Last updated on July 1st, 2025 at 09:40 pm
ಮಂಗಳೂರ್, ಜು. 1: ದಕ್ಷಿಣ ಕನ್ನಡ ಪನ್ಪಿ ಅನುಚಿತ ಪುದರ್ನ್ ಪಗಪೊಡು ಪನ್ದ್ ತುಳುವೆರ್ ಮಾತಾ ಒಟ್ಟಾದ್ ಸುರುತ ಪಜ್ಜೆ ಪನ್ಪಿ ಲೆಕ್ಕೊಡು ಕೋಡೆ, ಜೂನ್ 30 ದಾನಿ ಗೂಗಲ್ ಮೀಟ್ಡ್ ಆನ್ಲೈನ್ ಮೀಟಿಂಗ್ ಲೆತ್ತಿತ್ತೆರ್. ಮಂಗಳೂರು ಜಿಲ್ಲೆದ ಪ್ರತೀ ತಾಲೂಕು, ಪ್ರತೀ ಗ್ರಾಮೊರ್ದು ಜನೊಕುಲು ಬತ್ತಿತ್ತಿನ ಈ ಆನ್ಲೈನ್ ಮೀಟಿಂಗ್ಡ್ ಗುರುಪುರ ವಜ್ರದೇಹಿ ಮಠೊತ ಪರಮಪೂಜ್ಯ ಶ್ರೀ ಶ್ರೀ ರಾಜಶೇಖರಾನಂದ ಸ್ವಾಮಿಲು, ಕುಡ್ಲ ಸಂಸದೆರ್ ಬೃಜೇಶ್ ಚೌಟೆರ್, ಶಾಸಕೆರ್ ವೇದವ್ಯಾಸ ಕಾಮತ್ ಬೊಕ್ಕ ಭರತ್ ಶೆಟ್ರ್, ಮಾಜಿ ಶಾಸಕೆ ಮೊಹಿಯುದ್ದೀನ್ ಬಾವೆರ್, ಮಾಜಿ ಮೇಯರ್ನಕುಲು ಮನೋಜ್ ಕುಮಾರ್ ಕೋಡಿಕಲ್ ಬೊಕ್ಕ ಕವಿತಾ ಸನಿಲ್, ಮಹಾನಗರ ಪಾಲಿಕೆದ ಮಾಜಿ ಪದುಕೆರ್ ಕಿರಣ್ ಕುಮಾರ್ ಕೋಡಿಕಲ್, ಕರ್ನಾಟಕ ರಾಜ್ಯ ಸರ್ಕಾರೊದ ಪಿರ ಒರಿದಿನ ವರ್ಗೊಲೆನ ಆಯೋಗದ ಪದುಕೆದಿ ಪ್ರತಿಭಾ ಕುಳಾಯಿ, ಕೆಪಿಸಿಸಿದ ಪ್ರಧಾನ ಕಾರ್ಯಂತೆರ್ ಪದ್ಮರಾಜ್ ರಾಮಯ್ಯೆರ್ ಬೊಕ್ಕ ರಕ್ಷಿತ್ ಶಿವರಾಮ್, ರಾಜ್ಯ ಬಿಜೆಪಿ ಮಹಿಳಾ ಮೋರ್ಚಾ ಕಾರ್ಯಂತೆರ್ ಶ್ವೇತಾ ಪೂಜಾರಿ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಗುರ್ಕಾರ್ಲು ದಯಾನಂದ ಕತ್ತಲ್ಸಾರ್, ತುಳು ಸಾಂಸ್ಕೃತಿಕ ಚಿಂತಕೆರ್ ತಮ್ಮಣ್ಣ ಶೆಟ್ರ್, ವಾಗ್ಮಿಲು ಡಾ. ಅರುಣ್ ಉಳ್ಳಾಲ್, ವಿಶ್ವ ಹಿಂದೂ ಪರಿಷತ್ದ ಪ್ರದೀಪ್ ಸರಿಪಲ್ಲ, ಟಿವಿ ವಿಕ್ರಮ& ಪೋಸ್ಟ್ ಕಾರ್ಡ್ದ ಮಹೇಶ್ ವಿಕ್ರಮ್ ಹೆಗ್ಡೆ, ಬಿರುವೆರ್ ಕುಡ್ಲದ ದಿನೇಶ್ ಸುವರ್ಣ ರಾಯಿ, ತುಳುನಾಡ ರಕ್ಷಣಾ ವೇದಿಕೆದ ಯೋಗೀಶ್ ಶೆಟ್ಟಿ ಜೆಪ್ಪು, ತುಳುವೆರೆ ಪಕ್ಷೊದ ಶೈಲೇಶ್ ಆರ್ ಜೆ, ಕಸ್ತೂರಿ ಪಂಜ, ತುಳು ಸಾಹಿತಿಲೀ ಮಹೇಂದ್ರನಾಥ್ ಸಾಲೆತ್ತೂರ್, ಶಟರ್ಬಾಕ್ಸ್ ಫಿಲಂಸ್ದ ಸಚಿನ್ ಶೆಟ್ರ್ ಇಂಚ ಪಾಕ ಜನ ಧರ್ಮ, ಜಾತಿ, ಪಕ್ಷ ಬೇಧ ಬುಡುದು ಸುಮಾರ್ 600ರ್ದ್ ಎಚ್ಚ ಜನ ತುಳುವೆರ್ ದಕ್ಷಿಣ ಕನ್ನಡ ಪುದರ್ ಪಗಪೊಡು ಪನ್ಪಿ ಪಾತೆರೊಗು ದನಿಯಾಯೆರ್.
