Last updated on August 23rd, 2025 at 02:54 pm
ಬೆಂಗಳೂರು, ಆ. 23: ಚಿತ್ರದುರ್ಗದ ಕಾಂಗ್ರೆಸ್ ಶಾಸಕೆ ಕೆ.ಸಿ ವೀರೇಂದ್ರ ಪಪ್ಪಿ ಮೆರೆನ ಇಲ್ಲಗ್ ಕೋಡೆ ಇಡಿ ಅಧಿಕಾರಿಲು ದಾಳಿ ಮಲ್ತ್ದೆರ್. ಉಂದೆತ ಬೆರಿಟೇ ಸಿಕ್ಕಿಂದ ಗ್ಯಾಂಗ್ಟಕ್ಡ್ ಶಾಸಕನ್ ವಶೊಕು ಗೆತೊಂದೆರ್.
ತನ್ನ ಕಂಪೆನಿಲೆರ್ದ ಗೇಮಿಂಗ್ ಆ್ಯಪ್ಲೆಗ್ ಅಕ್ರಮವಾದ್ ಕಾಸ್ ಕಡಪುಡ್ದಿನ, ಅಕ್ರಮ ಆಸ್ತಿ ಬೊಕ್ಕ ತಿರ್ವೆದ ದಗೆ ಆರೋಪಡ್ ಕೋಡೆ ಶಾಸಕೆ ಬೊಕ್ಕ ಆರೆನ ಮೆಗ್ಯೆಪಲಯೆ ಕೆ.ಸಿ ನಾಗರಾಜೆ ಬೊಕ್ಕ ಕೆಸಿ ತಿಪ್ಪೇಸ್ವಾಮಿನ ಇಲ್ಲದ ಮಿತ್ತ್ ದಾಳಿ ಮಲ್ತ್ದೆರ್.
ಬೆಂಗಳೂರು, ಚಿತ್ರದುರ್ಗ, ಚಳ್ಳಕೆರೆ, ಗೋವಾ ಸೇರ್ದ್ 17 ಕಡೆಟ್ ಒಂಜೇ ಪೊರ್ತುಡು ದಾಳಿ ಮಲ್ತ್ದ್, ದಾಕಲೆಲೆನ್ ಪರಿಶೀಲನೆ ಮಲ್ದೆರ್.
ಸುಮಾರ್ 18 ಗಂಟೆರ್ದ್ಲಾ ಎಚ್ಚ ಪೊರ್ತು ನಡತಿನ ಪರಿಶೀಲನೆಡ್ 1 ಕೋಟಿ ರೂಪಾಯಿ ವಿದೇಶಿ ಕರೆನ್ಸಿ ಸೇರ್ದ್ ಸುಮಾರ್ 12 ಕೋಟಿ ರೂಪಾಯಿ ಕ್ಯಾಶ್ ತಿಕ್ಕ್ದ್ಂಡ್. 6 ಕೋಟಿ ರೂ. ಮೌಲ್ಯೊದ ಬಂಗಾರ್, ಸುಮಾರ್ 10 ಕೆಜಿ ಬೊಳ್ಳಿ, 4 ಲಕ್ಸುರಿ ಗಾಡಿಲು, 17 ಬ್ಯಾಂಕ್ ಅಕೌಂಟ್ ಬೊಕ್ಕ 2 ಲಾಕರ್ ಲೆನ್ ವಶೊಕು ಗೆತೊಂದೆರ್.
ಎಂಜಿಎಂ ಕ್ಯಾಸಿನೊ, ಮೆಟ್ರೋಪಾಲಿಟನ್ ಕ್ಯಾಸಿನೊ, ಬೆಲ್ಲಾಜಿಯೊ ಕ್ಯಾಸಿನೊ, ಮರೀನಾ ಕ್ಯಾಸಿನೊ, ಕ್ಯಾಸಿನೊ ಜ್ಯುವೆಲ್ ಇಂಚ ಅಂತಾರಾಷ್ಟ್ರೀಯ ಕ್ಯಾಸಿನೊ ಸದಸ್ಯತ್ವ, ಬೇತೆ ಬೇತೆ ಬ್ಯಾಂಕ್ಲೆನ ಕ್ರೆಡಿಟ್ ಬೊಕ್ಕ ಡೆಬಿಟ್ ಕಾರ್ಡ್ಲು, ತಾಜ್, ಹಯಾತ್, ಲೀಲಾ ಲಕ್ಸುರಿ ಗೆಸ್ಟ್ ಕಾರ್ಡ್ಲು ಕೆ.ಸಿ.ವೀರೇಂದ್ರ ಪಪ್ಪಿಡ ಇತ್ತ.
ಶಾಸಕೆರೆಗ್ ಸೇರ್ದಿನ ಪಪ್ಪಿ ಟೆಕ್ನಾಲಜಿ, ರತ್ನ ಗೇಮಿಂಗ್ ಸೊಲ್ಯೂಷನ್ಸ್, ರತ್ನ ಗೋಲ್ಡ್, ರತ್ನ ಮಲ್ಟಿ ಸೋರ್ಸ್ ಕಂಪೆನಿಲೆನ ಮಿತ್ತ್ ಅಕ್ರಮ ಮಲ್ದಿನ ಆರೋಪ ಉಂಡು. ಚಳ್ಳಕೆರೆ ಪೇಂಟೆಡ್ ಇಪ್ಪುನ 4 ಇಲ್ಲ್ಲೆನ ಮಿತ್ತ್ ಇಡಿ ಅಧಿಕಾರಿಲು ದಾಳಿ ಮಲ್ತ್ದೆರ್.
ಪಪ್ಪಿಡ ಆರ್ಥಿಕ ವೈವಾಟ್ ಇತ್ತಿನೆರ್ದಾವರ ಕಾಂಗ್ರೆಸ್ ನಾಯಕಿ ಕುಸುಮಾ ಹನುಮಂತ ರಾಯಪ್ಪ ಮೆರೆನ ಮುದ್ದಿಪಾಳ್ಯ ಸಾದಿಡ್ ಇಪ್ಪುನ ಇಲ್ಲದ ಮಿತ್ತ್ಲಾ ಇಡಿ ದಾಳಿ ಮಲ್ತ್ದ್ಂಡ್.