Last updated on August 6th, 2025 at 11:19 am
ಪಡ್ಡೆದ್ರ: ಪೆತ್ತೊಲೆನ್ ಕಂಡ್ದ್ ಕಾರ್ಡ್ ದಿಂಜಾವೊಂದು ಕೊನೊವೊಂದಿತ್ತಿನಕಲೆನ್ ಗಂಗೊಳ್ಳಿರ್ದ್ ಬೆರಿಪತೊಂದು ಬತ್ತಿನ ಪೊಲೀಸೆರೆ ಮಿತ್ತ್ಡೆನೇ ಕಾರ್ ಕೊನೊದು, ಪೆತ್ತೊಲೆನೊಟ್ಟುಗು ಕಾರ್ಡ್ ಕಲ್ವೆರ್ ಪದ್ರಾಡಾತಿನ ನಡಕೆ ಪೆಜಮಾಡಿ ಟೋಲ್ಗೇಟ್ಡ್ ಕೋಡೆ, ಅಂಗಾರೆ ಕಾಂಡೆ ನಡತ್ದ್ಂಡ್.
ಈ ಪೊರ್ತುಡು ಇರ್ವೆರ್ ಪೊಲೀಸೆರ್ ಬೊಕ್ಕ ಒರಿ ಟೋಲ್ಗೇಟ್ ಸಿಬಂದಿಗ್ ಗಡಿಕುಲಾತ. ಆಂಡಲಾ ಒರಿ ಆರೋಪಿನ್ ಪೊಲೀಸೆರ್ ಎಂಚಾಂಡಲಾ ಪತ್ತ್ದೆರ್.
ಗಂಗೊಳ್ಳಿ ಸ್ಟೇಶನ್ದ ಪೊಲೀಸ್ ಉಪನಿರೀಕ್ಷಕೆ (ಜಡ್ತೆ) ಬಸವರಾಜ್ ಕನಶೆಟ್ಟಿ ಬೊಕ್ಕ ಸಿಬಂದಿ ಸಂದೀಪ್ ಅಂಚೆನೇ ಟೋಲ್ ಪ್ಯಾಟ್ರೋಲಿಂಗ್ ಗಾಡಿದ ಡ್ರೈವರ್ ಲೋಹಿತ್ ಪೆಟ್ಟಾತಿನಕುಲು. ಆರೋಪಿ ಕಾರ್ ಡ್ರೈವರ್ ಮಹಮ್ಮದ್ ಶಾರೋಜ್ ಸುರತ್ಕಲ್ (29) ಪನ್ಪಿನಾಯನ್ ಪೊಲೀಸೆರ್ ಕೈದ್ ಮಲ್ತ್ದ್ ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್.
ನಡಕೆದ ಒಲವು
ಗಂಗೊಳ್ಳಿ ಸ್ಟೇಶನ್ ಸೀಮೆಡ್ ಪೆತ್ತೊಲೆನ್ ಕನ್ಡಿನ ಆರೋಪಿಲೆನ್ ಪತ್ಯೆರ ಅಂಗಾರೆ ಕಾಂಡೆ ಪ್ರೈವೇಟ್ ಕಾರ್ಡ್ ಬತ್ತಿತ್ತಿನ ಪೊಲೀಸೆರ್ ಪೆತ್ತ ಕನ್ಡ್ದ್ ಕೊನೊವೊಂದಿತ್ತಿನ ಫಾರ್ಚೂನರ್ ಕಾರ್ನ್ ಉಂತಾಯೆರ ತೂತೆರ್. ಆರೋಪಿಲಾಯಿನ ಕಾರ್ ಡ್ರೈವರ್ ಶಾರೋಜ್ ಸೇರ್ದ್ ಸಫಾನ್ ಕಾಪು, ಅಜೀಮ್ ಕಾಪು ಬೊಕ್ಕ ರಾಜಿಕ್ ಬಜಪೆ ಮೊಕಲೆನ್ ವಶೊಕು ಗೆತೊನರೆ ಪೋನಗ ಪೊಲೀಸೆರೆ ಮಿತ್ತ್ಡೆನೇ ಕಾರ್ ಬರ್ತಾಯೆರ ಉಲಯಿರ್ದ್ ಒರಿ ಪನ್ತೆ. ಅಂಚೆನೇ ಡ್ರೈವರ್ ಕಾರ್ನ್ ಪಿಎಸ್ಐ ಬಸವರಾಜ್ ರೆಗ್ ಎಡ್ತ್ದ್ ಆರೆನ್ ಬೂರ್ಪಾದ್ ಆರೆನ ಕೈತ ಮಿತ್ತ್ಡೆನೇ ಕಾರ್ ಕೊನೊತೆ.