ಆಶೀರ್ವಚನೊದ ಪಾತೆರ ಪಾತೆರ್ನ ಗುರುಪುರ ವಜ್ರದೇಹಿ ಮಠೊತ ಪರಮಪೂಜ್ಯ ಶ್ರೀ ಶ್ರೀ ರಾಜಶೇಖರಾನಂದ ಸ್ವಾಮಿಲು ಬೇತೆ ಬೇತೆ ತುಳುವೆರೆನ್ ಒಟ್ಟು ಮಲ್ದಿನ ಈ ಲೇಸ್ ಅಟ್ಟನೆ ಮಲ್ದಿನಕುಲೆಗ್ ಸೊಲ್ಮೆ ಸಂದಾವೊಂದು ತುಳು ಭಾಷೆ ಬಾರೀ ಪಿರಾಕ್ದ ಭಾಷೆ, ತುಳುಕು ಶತ ಶತಮಾನೊಗು ದುಂಬೇ ಲಿಪಿ ಇತ್ತ್ಂಡ್. ಆಚಾರ್ಯ ಶ್ರೇಷ್ಠೆರ್ ಶ್ರೀ ಮಧ್ವಾಚಾರ್ಯೆರ್ ತುಳು ಲಿಪಿಟೇ ಬರೆಯೊಂದಿತ್ತೆರ್, ತುಳುನಾಡ್ ಏರ್ಪೋರ್ಟ್, ರೈಲ್ವೇ ಸ್ಟೇಷನ್, ಬಸ್, ಪಡವು ಇಂಚ ಮಾತಾ ಬಗೆತ ಸಂಪರ್ಕ ವ್ಯವಸ್ಥೆ ಇತ್ತಿನ ಜಾಗೆ. ಈ ಜಿಲ್ಲೆಗ್ ಮುಲ್ಪದ ಅಸ್ಮಿತೆನ್ ತೋಜಾವುನ ಪುದರ್ ದೀಪುನ ಎಡ್ಡೆ ಬೇಲೆ ಪನ್ದ್ ಪನ್ಡೆರ್.
ಬೇತೆ ಒಂಜಿ ತುರ್ತದ ಮೀಟಿಂಗ್ದ ನಡುಟುಲಾ ಈ ಮೀಟಿಂಗ್ಗ್ ಜಾಯಿನ್ ಆಯಿನ ಮಾನ್ಯ ಸಂಸದೆರ್, ಈ ಜಿಲ್ಲೆಗ್ ದಕ್ಷಿಣ ಕನ್ನಡ ಪನ್ಪಿ ಪುದರ್ ದಾಯೆ ಬತ್ತ್ಂಡ್ ತೆರಿದಿಜಿ, ಕೆನರಾ ಇತ್ತಿನ ನಾರ್ತ್ ಕೆನರಾ ಸೌತ್ ಕೆನರಾ ಆಂಡ್, ಅವು ಬೊಕ್ಕ ದಕ್ಷಿಣ ಕನ್ನಡ ಆಂಡ್. ಈ ಜಿಲ್ಲೆದ ಕೇಂದ್ರ ಸ್ಥಾನ ಅಪ್ಪೆ ಮಂಗಳಾಂಬಿಕೆನ ಪುದರ್ ಡ್ ಇಪ್ಪುನೆರ್ದಾವರ ಈ ಜಿಲ್ಲೆಗ್ ಮಂಗಳೂರು ಪುದರ್ ಸೂಕ್ತ ಪನ್ಪಿ ತನ್ನ ವೈಯಕ್ತಿಕ ಅಭಿಪ್ರಾಯೊನ್ ಪಟ್ಟ್ದ್, ತುಳುವೆರ್ ಒಟ್ಟಾದ್ ವಾ ಪುದರ್ನ್ ಪನ್ಡರ್ನ್ಡಲಾ ಆ ಪುದರ್ ಯಾನ್ ಒಪ್ಪುವೆ. ಸರಕಾರೊದ ಮುಕೇನ ಆಯಿನಾತ್ ಬೇಗೊಡು ಮನ್ಪುನ ಪುನೆಪು ಬರ್ಪೆ ಪನ್ದ್ ಪನ್ಡೆರ್.
