Last updated on August 13th, 2025 at 08:01 am
ಕುಡ್ಲ, ಆ. 12: ಮಾಸ ಸಪ್ಲೈ ಮಲ್ಪುನ ಟೆಂಡರ್ ತಿಕ್ಕಂದಿನ ಪಗೆಟ್ ಪಿಲಿಕುಳ ಜೈವಿಕ ಉದ್ಯಾನವನೊದ ಮುರ್ಗೊಲೆನ್ ಕೆರ್ಯೆರ ಮಾಸೊಗು ವಿಷ ಬೆರಕೆ ಮಲ್ತ್ ಕೊರ್ಪುನ ಪ್ಲಾನ್ ಆವೊಂದುಂಡು ಪನ್ದ್ ಪಿಲಿಕುಳ ಜೈವಿಕ ಉದ್ಯಾನೊದ ಡೈರೆಕ್ಟರ್ ಡಾ| ಪ್ರಶಾಂತ್ ಪೈ ಕಾವೂರು ಸ್ಟೇಶನ್ಡ್ ಒಯಿಲ್ ಬರೆಪಾದೆರ್.
ಇಂಚಿಪ ಒರಿ ಪೊಸ ಕಾಂಟ್ರಾಕ್ಟರ್ ಮಾಸ ಸಪ್ಲೈ ಮಲ್ಪುನ ಕಾಂಟ್ರಾಕ್ಟ್ ಗೆತೊಂದೆರ್. ಆರ್ ಸಪ್ಲೈ ಮಲ್ತೊಂದುಪ್ಪುನ ಮಾಸೊನು ತಿರಸ್ಕರಿಪುನ ದಿಟ್ಟಿಡ್ ಆವೊಂದುಪ್ಪುನ ಪ್ಲಾನ್ನ್ ದುಂಬುದ ಟೆಂಡರರ್ನ ಬೇಲೆದಾಯೆ ಒರಿ ಆಗಸ್ಟ್ 7 ತಾನಿ ಉದ್ಯಾನವನೊದ ಸಿಬ್ಬಂದಿಗ್ ಕಾಲ್ ಮಲ್ತ್ದ್ ತೆರಿಪಾದೆ. ಈ ಮುಕೇನ ಮುರ್ಗೊಲೆನ್ ಕೆರ್ಪುನ ಪ್ಲಾನ್ ತೆರಿದ್ ಬೈದ್ಂಡ್. ಈ ಬಗೆಟ್ ಪರಿಶೀಲನೆ ಮಲ್ತ್ದ್, ಉಂದೆತ ಪಿರವು ಏರ್ ಉಲ್ಲೆರ್ ಪನ್ದ್ ಜಡ್ತೆ ಮಲ್ತ್ದ್ ಕ್ರಮ ಗೆತೊನೊಡು ಪನ್ದ್ ಒಯಿಲ್ಡ್ ತೆರಿಪಾದೆರ್.
ಒಯಿಲ್ಡ್ ದಾದ ಉಂಡು?
ತೇದಿ 08-08-2025 ತಾನಿ ಪಿಲಿಕುಳ ಜೈವಿಕ ಉದ್ಯಾನವನೊದ ವೈಧ್ಯಾಧಿಕಾರಿ ಡಾ| ದಿವ್ಯಾಗಣೇಶ್ ಮೇರ್ ಬರೆಪಾದಿನ ಒಯಿಲ್ದ ಆಧಾರೊಡು ಪಿಲಿಕುಳ ಜೈವಿಕ ಉದ್ಯಾನವನೊದ ನೌಕರೆ ಹರೀಶ್ ರೆನ ವಿಚಾರಣೆ ಮಲ್ಪುನಗ ತೆರಿದ್ ಬತ್ತಿನ ವಿಷಯೊದ ಪ್ರಕಾರ, ಉಂದೆಕ್ ದುಂಬು ಆಗಸ್ಟ್ ಮುಟ್ಪ ಪಿಲಿಕುಳ ಜೈವಿಕ ಉದ್ಯಾನವನೊದ ಮುರ್ಗೊಲೆಗ್ ಮಾಸ ಸಪ್ಲೈ ಮಲ್ತೊಂದಿತ್ತಿನ ಖಾದರ್ (ಮೇರ್ ಟೆಂಡರರ್ಲಾ ಆದುಲ್ಲೆರ್) ಪನ್ಪಿನಾರೆನ ನಿರ್ದೇಶನೊದ ಮಿತ್ತ್ ಅಬ್ಬಾಸ್ ಬೊಕ್ಕ ಹನೀಫ್ ಪನ್ಪಿನಕುಲು ಪಿಲಿಕುಳ ಜೈವಿಕ ಉದ್ಯಾನವನೊದ ಮುರ್ಗೊಲೆಗ್ ಮಾಸ ಪಾಡೊಂದಿತ್ತೆರ್.
