Last updated on July 3rd, 2025 at 09:41 am
ಮಣಿಪಾಲ, ಜು. 03: ತಾದಿ ಕಡಪೆರ ಉಂತುದಿತ್ತಿನ ಪೊಂಜೊವುಗು ರಿಕ್ಷಾ ಎಡ್ತ್ದ್ ಆರ್ ತಾದಿಗ್ ಬೂರ್ದ್, ಮಣಿಪಾಲರ್ದ್ ಕುಡುಮಗ್ ಪೋವೊಂದಿತ್ತಿನ ಪ್ರೈವೇಟ್ ಬಸ್ದ ಟಯರ್ದಡಿಕ್ ತಿಕ್ಕ್ದ್ ದಾರುಣವಾದ್ ತೀರ್ದಿನ ನಡಕೆ ಈಶ್ವರನಗರಡ್ ಕೋಡೆ, ಬುಧವಾರ ಬಯ್ಯಡ್ ನಡತ್ದ್ಂಡ್.
ಉಳ್ಳೂರುದ ವಿನೋದಾ ಶೇರ್ವೆಗಾರ (59) ತೀರ್ದಿನಾರ್.
ವಿನೋದಾ ಮೆರೆನ ಮಗಲ್ ಈಶ್ವರನಗಡ್ ಇಪ್ಪುನ. ಮಗಲ್ ಬ್ಯಾಂಕ್ಡ್ ಬೇಲೆ ಮಲ್ಪುನೆರ್ದಾವರ ಅಂಚೆನೇ ಮಗಲೆನ ಮಾಮಿಗ್ ಉಸಾರಿಜ್ಜಂದಿನೆರ್ದಾವರ ಇರ್ವೆರ್ ಪುಲ್ಲಿಲೆನ್ ಅಜ್ಜಿ ವಿನೋದಾ ನೇ ತೂವೊನೆರ ಪೋಪೆದೆರ್. ಇರ್ವೆರ್ ಜೋಕುಲೆನ್ಲಾ ಬ್ರಹ್ಮಾವರದ ಪ್ರೈವೇಟ್ ಶಾಲೆಗ್ ಲೆತೊಂದು ಪೋದು ಬಯ್ಯಡ್ ಪಿರ ಲೆತೊಂದು ಬತ್ತ್ದ್ ಉಳ್ಳೂರುಗು ಪಿರ ಬರ್ಪೆದೆರ್. ಏಪೊಲ್ದಲೆಕ ಬುಧವಾರ ಬಯ್ಯಡ್ ಜೋಕುಲೆನ್ ಶಾಲೆರ್ದ್ ಲೆತಬತ್ತ್ದ್ ಬೊಕ್ಕ ಉಳ್ಳೂರುಗು ಪಿದಡ್ದಿತ್ತೆರ್.
ಒಡಿಪು ಪೋಯೆರೆ ತಾದಿ ಕಡತೊಂದಿತ್ತಿನ ವಿನೋದಾ ಮೇರ್ ಅರ್ಧ ತಾದಿ ಎತ್ತ್ನಗ ದೂರೊಡು ಬರೊಂದಿತ್ತಿನ ರಿಕ್ಷಾನ್ ತೂದು ಅಲ್ಪನೇ ಉಂತುದೆರ್. ತೂಯಿತೂಯಿಲೆಕನೆ ಅವೇ ರಿಕ್ಷಾ ಆರೆಗ್ ಎಡ್ತ್ದ್, ಆರ್ ತಾದಿಗ್ ಬೂರ್ದೆರ್. ರಿಕ್ಷಾದ ಪಿರವುಡು ತಾದಿದ ಬಲತಮೆಯಿಟ್ ಬಾರೀ ಬೀಸಡ್ ಬತ್ತಿನ ಪ್ರೈವೇಟ್ ಎಕ್ಸ್ಪ್ರೆಸ್ ಬಸ್ದ ಚಕ್ರದ ಅಡಿಕ್ ಬೂರಿನೆರ್ದಾವರ ಆರ್ ಅಲ್ಪನೇ ತೀರ್ದೆರ್ ಪನ್ದ್ ತೂಯಿನಕುಲು ಪನ್ತೆರ್.
ಎಡ್ತೆಡ್ ಚಿಪ್ಪುಡ್ ಚೂರ್ ಆದಿತ್ತಿನ ಪುನೊನು ಸಮಾಜಸೇವಕೆ ನಿತ್ಯಾನಂದ ಉಲಕಾಡ್ ಆ್ಯಂಬುಲೆನ್ಸ್ಡ್ ಶವಾಗಾರೊಗು ಕೊನೊಯೆರ ಸಕಾಯ ಮಲ್ತೆರ್.
ಮಣಿಪಾಲ ಪೋಲೀಸ್ ಸ್ಟೇಷನ್ಡ್ ಪ್ರಕರಣ ದಾಕಲಾದಿತ್ತ್ದ್, ರಿಕ್ಷಾ ಬೊಕ್ಕ ಬಸ್ನ್ ಪೊಲೀಸೆರ್ ವಶೊಕು ಗೆತೊಂದೆರ್. ಜಾಗೆಗ್ ಮಣಿಪಾಲ ಪೊಲೀಸೆರ್ ಬತ್ತ್ದ್ ಪರಿಶೀಲನೆ ಮಲ್ತೆರ್.