Last updated on July 17th, 2025 at 06:17 pm
ತುಳುವೆರೆಗ್ ಆಟಿ ಒಂಜಿ ಬಾರೀ ವಿಶೇಷ ತಿಂಗೊಲು. ನಮ್ಮ ಪೆರಿಯಾಕ್ಲು ಆಟಿಡ್ ಕೀರ್ಕುಟುದ್ ಬರ್ಪಿನ ಬರ್ಸೊನು ವಾ ವಾ ನಮೂನೆದ ಬಂಙ ಬತ್ತ್ದ್ ಕರಿತ್ದೆರಾ ಅಕ್ಲೆಗ್ಲಾ, ಅಕುಲು ನಂಬಿ ಸತ್ಯೊಲೆಗ್ಲಾ ಮಾತ್ರ ತೆರಿಯು.
ಆಂಡ ಇನಿತ ಕಾಲ ಅಂಚ ಇಜ್ಜಿ. ಬೋಡುಬೋಡಾಯಿ ಸೊತ್ತು ಬೋಡುಬೋಡಾಪಿ ಪೊರ್ತುಗು ತಿಕ್ಕುನ ಈ ಕಾಲ ಆಂಡಲಾ ನಮ್ಯ ದುಂಬುದಕುಲು ಬೈದಿ ಬಂಙೊನು ಮದತ್ ಬುಡ್ತುಜ. ಸಿರ್ಕ್-ಸಂಕಡ-ಮಾರಿದ ತಿಂಗೊಲು ಆಟಿಡೇ ನಮ ಬಾರೀ ಗೌಜಿಡ್ ಆಟಿಡೊಂಜಿ ಕೂಟೊಲೆನ್ ಮಲ್ತೊಂದುಲ್ಲ. ಆಟಿ ಕಾಲಿ ಗೌಜಿಗ್ ಆವಂದೇ, ಆಟಿದ ತಿಂಗೊಲುಡು ಪೆರಿಯಾಕ್ಲು ಮೈಸರಿ ಕಾತೊನರೆ ಮಲ್ಪೆದಿನ ಒಂಜೊಂಜೇ ಅಟಿಲ್ನ್ ನಮ #ಆಟಿದ_ಅಟಿಲ್ ಸಂಚಿಕೆಲೆಡ್ ತೂವೊಂದು ಪೋಯಿ.
ಸೇರೆ ಕೆತ್ತೆದ ಗಂಜಿ
ಕೆಲಜನೊಕು ಸೇರೆದ ಅಡಿಕ್ ಪೋಂಡ ಯಾರು, ಮೈ ಇಡೀ ದರ್ಪು ಬೂರುಂಡು, ನನ ಒಂತೆ ಜನೊಕು ಸೇರೆದ ಕಾತ್ ಆಕ್ಂಡ ಯಾರು, ಕೆಂಪಾದಾಂಡ್. ಅಂಚಿನ ಸೇರೆಡ್ಲಾ ಪಾಕ ಮರ್ದ್ದ ಗುಣೊಕುಲು ಉಲ್ಲ. ಸುರುಕು ತೇರೆ ಕೆತ್ತೆದ ಗಂಜಿ ಮಲ್ಪುನು ಎಂಚ ತೂಕ, ಬೊಕ್ಕ ಐಟಿಪ್ಪುನ ಮರ್ದ್ದ ಗುಣೊಕ್ಲೆನ್ ತೂಕ.
ಸೇರೆದ ಕೆತ್ತೆನ್ ಜಾಗ್ರ್ತೆಡ್ ದೆತ್ತ್ದ್ ಪೂಲು ಮಲ್ಪೊಡು. ಈ ಪೂಲುಲೆನ್ ಅರಿತ ಒಟ್ಟುಗು ಬೆಯ್ಪಾವೊಡು. ಕಜೆ ಅರಿ ಆಂಗ ಎಡ್ಡೆ. ಬೆಯ್ತಿನೇ ಅವು ಚೆನ್ನೆ ರಂಗ್ಗ್ (ಕೆಂಪು) ಬರ್ಪುಂಡು. ಬೊಕ್ಕ ಈ ಕೆತ್ತೆದ ಪೂಲುಲೆನ್ ಪೆಜ್ಜಿಂಡ ಸೇರೆ ಕೆತ್ತೆದ ಗಂಜಿ ರೆಡಿ.
ಆಟಿದ ಅಮಾಸೆದಾನಿ ಪಾಲೆಕೆತ್ತೆದ ಕಷಾಯ ಪರ್ನಗ ಉಷ್ಣ ಆಂಡ ಸೇರೆ ಕೆತ್ತೆದ ಗಂಜಿ ಉನ್ಪೆರ್. ಬಂಜಿಬೇನೆಗ್ಲಾ ಈ ಗಂಜಿ ಮರ್ದ್.
ಎಲ್ಯ ಜೋಕುಲೆಗ್ ಉರ್ಚುನ ಕಕ್ಕುನ ಸುರು ಆನಗ ಸೇರೆದ ಕೆತ್ತೆನ್ ಸೂಟ್ ಕಾಯ್ತ್ದ್ ಅಯ್ತ ರಸ ಪರ್ನ್ಡ ಕಮ್ಮಿ ಆಪುಂಡು. ಪೆತ್ತ, ಎರ್ಮೆಲು ಕಂಜಿ ಪಾಡ್ದುಪ್ಪುನಗ ಸೇರೆ ಕೆತ್ತೆದ ಗಂಜಿ ಕೊರ್ಪುನು ಎಡ್ಡೆ.