ಆಂಡ ತೇದಿ 07-08-2025 ತಾನಿ ಅಬ್ಬಾಸ್ನ ಅಡಿಟ್ ಬೇಲೆ ಮಲ್ಪುನ ಹನೀಫ್ ಪನ್ಪಿನಾರ್ ಪಿಲಿಕುಳ ಜೈವಿಕ ಉದ್ಯಾನವನೊದ ನೌಕರೆ ಹರೀಶ್ ಪನ್ಪಿನಾರೆಗ್ ಫೋನ್ ಮಲ್ತ್ದ್, ಇತ್ತೆದ ಟೆಂಡರರ್ ಸಪ್ಲೈ ಮಲ್ಪುನ ಮಾಸೊಗು ಕುರಿನ, ವಿಷ ಪಾಡಿನ ಮಾಸ ಬೆರಕೆ ಮಲ್ತ್ದ್, ಇತ್ತೆದ ಟೆಂಡರರ್ನ ಮಾಸ ರಿಜೆಕ್ಟ್ ಆಪಿಲೆಕ ಮಲ್ಪುನ ಪ್ಲಾನ್ ಮಲ್ತೊಂದುಲ್ಲೆರ್ ಪನ್ದ್ ಪನ್ತೆರ್. ಈ ಮುಕೇನ ಟೆಂಡರ್ ತಿಕ್ಕಂದಿನ ಪಗೆಟ್ ಬಾಯಿ ಬರಂದಿನ ಮುರ್ಗೊಲೆನ್ ಕೆರ್ಪುನ ಪ್ಲಾನ್ದ ತೆರಿದ್ ಬೈದ್ಂಡ್.
ಈ ವಿಚಾರೊನು ಅಪಗನೇ ಪೊಲೀಸೆರೆಗ್ ತೆರಿಪಾಯೆರ ಪನ್ತೆರ್. ಆತೇ ಅತ್ತಂದೆ ಈ ವಿಷಯೊದ ಬಗೆಟ್, ಹರೀಶ್ ಬೊಕ್ಕ ಹನೀಫ್ ಪಾತೆರ್ದಿನ ಆಡಿಯೋ ರೆಕಾರ್ಡ್ನ್ ಪೊಲೀಸೆರೆಗ್ ಕೊರ್ತೆರ್. ಅಂಚಾದ್ ಈ ವಿಷಯೊದ ಬಗೆಟ್, ಸಮ ಜಡ್ತೆ ಮಲ್ತ್ದ್ ಕ್ರಮ ಗೆತೊನೊಡು ಅಂಚೆನೇ ಅಬ್ಬಾಸ್ ಬೊಕ್ಕ ಹನೀಫ್ ನ ಮೊಬೈಲ್ ಪೋನ್ನ್ ಪರೀಲನೆ ಮಲ್ತ್ಂಡ, ಉಂದೆತ ಪಿರವು ಏರ್ ಉಲ್ಲೆರ್ ಪನ್ದ್ ತೆರಿಯು ಪನ್ದ್ ಒಯಿಲ್ಡ್ ತೆರಿಪಾದೆರ್.