ ರೂ. ಕಾಸ್ ಇತ್ತಿನ ಲಾಕರ್ ಕಂಡಿನ ವಿಷಯೊಡು, ಕದ್ರಿ ಪೊಲೀಸೆರ್ ಇರ್ವೆರ್ ಆರೋಪಿಲೆನ್ ಕೈದ್ ಮಲ್ದೆರ್.
ಕೈದಾತಿನಕಲೆನ್ ಚಿಕ್ಕಮಗಳೂರ್ದ ಕಡೂರ್ದ ಯಶವಂತ ನಾಯಕ್ (19) ಬೊಕ್ಕ ಇತ್ತೆ ಮಲ್ಲಿಕಟ್ಟೆಡ್ ಇಪ್ಪುನ ಶಕ್ತಿನಗರದ ಲೇಬರ್ ಕಾಲೋನಿದ ನಿರೂಪ್ ಅಲಿಯಾಸ್ ಶ್ರವಣ್ (19) ಪನ್ದ್ ಗುರ್ತ ಪತ್ತ್ದೆರ್.
ಯಶವಂತ್ ಅಂಗಡಿಡ್ ಪಗೆಲ್ದ ಸೆಕ್ಯೂರಿಟಿ ಗಾರ್ಡ್ ಆದ್ ಬೇಲೆ ಮಲ್ತೊಂದಿತ್ತೆ, ಆಂಡ ದುಂಬು ಅವ್ವೇ ಸಂಸ್ಥೆಡ್ ಬೇಲೆ ಮಲ್ತೊಂದಿತ್ತಿನ ಶ್ರವಣ್ ಒಂತೆ ಸಮೆಕ್ ದುಂಬು ಬೇಲೆ ಬುಡ್ದಿತ್ತೆ.
ಜೂನ್ 28 ದ ರಾತ್ರೆ, ಅಂಗಡಿದ ಸಿಬ್ಬಂದಿ ದಿನೊತ ವೈವಾಟ್ಡ್ ಒಟ್ಟಾತಿನ 3,33,030 ರೂ.ನ್ ಲಾಕರ್ಡ್ ದೀದ್ ಅಂಗಡಿಗ್ ಬೀಗ ಪಾಡ್ದಿತ್ತೆರ್. ಆಂಡ, ಜೂನ್ 30 ದ ಕಾಂಡೆ, ಅಂಗಡಿದ ಶಟರ್ ಲಾಕ್ ಓಪನ್ ಇಪ್ಪುನ ತೋಜಿದ್ ಬೈದ್ಂಡ್. ಪರಿಶೀಲನೆ ಮಲ್ಪುನಗ, ಲಾಕರ್ ಕಾಣೆ ಆತಿನ ತೆರಿದ್ ಬೈದ್ಂಡ್. ಕದ್ರಿ ಪೊಲೀಸ್ ಸ್ಟೇಶನ್ಡ್ ಅಪಗನೇ ಒಯಿಲ್ ಬರೆಪಾದೆರ್.
ನಡಕೆ ನಡಪುನ ಒಂತೆ ದಿನೊಕು ದುಂಬು ಅಂಗಡಿದ ಶಟರ್ ಲಾಕ್ದ ಕೀ ಕಾಣೆ ಆದಿತ್ತ್ಂಡ್ ಪನ್ದ್ ವರದಿ ಆತ್ಂಡ್. ಕಲ್ವೆರ್ ಅವ್ವೇ ಕೀ ಗಲಸ್ದಿಪ್ಪೊಡು ಪನ್ದ್ ತನಿಖಾಧಿಕಾರಿಲು ಎನ್ನ್ದೆರ್. ಜಡ್ತೆದ ಆಧಾರೊಡು, ಪೊಲೀಸೆರ್ ಇರ್ವೆರ್ ಆರೋಪಿಲೆ ಮಿತ್ತ್ ಅನುಮಾನ ಬತ್ತ್ದ್, ವಿಚಾರಣೆ ಮಲ್ಪುನಗ ಇರ್ವೆರ್ಲಾ ಅಪರಾಧೊನು ಒತ್ತ್ಂದೆರ್.
ಆರೋಪಿಲು ಕಂಡಿನ ಲಾಕರ್, ಕಾಸ್ ಬೊಕ್ಕ ಅಪರಾಧೊಗು ಗಲಸ್ದಿನ ಬೈಕ್ನ್ ಪೊಲೀಸೆರ್ ವಶೊಕು ಗೆತೊಂದೆರ್.