Last updated on July 26th, 2025 at 07:55 pm
ತುಳುಬಾಸೆಡೇ ತುಳುವೆರೆಗ್ ಮದಿಪು ಎತ್ತಾವೊಡು, ತುಳುಕುಲಾ ಉಲಬಲೆಟ್ ನಿಲೆ ಕೊರೊಡು, ತುಳು ಬರವುಡ್ಲಾ ನ್ಯೂಸ್ ಪಾಡೊಡು ಪನ್ಪಿ ಉದ್ದೇಶ ದೀವೊಂದು 2022 ನೇ ಜುಲೈಡ್ 26 ಪೋಪುನಾನಿ ಆಟಿದ ಅಮಾಸೆದಾನಿ ಉದಿತಿನ ವೆಬ್ ನ್ಯೂಸ್ ಪೋರ್ಟಲ್ ತುಳುವಾಣಿ, ಇತ್ತೆ ‘ತುಳು ಸಮಾಚಾರ’.
ಎಂಕುಲು ಮೋಕೆಡ್ ಒಂಜೊಂಜೇ ಕಲ್ಲ್ ದೀದ್ ಕಟ್ಟಿನ ತುಳುವಾಣಿ ಸುರು ಒಂಜಿ ಒಂಜರೆ ವರ್ಸೊಡು ಕೆಲ ನೆವನೊಲೆರ್ದಾವರ ‘ತುಳು ಸಮಾಚಾರ’ ಪನ್ದ್ ಪಗಪೊಡಾದ್ ಬತ್ತ್ಂಡ್, ಇಪ್ಪಡ್ ಅವು ಆದ್ ಪೋತಿನ ವಿಚಾರ.
ಈ ಮೂಜಿ ವರ್ಸೊಡು ಒವ್ವೇ ಪಣವುದ ಅಂಗಲ್ಪು ದಾಂತೆ, ಪುದರ್ದ ಪಿರವು ಬಲಿಪಂದೆ, ಏರೆನ್ಲಾ ಮೆಚ್ಚಾವೊಡು ಪನ್ಪಿ ಉದ್ದೇಶದಾಂತೆ ಬೆರ್ಮೆರ್ ಸತ್ಯೊಲೆನ್ ನಂಬೊಂದು ತುಳುವಪ್ಪೆನ ಈತಾಂಡಲಾ ಚಾಕಿರಿ ಮಲ್ಪೊಡು ಪನ್ಪಿ ಕುಂದಂದಿ ಉಮೇದ್ಡ್ ಬೆನೊಂದುಲ್ಲ.
ಈ ಉಮೇದ್ ಎಂಕ್ಲೆನ್ ಕೈರ್ದ್ ಒಂಜಾತ್ ‘ಕಡೀರ್’ ಪನ್ಪಿ ಬೇಲೆಲೆನ್ ಮಲ್ಪಾದ್ಂಡ್.
– ಕಡೀರಾದ್ ತುಳು ಲಿಪಿಟ್ ವೆಬ್ನ್ಯೂಸ್ ಮಲ್ತಿನಿ ತುಳು ಸಮಾಚಾರ.
– ಕಡೀರಾದ್ ಬರವುದ ಒಟ್ಟುಗು ತುಳು ನ್ಯೂಸ್ದ ಆಡಿಯೋಲಾ ಪೋಸ್ಟ್ ಮಲ್ತಿನ ತುಳು ಸಮಾಚಾರ.
– ಕಡೀರಾದ್ AI News Agent ಗಲಸ್ದಿನ ತುಳು ಸಮಾಚಾರ.
ಇಂಚ ತುಳು ವೆಬ್ನ್ಯೂಸ್ ವಿಭಾಗೊಡು ಒಂಜಾತ್ ಕಡೀರ ಬೆನ್ನಿಲೆನ್ ತುಳುವಪ್ಪೆ ಎಂಕ್ಲೆಡ ಬೆನ್ಪಾದಲ್ ಪನ್ದ್ ಪೆರ್ಮೆಡ್ ಪನ್ಡೊನುವ.
ಇದಮುಟ್ಟ ಒವ್ವೇ ಒಂಜಿ ರಾಜಕೀಯ ಪಕ್ಷೊನು ವಯಿಸಂದೆ, ಒವ್ವೇ ಒಂಜಿ ಮತೊನು ವಯಿಸಂದೆ, ಒವ್ವೇ ಒಂಜಿ ಜಾತಿನ್ ವಯಿಸಂದೆ, ತುಳುತ ಪರವಾದ್ ಇತ್ತಿನಕಲೆನ್ ಬುಡ್ದು ಕೊರಂದೆ, ತುಳುನು ವಿರೋಧ ಮಲ್ತೊಂದು ಬತ್ತಿನಕಲೆನ್ ಗೆನ್ಪಂದೆ ನ್ಯೂಸ್ ಬರೆಯೊಂದು ಬತ್ತ್ದ. ನನ ದುಂಬಗ್ಲಾ ಇಂಚೆನೇ ಬರೆಯೊಂದುಪ್ಪುವ.