ಮಾನ್ಯ ಶಾಸಕೆರ್ ವೇದವ್ಯಾಸ ಕಾಮತೆರ್ ಪಾತೆರ್ದ್, ದಕ್ಷಿಣ ಕನ್ನಡ ಜಿಲ್ಲೆದ ಪುದರ್ ಮಂಗಳೂರು ಜಿಲ್ಲೆ ಪನ್ದ್ ನಿಜವಾದ್ ಆವೊಡಾಯಿನ ವಿಚಾರ, ಪ್ರತೀ ಜನಪ್ರತಿನಿಧಿನಕುಲೆನ ಬೆರಿತಾಂಗ್ ಇತ್ತ್ದ್ ದುಂಬು ಪೋಯಿ, ಎನ್ನ ಕಡೆರ್ದ್ ಈ ಬೇಲೆಗ್ ಸಂಪೂರ್ಣ ಬೆರಿತಾಂಗ್ ಉಂಡು. ನನ ಕರಾವಳಿ ಪನಂದೆ, ತುಳುನಾಡ್ ಪನ್ದ್ ಪನ್ಪಿನ ವ್ಯವಸ್ಥೆ ಆವೊಡು ಪನ್ದ್ ಪನ್ಡೆರ್.
ಮಾನ್ಯ ಬಡಕಾಯಿ ಕುಡ್ಲ ಶಾಸಕೆರ್ ಭರತ್ ಶೆಟ್ರ್ ಪಾತೆರ್ದ್, ಬ್ರಿಟಿಷ್, ಪೋರ್ಚುಗೀಸೆರ್ ಬರ್ಪುನೇಟ ತುಳುನಾಡ್, ತುಳುದೇಶ ಪುದರ್ ಇತ್ತ್ಂಡ್, ಮಂಗಳೂರು ಪನ್ಪಿನ ಪುದರ್ ದುಂಬುರ್ದೇ ಇತ್ತ್ಂಡ್. ಕೆನರಾ, ಕನ್ನಡ ಪನ್ಪಿನ ಪುದರ್ ಒಂಬುಜಿ. ಸಹಜವಾದ್ ಈ ವಿಷಯೊಡು ಪೊರ್ಮ್ಬಾಟ ಆವೊಡಾಯಿನವು. ಉಂದೆಕ್ ಆಡಳಿತಾತ್ಮಕವಾದ್ ಎನ್ನ ಸಂಪೂರ್ಣ ಬೆರಿತಾಂಗ್ ಉಂಡು. ಕರಾವಳಿ ಉತ್ಸವ ನನ ತುಳುನಾಡ ಉಚ್ಚಯದ ಲೆಕ ಮಲ್ಪುನ ದಿಟ್ಟಿಡ್ಲಾ ಬೇಲೆ ಆವೋಡು ಪನ್ದ್ ಪನ್ಡೆರ್.
ಈ ವಿಷಯೊಡು ಪಾತೆರ್ನ ತುಳುವ ಬೊಲ್ಲಿ ದಯಾನಂದ ಕತ್ತಲ್ಸಾರ್ ಇನಿತ ಸರಕಾರೀ ವ್ಯವಸ್ಥೆಡ್ ತುಳುವೆರ್ ಸೊರದೆರ್ಪಂದಿಲೆಕ ಮಲ್ದೆರ್, ನಮ್ಮ ಮೂಲೊಗು ಪೆಟ್ಟ್ ಪಾಡುನಂಚಿನ, ನಮ್ಮ ತುಳು ಭಾಷೆನ್ ಕೆರ್ಪುನಂಚಿನ ಬೇಲೆ ಆವೊಂದೇ ಉಂಡು ಪನ್ದ್ ಪನ್ಡೆರ್. ಅಂಚೆನೇ ಪಾತೆರೊಂದು ಮಂಗಳೂರು ಪನ್ಪಿ ಪುದರ್ ನಮ್ಮ ಪಾಡ್ದನೊಲೆಡ್ ಉಂಡು, ಉಂದೆನೇ ಮಲರಾಯ ದೈವೊದ ನುಡಿಕಟ್ಟ್ಡ್ ಮಂಗಾರ ಪನ್ದ್ಲಾ ಲೆತ್ತ್ದೆರ್, ದಕ್ಷಿಣ ಕನ್ನಡ ಪನ್ಪಿ ನಮ್ಮ ಅಪ್ಪೆನ ತುಡಿತ ಕಡಿಪುನ ಪುದರ್ ಪಗಪೊಡು ಪನ್ದ್ ಪನ್ಡೆರ್. ಮಂಗಳೂರು ಜಿಲ್ಲೆ ಮಲ್ತ್ಂಡ ಕುಡ್ಲ ತಾಲೂಕು ಮಲ್ಪೊಲಿ. ದುಂಬಗೊಂಜಿ ದಿನ ತುಳುರಾಜ್ಯೊಲಾ ಕಟ್ಟೊಲಿ ಪನ್ದ್ ಪನ್ಡೆರ್.
