Last updated on August 8th, 2025 at 02:23 pm
ಕುಡ್ಲ, ಆ. 08: ಕುಡ್ಲಡ್ 2022ಟ್ ನಡತಿನ ಕುಕ್ಕರ್ ಬಾಂಬ್ ಸ್ಪೋಟ ಪ್ರಕರಣೊಡು ಇತ್ತೆ ಕೇಂದ್ರೊದ ರಡ್ಡ್ ತನಿಖಾ ಸಂಸ್ಥೆಲು ಕಂಫ್ಯೂಷನ್ ಉಂಡು ಮಲ್ಪುನಂಚಿನ ಚಾರ್ಜ್ ಶೀಟ್ ಸಂದಾದ. ಎನ್ಐಎ ಜಡ್ತೆಡ್ ಕದ್ರಿ ದೇಲಂತಡೆ ಪನ್ದ್ , ಇಡಿ ತನ್ನ ಆರೋಪಪಟ್ಟಿಡ್ ಧರ್ಮಸ್ಥಳ ಮಂಜುನಾಥ ದೇಲಂತಡೆ ಪನ್ದ್ ಪನ್ತಿನೆರ್ದಾವರ ಇಡೀ ಪ್ರಕರಣ ಇತ್ತೆ ಅಪ್ಪೆರಿಇಪ್ಪೆರಿಗ್ ನೆವನ ಆತ್ಂಡ್.
2022ತ ನವೆಂಬರ್ 19ದಾನಿ ರಿಕ್ಷಾಡ್ ಬಾಂಬ್ ಪುಡದಿತ್ತ್ಂಡ್. ಎನ್ಐಎ ಜಡ್ತೆಡ್ ಕದ್ರಿ ಮಂಜುನಾಥ ದೇಲಂತಡೆದ ಕೈತಲ್ ಬಾಂಬ್ ಪುಡತ್ದ್ ಕೋಮುಪಗೆ ಪುಟ್ಟಾಯೆರ ಐಸಿಸ್ ಅಟ್ಟನೆ ಮಲ್ತಿತ್ತ್ಂಡ್ ಪನ್ದ್ ತೆರಿದ್ ಬತ್ತಿತ್ತ್ಂಡ್. ಒಟ್ಟುಗು ಪ್ರೆಷರ್ ಕುಕ್ಕರ್ ಬಾಂಬ್ದ ಟೈಮರ್ ನ್ 90 ನಿಮಿಷೊಗು ದೀಪುನವು ತತ್ತ್ದ್ 9 ಸೆಕೆಂಡ್ಗ್ ದೀತಿನೆರ್ದಾವರ ಅವು ದೇಲಂತಡೆದ ಕೈತಲ್ ಆರೋಪಿ ಪಿದಡುನ ದುಂಬೇ ರಿಕ್ಷಾಡೇ ಪುಡದಿತ್ತ್ಂಡ್. ಈ ಬಗೆಟ್ ಎನ್ಐಎ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತಿತ್ತ್ಂಡ್.
ಉಂದೇ ಪ್ರಕರಣೊಡು ಅಕ್ರಮ ಕಾಸ್ ಕಡಪುಡುನ ಕಾಯ್ದೆದ ಅಡಿಟ್ ಇ.ಡಿ ಲಾ ಪ್ರಕರಣ ದಾಕಲ್ತ್ದ್ ಜಡ್ತೆ ಮಲ್ತಿತ್ತ್ಂಡ್. ಪ್ರಕರಣೊದ ಆರೋಪಿಲೆನ ಅಕೌಂಟ್ರ್ದ್ 29176 ರೂ. ಜಪ್ತಿ ಮಲ್ದ್ಂಡ್ ಪನ್ದ್ ಇ.ಡಿ. ಬುಧವಾರ ಒಲವು ಪಟ್ಟೊಂದಿತ್ತ್ಂಡ್. ಅಂಚೆನೇ ಈ ಒಲವುಡು ಕದ್ರಿ ಮಂಜುನಾಥ ದೇಲಂತಡೆದ ಕೈತಲ್ ಸ್ಫೋಟ ಪನ್ದ್ ಬರೆಪುನ ಪಗತೆಗ್ ಅವು ಧರ್ಮಸ್ಥಳ ಮಂಜುನಾಥ ಪನ್ದ್ ಬರೆತಿನನೇ ಈ ಕಂಫ್ಯೂಷನ್ಲೆಗ್ ನೆವನ.
ಕುಕ್ಕರ್ ಸ್ಫೋಟ ಪ್ರಕರಣೊಗು ಸಂಬಂಧಿತ್ದ್ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್ಐಎ), ‘ಕದ್ರಿ ಮಂಜುನಾಥ ದೇಲಂತಡೆನ್ ಪುಡಪೆರೆ ಅಟ್ಟನೆ ಮಲ್ದಿತ್ತೆರ್’ ಪನ್ದ್ ಆರೋಪ ಪಟ್ಟಿಡ್ ಬರೆದಿತ್ತ್ಂಡ್. ಆಂಡ, ಜಾರಿ ನಿರ್ದೇಶನಾಲಯ (ಇ.ಡಿ), ‘ಧರ್ಮಸ್ಥಳ ಮಂಜುನಾಥಸ್ವಾಮಿ ದೇಲಂತಡೆನ್ ಪುಡಪೆರೆ ಅಟ್ಟನೆ ಮಲ್ದಿತ್ತೆರ್’ ಪನ್ದ್ ಪನ್ತ್ಂಡ್. ರಡ್ಡ್ ಜಡ್ತೆ ಸಂಸ್ಥೆಲೆನ ಒಲವುಲೆಡ್ ಎತ್ವಾಸಿ ಇತ್ತಿನನೇ ಚರ್ಚೆಗ್ ನೆವನ ಆತ್ಂಡ್.
ಅಂಚೆನೇ, ‘ಪ್ರೇಮರಾಜ್ ಪನ್ದ್ ಪುದರ್ ಪಗತ್ದ್ ಶಾರಿಕ್ ಚಿಕ್ಕಬಳ್ಳಾಪುರದ ಇಶಾ ಫೌಂಡೇಷನ್, ಕನ್ಯಾಕುಮಾರಿದ ವಿವೇಕಾನಂದ ಒರು, ವೆಲ್ಲೂರುದ ದೇಲಂತಡೆ ಬೊಕ್ಕ ಕದ್ರಿ ಮಂಜುನಾಥ ದೇಲಂತಡೆಗ್ ಪೋತೆ ಪನ್ದ್ ಪನ್ದಿತ್ತ್ಂಡ್.
ಕೇಂದ್ರೊದ ರಡ್ಡ್ ತನಿಖಾ ಸಂಸ್ಥೆಲು ಒಂಜೇ ಪ್ರಕರಣೊದ ವಿಚಾರೊಡು ರಡ್ಡ್ ಬೇತೆ ಬೇತೆ ದೇಲಂತಡೆಲೆನ ಪುದರ್ ದಾಯೆ ಉಲ್ಲೇಖ ಮಲ್ತ್ದ ಪನ್ದ್ ಸಾಮಾಜಿಕ ಬಲೆತ್ತಾನೊಡು ಪಾಕ ಜನ ಪ್ರಶ್ನೆ ಮಲ್ತ್ದೆರ್.