Last updated on August 1st, 2025 at 07:09 am
ಬಂಟ್ವಾಳ, ಆ. 01: ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಸ್ಟೇಶನ್ ಸೀಮೆದ ಮಣಿನಾಲ್ಕೂರು ಗ್ರಾಮೊದ ಪೂಂಜೂರು ಪನ್ಪಿನಲ್ಪ ಜುಲೈ 3 ರ್ದ್ 22 ತ ಉಲಯಿ ಸುಮಾರ್ 45 ಪ್ಲಾಸ್ಟಿಕ್ ಗೋಣಿಡ್ ಇತ್ತಿನ 2,20,00 ರೂ. ಮೌಲ್ಯೊದ ನುಂಗಾದೀತಿನ ಬಜ್ಜೈ ಕನ್ಡ್ದಿನ ಪ್ರಕರಣೊಡು ಬಂಟ್ವಾಳ ಗ್ರಾಮಾಂತರ ಸ್ಟೇಷನ್ ಪೊಲೀಸೆರ್ ಒರಿ ಕಲ್ವನ್ ಪತ್ತ್ದೆರ್.
ನುಂಗಾದ್ ದೀತಿನ ಬಜ್ಜೈ ಕಂಡ್ದಿನ ಬಗೆಟ್ ಜುಲೈ 23ತಾನಿ ಅ.ಕ್ರ. 112/2025 ಕಲಂ 306, ಬಿ.ಎನ್.ಎಸ್ ದ ಪ್ರಕಾರ ಪ್ರಕರಣ ದಾಕಲಾತ್ಂಡ್.
ಜುಲೈ 28 ದಾನಿ ಆರೋಪಿಲೆಡ್ ಒರಿ ಸುಳ್ಯ ಪೈಚಾರ್ ಗ್ರಾಮೊದ ಸತೀಶ್ (29 ವರ್ಷ) ಪನ್ಪಿನಾಯನ್ ದಸ್ತಗಿರಿ ಮಲ್ತ್ದ್, ಕನ್ಡ್ದಿನ 74,000 ರೂ. ಮೌಲ್ಯೊದ 15 ಗೋಣಿ ಬಜ್ಜೈ, ಕನ್ಡ್ದಿನ ಬಜ್ಜೈ ಮಾರ್ದ್ ಬತ್ತಿನ 70,000 ರೂ. ಕಾಸ್ (ಒಟ್ಟು 1,44,000 ರೂ.) ಸ್ವಾಧೀನ ಮಲ್ತೊಂದೆರ್. ಆರೋಪಿ ಕಂಡ್ಯೆರ ಗಲಸ್ದಿನ ಆಪೆ ಗೂಡ್ಸ್ದ ಅಂದಾಜಿ ಮೌಲ್ಯ 80,000 ರೂ. ಆದಿತ್ತ್ದ್ ಒಟ್ಟು 2,24,000 ರೂ. ಮೌಲ್ಯೊದ ಸೊತ್ತುಲೆನ್ ವಶೊಕು ಗೆತೊಂದೆರ್. ಆರೋಪಿಗ್ ಬಂಟ್ವಾಳ ನ್ಯಾಯಂತಡೆ ನ್ಯಾಯಾಂಗ ಕೈದ್ ಕೊರ್ತುಂಡು.
ಈ ಕಲ್ವೆ ಪ್ರಕರಣೊದ ಜಡ್ತೆಡ್ ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಸ್ಟೇಶನ್ದ ಪೊಲೀಸ್ ನಿರೀಕ್ಷಕೆರಾಯಿನ ಶಿವಕುಮಾರ ಬಿ. ಮೆರೆನ ಮುತಾಲಿಕೆಡ್, ಮಂಜುನಾಥ್ ಟಿ. ಪೊಲೀಸ್ ಉಪ ನಿರೀಕ್ಷಕೆರ್, ಬಂಟ್ವಾಳ ಗ್ರಾಮಾಂತರ ಸ್ಟೇಶನ್, ಎ.ಎಸ್.ಐ. ಜಿನ್ನಪ್ಪ ಗೌಡ, ಪೊಲೀಸ್ ಹೆಡ್ ಕಾನ್ಸ್ಟೇಬಲ್ ರಾಜೇಶ್, ನಝೀರ್, ಲೋಕೇಶ್, ಪ್ರಶಾಂತ್, ಪೊಲೀಸ್ ಕಾನ್ಸ್ಟೇಬಲ್ ಮಾರುತಿ, ಹನುಮಂತೆ ಮೊಕುಲು ಪಾಲ್ಪಡೆದಿತ್ತೆರ್.