ಅವೆರ್ದ್ ಬೊಕ್ಕ ಕೆಪಿಸಿಸಿ ಪ್ರಧಾನ ಕಾರ್ಯಂತೆರ್ ರಕ್ಷಿತ್ ಶಿವರಾಮ್ ಪಾತೆರ್ದ್, ಜಾತಿ, ಧರ್ಮ, ಪಕ್ಷ ಬೇಧ ಬುಡುದು ಮಾತೆರ್ಲಾ ಒಟ್ಟಾತಿನ ತೂದು ಕುಸಿ ಆಂಡ್, ಮಾನ್ಯ ಸಂಸದೆರ್ ಏಪೊಲಾ ಈ ವಿಷಯೊನು ಪಾತೆರೊಂದುಪ್ಪೆರ್. ದಕ್ಷಿಣ ಕನ್ನಡ ಪುದರ್ ನಮಕ್ ವಾ ಲೆಕ್ಕೊಡುಲಾ ಸಂಬಂಧದಾಂತಿನ ಪುದರ್. ಅವೆನ್ ಆಯಿನಾತ್ ಬೇಗ ಪಗಪೊಡು. ಇತ್ತೆ ಇಪ್ಪುನ ಬ್ರಾಂಡ್ ವ್ಯಾಲ್ಯೂಗ್ ಪೆಟ್ಟ್ ಬೂರಂದಿಲೆಕ ಎಡ್ಡೆ ಪುದರ್ ದೀಪುನ ಎಡ್ಡೆ. ವೈಯುಕ್ತಿಕವಾದ್ ಎಂಕ್ ಮಂಗಳೂರು ಸಮ ತೋಜುಂಡು ಪನ್ದ್ ಪನ್ಡೆರ್. ತುಳುಕಾದ್ ಒಂಜಿ ದಿನ ಗೊತ್ತು ಮಲ್ತ್ದ್, ಭಾಷೆಗೋಸ್ಕರ ಬೇಲೆ ಮಲ್ಪೊಡು, ಕರಾವಳಿ ಉತ್ಸವೊನು ತುಳುನಾಡ ಉತ್ಸವ ಮಲ್ಪುನ ಬಗೆಟ್ಲಾ ಪನ್ಡೆರ್.
ಒಟ್ಟುಗು ಪಾತೆರ್ನ ಕೆಪಿಸಿಸಿ ಪ್ರಧಾನ ಕಾರ್ಯಂತೆರ್ ಪದ್ಮರಾಜ್ ರಾಮಯ್ಯೆರ್ ಈ ಜಿಲ್ಲೆಗ್ ದಕ್ಷಿಣ ಕನ್ನಡ ಪನ್ದ್ ಪುದರ್ ದೀತೆರ್ ಆಂಡ ಮುಲ್ಪದ ಪ್ರಧಾನ ಭಾಷೆ ತುಳು, ಈ ಜಿಲ್ಲೆಗ್ ಮುಲ್ಪದ ಸಂಸ್ಕೃತಿಗ್ ಸಂಬಂಧಿತಿನ ಪುದರ್ ದೀವೊಡು ಪನ್ಪಿ ಆಸೆ ನಮಕ್ ಮಾತೆರೆಗ್ಲಾ ಇತ್ತ್ಂಡ್. ಅಂಚಾದ್ ನಮ್ಮ ಜಿಲ್ಲೆಗ್ ಮಂಗಳೂರು ಜಿಲ್ಲೆ ಪನ್ಪಿ ಪುದರ್ ದೀಪುನ ಎಡ್ಡೆ, ಅವ್ವೇ ಪ್ರಕಾರ ಮಂಗಳೂರು ತಾಲೂಕುನು ಕುಡ್ಲ ತಾಲೂಕು ಮಲ್ಪುನ ಎಡ್ಡೆ ಪನ್ದ್ ಪನ್ಡೆರ್. ಈ ಪುದರ್ ಪಗಪುನ ಎಡ್ಡೆ ವಿಚಾರೊಗು ಎನ್ನ ಬೆರಿತಾಂಗ್ ಏಪೊಗುಲಾ ಉಂಡು ಪನ್ದ್ ಪನ್ಡೆರ್.
ಜಿಲ್ಲಾ ಪಂಚಾಯತ್ದ ಮಾಜಿ ಒತ್ತು ಗುರ್ಕಾರ್ದಿ ಕಸ್ತೂರಿ ಪಂಜ ಪಾತೆರ್ದ್, ಏತೋ ವರ್ಸೊರ್ದಿಂಚಿದ ಈ ಕನೊನು ನಿಜ ಮಲ್ಪೆರ ನಮ ಪಿದಡ್ದ, ಜವನೆರ್ ಎದುರು ಉಂತುದು, ಅಕಲೆ ಪಿರವು ಪ್ರಾಯೊದಕುಲೆ ಮಾರ್ಗದರ್ಶನ ಇತ್ತ್ದ್ ದುಂಬು ಪೋಪುನ ಎಡ್ಡೆ ವಿಷಯ. ಈ ಜಿಲ್ಲೆಗ್ ಮಂಗಳೂರು ಪುದರ್ ದೀವೊಡು. ದಕ್ಷಿಣ ಕನ್ನಡ ಪನ್ಪಿನ ಒಲ್ಪಲಾ ಇಜ್ಜಿ ಪನ್ದ್ ಪನ್ಡೆರ್.
