Last updated on July 31st, 2025 at 07:47 pm
ಬಂಟ್ವಾಳ, ಜು. 31: ಕೆಲ ದಿನೊರ್ದಿಂಚಿ ನಾಪತ್ತೆ ಆದಿತ್ತಿನ ಬಂಟ್ವಾಳ ತಾಲೂಕ್ದ ಕಡೇಸ್ವಾಲದ ಹೇಮಂತ್ ಆಚಾರ್ಯ (21) ಪನ್ಪಿನಾರೆನ ಪುನ ಕಂಕನಾಡಿ ಪೊಲೀಸ್ ಸ್ಟೇಶನ್ ಸೀಮೆದ ಬಜಾಲ್ ಮೊಗೇರ್ ಪನ್ಪಿನಲ್ಪ ನೇತ್ರಾವತಿ ಸುದೆತ ನಡುಟು ಪಾಂಬೊಂದುಪ್ಪುನ ಸ್ಥಿತಿಟ್ ತಿಕ್ಕ್ದ್ಂಡ್.
ನಡಕೆದ ಒಲವು
ಜುಲೈ 27ತಾನಿ ಹೇಮಂತ್ ಇಲ್ಲರ್ದ್ ನಾಪತ್ತೆ ಆದಿತ್ತಿನ ಬಗೆಟ್ ಜುಲೈ 28 ದಾನಿ ಸೋಮಾರ ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್. ಜುಲೈ 29 ದಾನಿ ಅಂಗಾರೆ ಮಧ್ಯಾಹ್ನದ ಪೊರ್ತು ಬಂಟ್ವಾಳ ನಗರ ಪೊಲೀಸ್ ಸ್ಟೇಶನ್ ಸೀಮೆದ ಜಕ್ರಿಬೊಟ್ಟು ಡ್ಯಾಂದ ಕೈತಲ್ ಜವನನ ಸ್ಕೂಟರ್ ಬೊಕ್ಕ ಮೊಬೈಲ್ ತಿಕ್ಕ್ದಿತ್ತ್ಂಡ್. ಆನಿಯೇ ಮಧ್ಯಾಹ್ನರ್ದ್ ಬೊಕ್ಕ ಊರ್ದ ಮೀಂದುನಕಲೆನ ಕೂಟ, ಅಗ್ನಿಶಾಮಕದಳ ಬೊಕ್ಕ ಬಂಟ್ವಾಳ ಗ್ರಾಮಾಂತರ ಬೊಕ್ಕ ನಗರ ಪೊಲೀಸೆರೆ ಕೂಟ ನೇತ್ರಾವತಿ ಸುದೆ ಬರಿಟ್, ಸುದೆಟ್ ನಾಡ್ಯೆರ ಪತ್ತ್ದೆರ್. ಆಂಡ ಬಯ್ಯಮುಟ್ಟಲಾ ಒವ್ವೇ ಒಲವು ತಿಕ್ಕ್ದಿಜ್ಜಂಡ್.
ಜುಲೈ 30 ದಾನಿ ಕುಡ ಕಾಂಡೆರ್ದ್ ಅವ್ವೇ ಕೂಟ ಜಕ್ರಿಬೊಟ್ಟು ಡ್ಯಾಂ ರ್ದ್ ತುಂಬೆ ಡ್ಯಾಂ ಮುಟ್ಟಲಾ ನಾಡ್ದೆರ್, ಆಂಡಲಾ ಒವ್ವೇ ಪ್ರೇಜನ ಆತಿಜಿ. ಇನಿ ಜುಲೈ 31ತಾನಿ ಕುಡ ಕಡೇಸ್ವಾಲದ ಬಿಜೆಪಿ ಪ್ರಮುಖೆ ಸಂಪತ್ ಸುವರ್ಣೆರೆನ ಮುತಾಲಿಕೆಡ್ ಈಶ್ವರ್ ಮಲ್ಪೆ ಕೂಟ ಬೊಕ್ಕ ಜಿ.ವಿ. ಫ್ರೆಂಡ್ಸ್ ಕಡೇಸ್ವಾಲ ಬೊಕ್ಕ ಎನ್.ಡಿ.ಆರ್.ಎಫ್ ಕೂಟೊನು ಲೆಪ್ಪುಡಾದ್ ಅಗ್ನಿಶಾಮಕದಳೊದ ಒಟ್ಟುಗು ಊರ್ದಾರೇ ಆಯಿನ ಮೀಂದುನಾರ್ ನಿಸಾರ್ ರೆನ ಒಟ್ಟುಗು ಜಕ್ರಿಬೊಟ್ಟುರ್ದು ತುಂಬೆ ಮುಟ್ಟ ನಾಡ್ದೆರ್. ಅವೆಟ್ಲಾ ದಾಲ ಪ್ರೇಜನ ಆವಂದಿನೆರ್ದಾವರ ಮಧ್ಯಾಹ್ನರ್ದ್ ಬೊಕ್ಕ ತುಂಬೆ ಡ್ಯಾಂರ್ದ್ ತಿರ್ತ್ ಮೂಜಿ ಟೀಮ್ದ ಒಟ್ಟುಗು ಡ್ರೋನ್ ಗಲಸ್ದ್ ನಾಡ್ಯೆರ ಪತ್ತ್ದೆರ್. ಬಯ್ಯದ ಪೊರ್ತುಡು ಡ್ರೋನ್ಗ್ ಪುನ ಒಂಜಿ ಪಾಂಬೊಂದುಪ್ಪುನ ತೋಜಿದ್ ಬೈದಿತ್ತ್ದ್, ಸುದೆಟ್ ನಾಡೊಂದಿತ್ತಿನಕುಲು ಪುನೊನು ಮಿತ್ತ್ ಕನತ್ದೆರ್.