ಎದುರುಡು ಕೆಎಸ್ಸಾರ್ಟಿಸಿ ಬಸ್ ಬೊಕ್ಕ ಬೇತೆ ಕಾರ್ಲ್ ಇತ್ತಿನೆರ್ದಾವರ ಒರಾನೆ ಕಾರ್ನ್ ಪಿರವು ಬುಡ್ದು ಪಿಸಿ ಸಂದೀಪ್ ರೆನ್ಲಾ ಬೂರ್ಪಾದೆ. ಟೋಲ್ ಪ್ಯಾಟ್ರೋಲಿಂಗ್ ಗಾಡಿಗ್ಲಾ ಎಡ್ತಿನೆರ್ದಾವರ ಅವೆತ ಡ್ರೈವರ್ ಲೋಹಿತ್ ರೆಗ್ಲಾ ಗಡಿಕುಲಾತ. ಪಿರವು ಪೋಯಿನ ಟೋಲ್ ಗಾಡಿ ಐತ ಪಿರವು ಇತ್ತಿನ ಪಿಎಸ್ಐ ಪವನ್ ನಾಯಕ್ ರೆನ ಕಾರ್ಗ್ ಎಡ್ತ್ದ್ಂಡ್. ಈ ನಡುಟು ಅಲ್ಪ ಇತ್ತಿನ ಪೊಲೀಸೆರ್ ಆರೋಪಿ ಕಾರ್ ಡ್ರೈವರ್ ಶಾರೋಜ್ನ್ ವಶೊಕು ಗೆತೊಂದೆರ್.
ಆತಾನಗ ಕಾರ್ದ ದತ್ತಮೆಯಿಟ್ ಕುಲ್ದಿತ್ತಿನ ಕುಡೊರಿ ಆರೋಪಿ ಕಾರ್ ಬುಡೊಂದು, ಎದುರು ಇತ್ತಿನ ಕಾರ್ಗ್ ಕುಡೊರ ಎಡ್ತ್ದ್ ಅವೆನ್ ನೂಕೊಂದು ಪೋದು ಇತ್ತಿನ ಒಂತೆ ಜಾಗೆಡೇ ಒರಿನಕ್ಲೆನ್ ಲೆತೊಂದು ಪದ್ರಾಡಾತೆ.
ಕಾರ್ಡ್ ಕಮ್ಮಿಡ್ ನಾಲೈನ್ ಪೆತ್ತೊಲೆನ್ ಹಿಂಸಾತ್ಮಕವಾದ್ ಉಪ್ಪಡ್ದ ಲೆಕ ದಿಂಜಾದ್ ಕೊನೊವೊಂದಿತ್ತೆರ್.
ಕಾರ್ನ್ ಪತ್ಯೆರ ಜಿಲ್ಲೆಡೊರ್ಮೆ ನಾಕಾಬಂದಿ ಪಾಡ್ದೆರ್. ಬೇಲೆಡಿತ್ತಿನ ಪೊಲೀಸೆರೆ ಜೂವ ದೆಪ್ಪೆರೆ ತೂತಿನ ಅಂಚೆನೇ ಸಾರ್ವಜನಿಕ ಸೊತ್ತು ನಾಶ ಮಲ್ತಿನ ಬಗೆಟಾ ಪಡ್ಡೆದ್ರ ಪೊಲೀಸ್ ಸ್ಟೇಶನ್ಡ್ ದಾಕಲಾತ್ಂಡ್.