ಮೀಟಿಂಗ್ದ ಸುರೂರ್ದ್ ಅಕೇರಿ ಮುಟ್ಟಲಾ ಇತ್ತ್ದ್ ಜವನೆರೆಗ್ ಬೆರಿತಾಂಗ್ ಕೊರ್ನ ಮಾಜಿ ಶಾಸಕೆರ್ ಮೊಹಿಯುದ್ದೀನ್ ಬಾವೆರ್ ಪಾತೆರ್ದ್, ಈ ಪಜ್ಜೆನ್ ನಮ ಕಡೆಸ್ಸ್ದ್ ದೀಂಡಲಾ ಎಡ್ಡೆ ಪಜ್ಜೆನೇ ದೀತ. ಇನಿ ಏರೆಡ ಕೇಂಡಲಾ ದಕ್ಷಿಣ ಕನ್ನಡ ಪುದರ್ ಏರೆಗ್ಲಾ ಬೊರ್ಚಿ. ಕುಡ್ಲದಕುಲೆಗ್ ಲೋಕೊಡು ಓಡೆ ಪೋಂಡಲಾ ಗೌರವ ಜಾಸ್ತಿ. ಜಿಲ್ಲೆದ ಪುದರ್ ಪಗತ್ದ್ ಮಂಗಳೂರು ಪನ್ದ್ ದೀಯೆರೆ ಉಂದೊಂಜಿ ಎಡ್ಡೆ ಪೊರ್ತು. ಉಂದೆಕ್ ಎನ್ನ ಸಂಪೂರ್ಣ ಬೆರಿತಾಂಗ್ ಉಂಡು ಪನ್ಡೆರ್. ಮಾತೆರ್ಲಾ ಒಟ್ಟಾದ್ ಈ ಬೇಲೆ ಮಲ್ಪುಗ ಪನ್ದ್ ಪನ್ಡೆರ್.
ಬೊಕ್ಕ ಪಾತೆರ್ನ ಕುಡ್ಲದ ಮಾಜಿ ಮೇಯರ್ ಕವಿತಾ ಸನಿಲ್, ನಮ್ಮ ಜಿಲ್ಲೆಗ್ ದಕ್ಷಿಣ ಕನ್ನಡ ಪನ್ದ್ ಏರ್ಲಾ ಪನ್ಪುಜೆರ್, ಮಾತೆರ್ಲಾ ಮಂಗಳೂರು ಜಿಲ್ಲೆ ಪನ್ದೇ ಪನ್ಪೆರ್. ನಮ್ಮ ಜಿಲ್ಲೆಗ್ ಬರ್ಪಿನಕುಲ್ಲಾ ದಕ್ಷಿಣ ಕನ್ನಡ ಗ್ ಪೋಪುನ ಪನ್ದ್ ಪನ್ಪುಜೆರ್, ಮಂಗಳೂರ್ಗ್ ಪೋಪುನ/ಕುಡ್ಲಗ್ ಪೋಪುನ ಪನ್ದೇ ಪನ್ಪೆರ್. ಮಾತಾ ಧರ್ಮ, ಜಾತಿ, ಪಕ್ಷ ಬುಡುದ್ ಜಿಲ್ಲೆದ ಪುದರ್ ಪಗಪುನ ನಮ್ಮ ಸಂಸ್ಕೃತಿಗ್ ಕೊರ್ಪುನ ಮರ್ಯಾದಿ ಪನ್ದ್ ಪನ್ಡೆರ್. ಎಂಕ್ ವೈಯಕ್ತಿಕವಾದ್ ಮಂಗಳೂರು ಜಿಲ್ಲೆ ಸೂಕ್ತ ತೋಜುಂಡು ಪನ್ದ್ ಪನ್ಡೆರ್.
ರಾಜ್ಯ ಬಿಜೆಪಿ ಮಹಿಳಾ ಮೋರ್ಚಾದ ಕಾರ್ಯಂತೆರ್ ಶ್ವೇತಾ ಪೂಜಾರಿ ಪಾತೆರ್ದ್, ನಮ ಓಲ್ಲಾ ಪೋನಗ ಅತ್ತ್ಂಡ ನಮ್ಮಡೆ ಏರ್ಲಾ ಬನ್ನಗ ದಕ್ಷಿಣ ಕನ್ನಡ ಪನ್ದ್ ಏರ್ಲಾ ಪನ್ಪುಜ, ಅಂಚಾದ್ ಮಂಗಳೂರು ಪನ್ಪಿನ ಮಾತೆರೆಗ್ಲಾ ಸೂಕ್ತ ತೋಜುನ ಪುದರ್ನೇ ದೀಪುನ ಎಡ್ಡೆ, ತುಳು ಲಿಪಿಕ್ಲಾ ಪಾಲಿಕೆ ಮಾನಾದಿಗೆ ಕೊರ್ತುಂಡು. ಮಾತಾ ಒಟ್ಟು ಸೇರ್ದ್ ನಮ್ಮ ಭಾಷೆ, ತುಳುನಾಡ್ಗ್ ಬೋಡಾದ್ ಪೊರ್ಮ್ಬಾಟ ಮಲ್ಪುಗ ಪನ್ದ್ ಪನ್ಡೆರ್.
