Last updated on August 12th, 2025 at 12:00 pm
ಬೆಂಗಳೂರು, ಆ. 12: ಇತ್ತೆ ನಡತೊಂದುಪ್ಪುನ ವಿಧಾನಮಂಡಲ ಅಧಿವೇಶನೊಡೀ ಕೋಡೆ ಮಂಗಳೂರು ಬೊಕ್ಕ ಒಡಿಪು ಜಿಲ್ಲೆಡ್ ಕೃತಕವಾದ್ ಉಂಡು ಮಲ್ದಿನ ಕಡ್ಪಕಲ್ಲ್ದ ಕುಂದೆಲ್ದ ಬಗೆಟ್ ಶಾಸಕೆ ಅಶೋಕ್ ರೈಕುಲು ಸೊರ ದೆರ್ತೆರ್. ಗಣಿ ಬೊಕ್ಕ ಭೂವಿಜ್ಞಾನ, ತೋಟಗಾರಿಕೆ ಇಲಾಖೆಗ್ ಕೇನ್ಡಿನ ಪ್ರಶ್ನೆಡ್ ಶಾಸಕೆರ್, ‘ಈತ್ನೇಟ ಕೆಂಪು ಕಲ್ಲ್ ಬೊಕ್ಕ ಪೊಯ್ಯೆದ ವೈವಾಟ್ ಸಮ ನಡಯೊಂದಿತ್ತ್ಂಡ್. ಕೆಂಪು ಕಲ್ಲ್ ಕೊನೊಪುನಾಯನ್ ಪತ್ತ್ದ್ ಕೇಸ್ ಪಾಡುವೆರ್. ಕಲ್ಲ್ದ ಲೈಸೆನ್ಸ್ಲಾ ಕೊರ್ಪುಜೆರ್. ಮಣ್ಣ್ ಪರೀಕ್ಷೆಲಾ ಕುಡ್ಲಡೇ ಆವೊಂದಿತ್ತಿನೆನ್ ಬೆಂಗಳೂರ್ಡ ಮಲ್ಪಾವುಲೆಕ ಮಲ್ತ್ದೆರ್. ಕೇರಳರ್ದ್ 200% ಎಚ್ಚ ರಾಯಲ್ಟಿ ಕರ್ನಾಟಕೊಡು ಗೆತೊನೊಂದುಲ್ಲೆರ್. ಏತೋ ಜನ ಈ ರೂಲ್ಸ್ಲೆರ್ದಾವರ ಬೇಲೆದಾಂತೆ ಬಂಜಿದ ಪಡಿಕ್ ಪೆಟ್ಟ್ ಬೂರ್ದ್ಂಡ್. ಕಾನೂನುಲೆನ್ ಕನಲೆ, ಆಂಡ ಜನೊಕ್ಲೆಗ್ ಬಂಙ ಆಪಿನಲೆಕ ಬೊರ್ಚಿ. ಮುಲ್ಪ ಪಾಪದಾಯೆ ಆವಡ್, ಕಾಸ್ ಇತ್ತಿನಾಯೆ ಆವಡ್ ಮಾತೆರ್ಲಾ ಕೆಂಪು ಕಲ್ಲ್ಡೇ ಇಲ್ಲ್ ಕಟ್ಟುವೆರ್. ಆಯಿನಾತ್ ಬೇಗ ಉಂದೆಕೊಂಜಿ ಪಿರಿಕಟ್ಟ್ ಮಲ್ಪುಲೆ’ ಪನ್ದ್ ಪನ್ಡೆರ್.
ಉಂದೆಕ್ ಸೊರ ಗೋಡ್ಯಾಯಿನ ಕಾರ್ಲ ಶಾಸಕೆ ಸುನಿಲ್ ಕುಮಾರ್, ಕಲ್ಲ್ ಕೊನೊನಪುನಕ್ಲೆನ್ ಕಲ್ವೆರೆ ಲೆಕ ತೂಪೆರ್, ಗಾಡಿಲೆನ್ ಸೀಜ್ ಮಲ್ತ್ದೆರ್. ಮುಲ್ಪ ಇಲ್ಲ್ ಕಟ್ಟೆರೆ ಕೆಂಪು ಕಲ್ಲೇ ಆವೊಡು. ರೂಲ್ಸ್ಲೆನ್ ಒಂತೆ ಕಮ್ಮಿ ಮಲ್ಪುಲೆ. ಕೂಲಿ ಬೇಲೆದಕ್ಲೆಗ್ ಬೇಲೆ ಇಜ್ಜಿ. ಗಣಿ ಇಲಾಖೆ ಮಲ್ಪೊಡಾಯಿನ ಬೇಲೆಡ್ ಗೃಹ ಇಲಾಖೆ ಬರೊಂದುಂಡು. ಕೆರ್ತಿನಕ್ಲೆನ್, ಕಲ್ವೆರೆನ ಬುಡುದ್ ಕಲ್ಲ್ ಕೊನೊಪುನಕ್ಲೆನ್ ಪತ್ತೊಂದುಲ್ಲೆರ್ ಪನ್ದ್ ಪನ್ಡೆರ್.
ಉಂದೆಕ್ ಸದು ಕೊರ್ನ ಸಂಸದೀಯ ವೈವಾಟ್ಲೆನ ಸಚಿವೆ ಎಚ್. ಕೆ. ಪಾಟೀಲ್, ಇನಿ ಆಗಸ್ಟ್ 12ಕ್ ಸ್ಪೀಕರ್ನ ಮುತಾಲಿಕೆಡ್ ಸಭೆ ಲೆತ್ತ್ದ್ ಉಂದೆಕೊಂಜಿ ಪಿರಿಕಟ್ಟ್ ಮಲ್ಪುಗ ಪನ್ದ್ ಪನ್ಡೆರ್. ಆ ಪ್ರಕಾರ ಇನಿ ಮಧ್ಯಾನ ಈ ಬಗೆತ ಮೀಟಿಂಗ್ ನಡಪರೆಗುಂಡು. ಈ ಸಭೆಟ್ ಜಿಲ್ಲೆಲೆನ ಉಸ್ತುವಾರಿ ಸಚಿವೆರ್ನಕುಲು ಪಾಲ್ಪಡೆಪೆರ್.
ಉಂದೆಕ್ ದನಿ ಗೋಡ್ಯಾಯಿನ ಶಾಸಕೆ ವೇದವ್ಯಾಸ ಕಾಮತೆರ್ ಮುಲಾಪದ ವಸ್ತುಸ್ಥಿತಿ ತೆರಿಯೊಂದು ಕಾನೂನು ಮಲ್ಪೋಡು, ಪೊಕ್ಕಡೆ ಬೆಂಗಳೂರುಡು ಕುಲೊಂದು ಬೋಡಿಯಿಲೆಕ ಮಲ್ತ್ಂಡ ಆಪುಜಿ ಪನ್ದ್ ಪನ್ಡೆರ್. ಶಾಸಕೆರಾಯಿನ ರಾಜೇಶ್ ನಾೖಕ್, ಭಾಗೀರಥಿ ಮುರುಳ್ಯ, ಡಾ. ಭರತ್ ಶೆಟ್ರ್ ಪಾತೆರ್ದ್ ಎಲ್ಲೆನೇ ಈ ಸಮಸ್ಯೆಗ್ ಪಿರಿಕಟ್ಟ್ ಆವೊಡು ಪನ್ದ್ ಪನ್ಡೆರ್.