ಎಂಕ್ಲೆಗ್ ಒವ್ವೇ ಅಜೆಂಡಾ ಇಜ್ಜಿ, ಐಡಿಯಾಲಜಿ ಇಜ್ಜಿ, ಪಂತ ಇಜ್ಜಿ. ಎಂಕ್ಲೆಗ್ ಇಪ್ಪುನು ಒಂಜೇ ಧರ್ಮ, ಅವು ತುಳು ಧರ್ಮ. ಒಂಜೇ ಅಜೆಂಡಾ ಅವು ತುಳುತ ಬುಲೆಚ್ಚಿಲ್. ಎಂಕುಲು ಬರೆಪಿನೆಟ್ ದಾಲ ತೆಟ್ಟ್ ಇತ್ತ್ಂಡ ಅವೆನ್ ಪಿಸಿರ್ ಎನ್ನಂದೆ, ನಿಕ್ಲೆ ಮಟ್ಟೆಲ್ಡ್ ಮಾನಾಯಿ ಜೋಕ್ಲೆ ಲೆಕ ಮಾನಾಲೆ ಪನ್ದ್ ಕೇನ್ದಿತ್ತ, ನಿಕುಲು ಮಾನಾದರ್, ನನ ದುಂಬಗ್ಲಾ ಮಾನಾಲೆ ಪನ್ಪಿ ಬಿನ್ನಪು.
ತುಳು ವೆಬ್ನ್ಯೂಸ್ನ್ ಏರೆನಲಾ ಬೆರಿ ಪತ್ತ್ಂದೆ, ಮಾರ್ಕೆಟಿಂಗ್, ಪ್ರಮೋಷನ್ ಮಲ್ಪಂದೆ ಮೂಜಿ ವರ್ಸ ನಡಪಾವುನ ಸುಲಭದ ಬೆಲೆ ಅತ್ತ್. ನಿಕ್ಲೆ ಮೋಕೆ, ಬೆರಿತಾಂಗ್ ಎಂಕ್ಲೆನ್ ಇಡೆಮುಟ್ಟ ಕನತ್ದ್ಂಡ್.
ಈತ್ನೇಟ ಒಂಜಿ ರಡ್ಡ್ ಬುಡ್ಂಡ ಬೇತೆ ಅಡ್ವರ್ಟೈಸ್ಮೆಂಟ್/ಪ್ರಮೋಷನ್ಲೆನ್ ಗೆತೊಂದುಜ. ಅಕುಲಾದೇ ಕೇನ್ದಿನ ರಡ್ಡ್ ಪ್ರಮೋಷನ್ ಅತ್ತಂದೆ ಬೇತೆ ಒವ್ವೇ ಅಡ್ವರ್ಟೈಸ್ಮೆಂಟ್/ಪ್ರಮೋಷನ್ಲೆನ್ ಮಲ್ದಿಜ. ನನ ದುಂಬಗ್ ತುಳುಸಮಾಚಾರದ ತೇರ್ದ ಬಲ್ಲ್ ಗಟ್ಟಿ ಮಲ್ಪುನ ಪೊರ್ತುಡು ಪ್ರಮೋಷನ್ಲೆನ್ ಗೆತೊನೊಡಾದ್ ಬರು. ಈ ಪ್ರಮೋಷನ್ಲೆರ್ದ್ ಎಂಕುಲು ಬರೆಪಿನ ನ್ಯೂಸ್ದ ಕ್ವಾಲಿಟಿ ತೆಟ್ಟುಜಿ ಪನ್ಪಿ ಪಾತೆರ ಕೊರ್ಪ. ನಡು ನಡುಟು ಸಾರ ಪ್ರಮೋಷನ್ ಮಲ್ತ್ದ್ ತುಂಡು ನ್ಯೂಸ್ ಕೊರ್ಪುನ ತೆಟ್ಟ್ ಬೇಲೆ ಮಲ್ಪಯ.
ಈ ಮೂಜಿ ವರ್ಸೊಡು ಅರ್ದೊದಾತ್ ತುಳುವೆರೆನ ಇಲ್ಲ್ ಇಲ್ಲ್ ಎತ್ತ್ದ. ನಿಕ್ಲೆ ಎಡ್ಡೆ ಮದಿಪುಡು ಒಂಜಿ ದಿನ ಪ್ರತೀ ತುಳುವನ ಉಡಲ್ ಮುಟ್ಟುವ. ಈ ಪೊರ್ತುಡು ನಮ್ಮ ಒಟ್ಟುಗು ತುಳುವೆರ್ ನಡಪಾವುನ ವೈವಾಟ್ಲೆನ್ಲಾ ತುಳುವೆರೆಗ್ ಎತ್ತಾವೊಲಿ. ಏರಾಂಡಲಾ ಬ್ಯುಸಿನೆಸ್/ವೈವಾಟ್ದಕ್ಲು ತುಳುಸಮಾಚಾರದ ಮುಕೇನ ನಿಕ್ಲೆ ವೈವಾಟ್ದ ಪ್ರಮೋಷನ್ ಮಲ್ಪುನ ಎನ್ನೊಂದಿತ್ತರ್ನ್ಡ ಎಂಕ್ಲೆಗ್ ಲೆಪ್ಪು ಕೊರೊಲಿ.
ತುಳುವೆರ್ ಬುಲೆಯೊಡು, ತುಳು ಬುಲೆಯೊಡು, ತುಳುವಪ್ಪೆನ ಚಾಕಿರಿ ದುಂಬರಿಯೊಡು.
- ತುಳು ಸಮಾಚಾರದ ತಮೆರಿಲು