ತುಳುವೆರೆ ಪಕ್ಷೊದ ಸಂಸ್ಥಾಪಕೆರ್ ಶೈಲೇಶ್ ಆರ್ ಜೆ ಪಾತೆರ್ದ್, ನಮ 8-9 ವರ್ಸೊಗು ದುಂಬು ದಕ್ಷಿಣ ಕನ್ನಡ ಪುದರ್ ಪಗತ್ದ್ ಕುಡ್ಲ ಜಿಲ್ಲೆ ಪನ್ಪಿ ಪುದರ್ ದೀವೊಡು ಪನ್ದ್ ರಾಜ್ಯ ಸರ್ಕಾರೊಗು ಮನವಿ ಮಲ್ತಿತ್ತ, ಆಂಡ ಇನಿ ನಮ ತುಳುವೆರ್ ಮಲ್ಲ ಮಟ್ಟ್ಡ್ ಸೇರ್ದ್, ರಾಜಕೀಯ ನಾಯಕೆರ್ಲಾ ಸೇರ್ದ್ ಈ ಬಗೆಟ್ ಪಾತೆರುನ ಮಲ್ಲ ಬುಲೆಚ್ಚಿಲ್. ರಾಜಕೀಯ ಇಚ್ಛಾಶಕ್ತಿದ ಎದುರು ಉಂದು ಮಾತಾ ಎಲ್ಯ ಬೇಲೆಲು, ರಾಜಕಾರಣಿಲು ಮನಸ್ ಮಲ್ತ್ಂಡ ಉಂದು ಗಳಿಗೆಡ್ ಆಪುಂಡು. ನಮ ಮಾತಾ ಒಟ್ಟು ಸೇರ್ಂಡ ಖಂಡಿತವಾದ್ ಈ ಬೇಲೆ ಆಪುಂಡು ಪನ್ದ್ ಪನ್ಡೆರ್. ಕುಡ್ಲ ಪನ್ಪಿ ಪುದರ್ ನಮ್ಮ ಉಡಲ್ಡ್ ಉಂಡು, ಅಂಚ ಎನ್ನ ಅಭಿಪ್ರಾಯೊಡು ಕುಡ್ಲ ಪನ್ಪಿ ಪುದರ್ ಸೂಕ್ತ ಪನ್ದ್ ಪನ್ಡೆರ್.
ಮೀಟಿಂಗ್ದ ಕಡೆಮುಟ್ಟ ಇತ್ತಿನ ತುಳುನಾಡ ರಕ್ಷಣಾ ವೇದಿಕೆದ ಯೋಗೀಶ್ ಶೆಟ್ಟಿ ಜೆಪ್ಪು ಪಾತೆರ್ದ್, ಮಸ್ತ್ ದಿನೊತ ಒಂಜಿ ಕನೊನು ನಮ ನಿಜ ಮಲ್ಪೆರೆ ಜತ್ತ್ದ. ಮುಂಬೈಡ್ ಮರಾಠಿ ಭಾಷೆಗ್, ತಮಿಳ್ನಾಡ್ಡ್ ತಮಿಳ್ಗ್ ದಾಲ ಆಂಡ ಅಲ್ಪದ ರಾಜಕಾರಣಿಲು ಒಟ್ಟಾಪೆರ್, ಆಂಡ ನಮ್ಮಲ್ಪ ಅಂಚ ಇಜ್ಜಂಡ್. ತುಳುನಾಡ್ದ ರಾಜಕಾರಣಿಲೆನ ಇಚ್ಚಾಶಕ್ತಿದ ಕುಂದೆಲ್ರ್ದಾರ ಇದಮುಟ್ಟ ಅಧಿಕೃತ ಭಾಷೆ ಮಲ್ಪೆರಾತಿಜಿ. ಊರುದ ಪುದರ್ಲ್ ಕನ್ನಡೀಕರಣ ಆನಗಲಾ ಏರ್ಲಾ ಮನಿತ್ದಿಜೆರ್. ದಕ್ಷಿಣ ಕನ್ನಡ ಪುದರ್ನ್ ಪಗಪೊಡು ಪನ್ದ್ ಪನ್ಡೆರ್. ಇತ್ತೆ ಮಾತಾ ಒಟ್ಟಾತಿನ ಬಾರೀ ಕುಸಿ ಆಂಡ್ ಪನ್ದ್ ಪನ್ಡೆರ್.
