Last updated on August 14th, 2025 at 04:30 pm
ಕಾರ್ಲ, ಆ. 14: ಕಂಬುಲ ಕ್ಷೇತ್ರೊಡು ಬಾರೀ ಪುದರ್ ಪೋತಿನ, ಅತೀ ಎಚ್ಚಿನ ಮೆಡಲ್ ಆಕಿನ ಎರ್ಲೆನ ಪಟ್ಟಿಡ್ ಮಿತ್ತುಪ್ಪುನ ಚಾಂಪಿಯನ್ ಎರು ಕೊಳಚೂರು ಕೊಂಡೊಟ್ಟು ಸುಕುಮಾರ್ ಶೆಟ್ರೆನ ‘ಚೆನ್ನೆ’ ಇನಿ, ಗುರುವಾರ (ಆ.14) ತೀರ್ಯೆ.
ಪ್ರಾಯ ಆದಿತ್ತ್ದ್, ಉಸಾರ್ ತತ್ತಿನೆರ್ದಾವರ ಚೆನ್ನೆ ತೀರ್ದೆ. ಇನಿ ಬಯ್ಯಡ್ ಆಯನ ಅಂತ್ಯಸಂಸ್ಕಾರ ನಡಪರೆಗುಂಡು ಪನ್ದ್ ತೆರಿದ್ ಬೈದ್ಂಡ್.
ಕಡಂದಲೆ ಕಾಳು ಪಾಣಾರೆರೆನ ಕಿದೆಟ್ ಇತ್ತಿನ ಚೆನ್ನೆ ಪನ್ಪಿ ಎರುನು ಬಾರ್ಕೂರು ಶಾಂತಾರಾಮ ಶೆಟ್ರ್ ಸುಮಾರ್ 22 ವರ್ಸೊಗು ದುಂಬು ತನ್ನ ಕಿದೆಕ್ ಕನತಿತ್ತೆರ್. ಬೆದ್ರದ ಕೋಟಿ-ಚೆನ್ನಯ ಕಂಬುಲದ ಕಡೀರ್ದ ಮೂಜಿ ವರ್ಸೊಲಾ ಬಲ್ಲ್ದ ಎಲ್ಯ ವಿಭಾಗೊಡು ಬಾರ್ಕೂರು ಶಾಂತಾರಾಮ ಶೆಟ್ರೆಗ್ ಚೆನ್ನೆ ಮೆಡಲ್ ಆಕ್ದ್ ಕೊರ್ತೆ. ಆತೇ ಅತ್ತಂದೆ ಬೆರ್ಮೆರೊಟ್ಟು ಯುವ ಬಾಂಧವೆರ್ ಕೊರೊಂದಿತ್ತಿನ ಸರಣಿಶ್ರೇಷ್ಠ ಪ್ರಶಸ್ತಿಲಾ ಬೆರಿಬೆರಿ ಮೂಜಿ ವರ್ಸ ಬಾರ್ಕೂರುಗ್ ತಿಕ್ಕುನೆತ ಪಿರವು ಚೆನ್ನೆ ಇತ್ತೆ. ಅವೆರ್ದ್ ಬೊಕ್ಕ ಸೀನಿಯರ್ ಆಯಿನೇ ಚೆನ್ನೆ ಪೋದು ಸೇರ್ನ ಕೊಳಚೂರು ಕೊಂಡೊಟ್ಟು ಸುಕುಮಾರ ಶೆಟ್ರೆನ ಕಿದೆಕ್.
ಚೆನ್ನೆ ಒಂತೆ ಪೋಕುರಿದ ಎರು. ಕಂಬುಲ ಗಿಡರುನ ಪೊರ್ತುಡು ಸಮ ಉಂತೆರೆ ಕೇನೆದಿಜೆ. ಅಂಚಾದೇ ಸೀನಿಯರ್ ವಿಭಾಗೊಡು ಒಂಜಿ ವರ್ಸ ನಾಯೆರ್ ವಿಭಾಗೊಡು ಗಿಡತಿತ್ತೆರ್. ಬಂಟ್ವಾಳ ಮಾಂಕಾಳಿಬೊಟ್ಟು ಸೀತಾರಾಮ್ ಶೆಟ್ರ್ ಚೆನ್ನಗ್ ತನ್ನ ಎರುತ ಜತೆ ಮಲ್ತಿತ್ತೆರ್. ಅಲ್ಪ ಅಲ್ಲಿಪಾದೆ ವಿನ್ಸೆಂಟ್ ಮೇರ್ ಚೆನ್ನನ್ ಸಾಂಕುನೆತ ಒಟ್ಟುಗು ಪಾಠ ಮಲ್ತಿತ್ತೆರ್. ವಿಶೇಷ ದಾದ ಪನ್ಡ ಅವ್ವೇ ವರ್ಸೊಡು ನಾಯೆರ್ದ ಮಲ್ಲ ವಿಭಾಗೊಡು ಚೆನ್ನೆ ಚಾಂಪಿಯನ್ ಆದಿತ್ತೆ.
ಕುಡ ಬಲ್ಲ್ದ ಮಲ್ಲ ವಿಭಾಗೊಡು ಗೆಂದಬೊಟ್ಟು ಮೋಡೆ ಬೊಕ್ಕ ಚೆನ್ನೆ ಒಟ್ಟುಗು ಪಾಕ ಮೆಡಲ್ ಆಕ್ದೆರ್. ನಾಲ್ ಸರ್ತಿ ಸರಣಿಶ್ರೇಷ್ಠ ಪ್ರಶಸ್ತಿ ಗೆಂದಿನ ಚೆನ್ನೆ ಒಟ್ಟು 13 ವರ್ಸ ಮೆಡಲ್ ಆಕ್ದ್ ಸಾದಗೊ ಬೆನ್ತಿನಾಯೆ. ಪಲಿಮಾರ್ ದೇವೆಂದ್ರ ಕೋಟ್ಯಾನ್, ಮಾರ್ನಾಡ್ ರಾಜೇಶ್, ಅಳದಂಗಡಿ ಸತೀಶ್, ನಕ್ರೆ ಜಯಕರ ಮಡಿವಾಳ, ಶ್ರೀನಿವಾಸ ಗೌಡೆರ್ ಮಾತಾ ಚಿನ್ನನ ಬೆರಿಯೆ ಬಲಿತ್ದ್ ಮೆಡಲ್ ಆಕ್ದೆರ್.