ಮಾಜಿ ಮೇಯರ್ ಮನೋಜ್ ಕುಮಾರ್ ಕೋಡಿಕಲ್ ಪಾತೆರ್ದ್, ಮಂಗಳೂರು ಪನ್ಪಿ ಪುದರ್ನ್ ಈ ಜಿಲ್ಲೆಗ್ ದೀಯೆರ ನಮ ಪಿದಡ್ದ. ನಮ್ಮ ಮಾತೃಭಾಷೆ ತುಳು, ಆಂಡ ಈ ಜಿಲ್ಲೆಗ್ ದಾಯೆ ಕನ್ನಡ ಪುದರ್ ದೀಯೆರಾ ತೆರಿಯುಜಿ ಪನ್ದ್ ಪನ್ಡೆರ್. ಆಯಿನಾತ್ ಬೆಗ ಜಿಲ್ಲೆದ ಪುದರ್ ಪಗಪೊಡು ಪನ್ದ್ ಪನ್ಡೆರ್.
ಬಿರುವೆರ್ ಕುಡ್ಲದ ದಿನೇಶ್ ಸುವರ್ಣ ರಾಯಿ ಪಾತೆರ್ದ್, ತುಳುನಾಡ್ ಬುಲಿಪುನೆನ್ ತೂದು ಇನಿ ಮಾತ್ ತುಳುವೆರ್ ಲಕ್ಕ್ದ. ಅಧಿಕೃತ ವಾದ್ ಪುದರ್ ಪಗಪುನ ಬೇಲೆಗ್ ನಮ ಜತ್ತ್ದ. ನನ ದುಂಬಗ್ ಪ್ರತೀ ಒರಿ ತುಳುವೆ ಈ ಬೇಲೆಗ್ ಜಪ್ಪುಲೆಕ ಆವೊಡು ಪನ್ದ್ ಪನ್ಡೆರ್.
ಪುಗರ್ತೆದ ವಾಗ್ಮಿ ಡಾ. ಅರುಣ್ ಉಳ್ಳಾಲ್ ಪಾತೆರ್ದ್, ತುಳುಕಾದ್ ಇತ್ತೆ ಸಂಘಸಂಸ್ಥೆಲು ಬೆನೊಂದುಲ್ಲ. ಆಂಡಲಾ ಈ ತುಳುಪರ ಭಾವನೆ ನನಲಾ ಎಚ್ಚಿನ ಜನಮಾನಿಲೆನ ಉಡಲ್ಗ್ ಎತ್ತ್ದಿಜಿ. ಕೋಮುವಿಷಯೊಡು ಲಕ್ಕುನಕುಲು ಭಾಷೆದ ವಿಷಯೊಡು ಚಪ್ಪೆ ಆಪೆರ್. ಅಂಚಾದ್ ನಮ ಪಿರವು ಒರಿದ. ಬೆಂಗಳೂರುರ್ದ್ ಬರ್ಪಿನಾಯೆ ‘ನಾನು ತುಳುನಾಡಿಗೆ ಹೋಗ್ತೇನೆ, ಮಂಗಳೂರಿಗೆ ಹೋಗ್ತೇನೆ’ ಪನ್ದ್ ಪನ್ಪೆ ಅತ್ತಂದೆ ದಕ್ಷಿಣ ಕನ್ನಡ ಜಿಲ್ಲೆಗೆ ಹೋಗ್ತೇನೆ ಪನ್ದ್ ಪನ್ಪುಜೆ. ದಕ್ಷಿಣ ಕನ್ನಡ ಪನ್ಪಿನ ಕಾಲಿ ದಾಕಲೆಲೆಡ್ ಇಪ್ಪುನ ಪುದರ್. ಪುದರ್ ಪಗಪುನ ಕ್ರಮ ನಿಜವಾದ್ ಸ್ವಾಗತಾರ್ಹ ಪನ್ದ್ ಪನ್ಡೆರ್. ಕಾಲಿ ಸಂಘಟನೆಲು ಮಾತ್ರ ಅತ್ತಂದೆ ಪ್ರತಿ ಒರಿ ಈ ದಿಟ್ಟಿಡ್ ಬೆನೊಡು ಪನ್ದ್ ಪನ್ಡೆರ್.
ವಿಶ್ವ ಹಿಂದೂ ಪರಿಷತ್ದ ಪ್ರಚಾರ ಪ್ರಮುಖ್ ಪ್ರದೀಪ್ ಸರೀಪಲ್ಲ ಪಾತೆರ್ದ್, ಜಿಲ್ಲೆದ ಪುದರ್ ಪಗಪುನ ವಿಷಯೊಡು ಭಿನ್ನಾಭಿಪ್ರಾಯೊಲೆನ್ ಬುಡ್ದ್ ಈತ್ ಜನ ಒಟ್ಟಾತಿನ ಬಾರೀ ಕುಸಿ ಆಂಡ್. ಇಂಚಿಪ ತುಳು ಭಾಷೆ ಪಾತೆರ್ಯೆರ ನಿರ್ಬಂಧ ಪಾಡುನ ಬಿನ್ನಪುಲೆಗ್ ಜಿಲ್ಲಾ ಪಂಚಾಯತ್ ಮಣೆ ಪಾಡ್ದಿನ ಬೆಸರ್ದ ಸಂಗತಿ, ಎಂಚಲಾ ಅವು ಸಮ ಆಂಡ್, ದಕ್ಷಿಣ ಕನ್ನಡ ಪುದರ್ ಪಗತ್ದ್ ಮಂಗಳೂರು ಪನ್ದ್ ದೀಪುನ ಎಡ್ಡೆ ವಿಷಯ, ದಾಸ್ಯೊರ್ದು ನಮ ಪಿದಯಿ ಬರೊಂದುಲ್ಲ. ಈ ಜಿಲ್ಲೆಗ್ ಸಂಬಂಧದಾಂತಿನ ಪುದರ್ ದೀತಿನವು ತಪ್ಪು. ಗುಲಾಮಿತನೊದ ಪುದರ್ ಬುಡ್ದ್ ಪಾಡ್ರೆ ಪಿದಡ್ದಿನ ಎಡ್ಡೆ ಬುಲೆಚ್ಚಿಲ್ ಪನ್ದ್ ಪನ್ಡೆರ್.
ಕಿರಣ್ ಕುಮಾರ್ ಕೋಡಿಕಲ್ ಪಾತೆರ್ದ್, ಜಿಲ್ಲಾ ಪಂಚಾಯತ್ದ ಇಂಚಿಪೊದ ಕ್ರಮೊನು ಖಂಡನೆ ಮಲ್ತೊಂದು ದಕ್ಷಿಣ ಕನ್ನಡ ಪುದರ್ ಪಗತ್ದ್ ಮಂಗಳೂರು ದೀವೊಡು ಪನ್ಪಿನವು ಎನ್ನ ಅಭಿಪ್ರಾಯ ಪನ್ದ್ ಪನ್ಡೆರ್. ಶಾಸಕೆರ್ ಈ ವಿಷಯೊಡು ದುಂಬು ಪೋಪೆರ್, ನಮ ಅಕುಲೆಗ್ ಬೆರಿತಾಂಗ್ ಕೊರ್ಕ ಪನ್ದ್ ಪನ್ಡೆರ್.
ದೀಕ್ಷಿತ್ ಶೆಟ್ಟಿಗಾರ್, ರೋಶನ್ ರೆನಾಲ್ಡ್, ಮಹಿ ಮುಲ್ಕಿ, ಸಾಹಿತಿ ಕುಶಾಲಾಕ್ಷಿ ಕಣ್ವತೀರ್ಥ, ಉದಯ್ ಪೂಂಜಾ, ಶಟರ್ಬಾಕ್ಸ್ ಫಿಲಂಸ್ದ ಸಚಿನ್ ಶೆಟ್ಟಿ, ಉದಯ್ ಆಚಾರ್ಯ, ಧನುಷ್ ಶೆಟ್ಟಿ, ನಿಶ್ಚಿತ್ ಜಿ ರಾಮಕುಂಜ, ಗೀತಾ ಲಕ್ಷ್ಮೀಶ, ಭರತ್ ಬಲ್ಲಾಳ್ಬಾಗ್ ಪಾತೆರ್ದ್ ದಕ್ಷಿಣ ಕನ್ನಡ ಜಿಲ್ಲೆದ ಪುದರ್ ಪಗಪುನವು ನಮ ನಮ್ಮ ನಾಡ್ದ ಭಾಷೆ ಸಂಸ್ಕೃತಿಗ್ ಕೊರ್ಪುನ ಮರ್ಯಾದಿ ಪನ್ದ್ ಪನ್ಡೆರ್.
ಈ ಮೀಟಿಂಗ್ಡ್ ಪಾತೆರ್ನ ಜನಪ್ರತಿನಿಧಿಕುಲೆನ ಎಚ್ಚಿನಕ್ಲೆನ ಅಭಿಪ್ರಾಯೊಡು ಜಿಲ್ಲೆಗ್ ಮಂಗಳೂರು, ತಾಲೂಕ್ಗ್ ಕುಡ್ಲ ಪುದರ್ ಆವು ಪನ್ದ್ ಇತ್ತ್ಂಡ್. ನನ ದುಂಬಗ್ ಕುಡ್ಲಡೇ ಓಲಾಂಡಲಾ ಮಾತೆರ್ಲಾ ಒಟ್ಟಾದ್ ಈ ಬಗೆಟ್ ಪಾತೆರಕತೆ ಮಲ್ಪುನು ಪನ್ದ್ ನಿರ್ಧಾರ ಮಲ್ತೆರ್.
ಈ ಲೇಸ್ದ ಉದಿಪನೊಗು ಲಾವಣ್ಯ ಶೆಟ್ಟಿ ಚೇಲಾರ್ ಸುಗಿಪುಪದ ಪನ್ಡೆರ್, ರೇಣುಕಾ ಕಣಿಯೂರ್ ಲೇಸ್ ಸುದಾರ್ಮೆ ತೂವೊಂಡೆರ್, ಮಹಿ ಮುಲ್ಕಿ ಸೊಲ್ಮೆ ಸಂದಾಯೆರ್.